تۇركىستان وبلىسى سىرداريا وزەنىندە 11 ادام قازا تاپقان وقيعانىڭ ءمان-جايى ايتىلدى, دەپ جازادى Egemen.kz.
وبلىس اكىمدىگىنىڭ ءباسپاسوز قىزمەتى مالىمەتىنشە, 21 تامىزدا ساعات 18:00 شاماسىندا تۇرعىنداردان ادامدار سۋعا باتىپ كەتكەنى تۋرالى حابارلاما كەلىپ تۇسكەن. بەلگىلى بولعانداي, شومىلۋعا كەلگەن 20 ادامنىڭ 11-ءى سۋعا باتىپ كەتكەن. ولاردىڭ بەسەۋى بالا, التاۋى ەرەسەك ادام.
«ولار - ءبىر وتباسىنىڭ مۇشەلەرى نەمەسە تەگى ءبىر ادامدار. وندا بىرنەشە اعايىندىلار جانە ولاردىڭ بالالارى بولدى. تۋىستارىنىڭ سوزىنشە, ولار تويدان شىعىپ, وزەن جاعاسىندا دەمالۋدى ۇيعارعان. جاعالاۋدان بىردەن تەرەڭ جەرى باستالادى. شاماسى بىرەۋى سۋعا باتا باستاپ, باسقالارى ونى شىعارىپ الۋعا تىرىسىپ, باتىپ كەتكەن. الدىن الا اقپارات بويىنشا, ولار ءبىر-ءبىرىن قۇتقارۋعا تىرىسىپ, باتىپ كەتتى. ءتىپتى شومىلۋعا ۇلگەرمەگەن, ءبارىنىڭ ۇستىندە كيىم بولدى. بۇل جەر شومىلۋعا ارنالماعان», دەدى تۇركىستان وبلىسى اكىمدىگىنىڭ ءباسپاسوز قىزمەتى وكىلى.
سۋدان سەگىز ادامنىڭ دەنەسى شىعارىلعان. قالعان ۇشەۋىن ىزدەۋ جۇمىستارى جالعاسىپ جاتىر. وبلىستىق توتەنشە جاعدايلار دەپارتامەنتى جانىنان جەدەل شتاب قۇرىلىپ, وقيعا ورنىنا جىبەرىلگەن وتىرار اۋدانى اكىمدىگىنىڭ, اۋداندىق تج, ورمان شارۋاشىلىعى ءبولىمىنىڭ قىزمەتكەرلەرى, ەرىكتىلەر بىردەن ىزدەستىرۋ شارالارىنا كىرىسكەن.
تۇركىستان وبلىسى تجد ءباسپاسوز قىزمەتىنىڭ مالىمەتىنشە, وقيعا ورنىنا 144 ادام, 16 تەحنيكا, 6 ءجۇزۋ قۇرالى جانە درون جۇمىلدىرىلعان.