ۇلىبريتانيانىڭ بيرمەنگەم قالاسىندا (20-27 تامىز) IBSA دۇنيەجۇزىلىك ويىندارىنىڭ العاشقى كۇنىندە قازاقستاندىق پارادزيۋدوشىلار 1 التىن, 1 كۇمىس, 2 قولا, بارلىعى 4 مەدال جەڭىپ الدى. بۇل تۋرالى مادەنيەت جانە سپورت ءمينيسترى اسحات ورالوۆ تەلەگرام ارناسىندا جازدى, دەپ حابارلايدى Egemen.kz.
J2 ساناتىندا 48 كگ سالماقتاعى اقمارال ناۋاتبەك فينالدىق بەلدەسۋدە ۋكرايندىق سپورتشى يۋليا يۆانتسكايانى جەڭىپ, التىننان القا تاقتى. وسىمەن اقمارال ناۋاتبەك الەم بىرىنشىلىگىنىڭ ەكى دۇركىن چەمپيونى اتانىپ وتىر.
J1 ساناتىندا 73 كگ سالماق بويىنشا بەلدەسكەن ەرعالي شامەي كۇمىس جۇلدەگە قول جەتكىزدى.
ال J2 ساناتىندا بەلدەسكەن انۋار ساريەۆ (60 كگ) پەن J2 ساناتىنداعى ولجاس ورازالى ۇلى (73 كگ) قولا مەدالعا يە بولدى. ا.ساريەۆ اقتىق تارتىستا كورەيالىق مين ءليدى جەڭسە, و.ورازالى ۇلى ۋكرايندىق رۋفات ماحاممەدتى ۇتىپ, جارىستىڭ جۇلدەگەرلەرى اتاندى.
ايتا كەتەيىك, مۇنداي جارىس كورۋ قابىلەتى زاقىمدانعان (J2) جانە مۇلدەم كورمەيتىن (J1) سپورتشىلار اراسىندا وتەدى. بيىل IBSA دۇنيەجۇزىلىك ويىندارىنىڭ ناتيجەسى الەم چەمپيوناتىنا تەڭەستىرىلدى.