بۇگىن قۇتقارۋشىلار الماتى تاۋلارىندا اداسىپ كەتكەن ەكى قىزدى تاپتى, دەپ حابارلايدى Egemen.kz تجم-ءنىڭ ءباسپاسوز قىزمەتىنە سىلتەمە جاساپ.
«21 تامىزدا ساعات 1:20-دا تجم رەسپۋبليكالىق جەدەل-قۇتقارۋ جاساعىنىڭ كەزەكشى-ديسپەتچەرلىك بولىمشەسىنە ەر ادامنان ونىڭ تانىستارىنىڭ تاۋدا جوعالىپ كەتكەنى تۋرالى حابارلاما كەلىپ ءتۇستى. زارداپ شەككەندەرمەن بايلانىس بولدى», دەلىنگەن حابارلامادا.
رجقج جەدەل توبى ءوتىنىش بەرۋشىلەردىڭ گەولوكاتسياسى بويىنشا كازاچكا وزەنىنىڭ شاتقالىنا قاراي شاقىرۋعا شىققان. ساعات 2:20-دا قۇتقارۋشىلاردىڭ جەدەل توبى قىزداردى تاۋىپ العان. ولارعا مەديتسينالىق كومەك قاجەت بولماعان. قۇتقارۋشىلار ولاردى امان-ەسەن تومەن تۇسىرگەن.
تۋريستەردىڭ كوك جايلاۋدان تۇسكەن كەزدە اداسىپ كەتكەنى بەلگىلى بولدى.