ازەربايجان استاناسى باكۋ قالاسىندا ءوتىپ جاتقان ستەند اتۋدان 53-ءشى ليتسەنزيالىق الەم چەمپيوناتىندا قازاقستان نامىسىن ەڭ مىقتى 50 مەرگەنىمىز قورعايدى. ۇلتتىق قۇراما كوشباسشىسىنىڭ ءبىرى يسلام ساتباەۆ فينالدا 4-ءىنشى ورىن الىپ, پاريج وليمپياداسىنىڭ ليتسەنزياسىنا يە بولدى, دەپ حابارلايدى Egemen.kz.
ەرلەر اراسىندا «10 م پنەۆماتيكالىق مىلتىقتان اتۋ» جاتتىعۋىنىڭ فينالىندا 4-ءشى ورىن الىپ, نىسانا كوزدەۋ سپورتىنىڭ اتالعان تۇرىنەن پاريج وليمپياداسىنا بارۋعا بەرىلگەن ءتورت جولدامانىڭ ءبىرىن جەڭىپ العان, سونىمەن قوسا, 632,7 ۇپايمەن قازاقستان رەكوردىن ورناتقان يسلام ساتباەۆتى مادەنيەت جانە سپورت ءمينيسترى اسحات ورالوۆ قۇتتىقتادى.
«يسلام ساتباەۆتى جانە قازاقستان قۇراما كومانداسىن ءبىرىنشى وليمپيادالىق ليتسەنزيانى جەڭىپ الۋىمەن قۇتتىقتايمىن! بۇل سپورتشىلارىمىز ءۇشىن پاريجدەگى ويىندارعا سوڭعى جولداما ەمەس ەكەنىنە سەنىمدىمىن. بيىل مەرگەندەرىمىز ءىرى حالىقارالىق بىرىنشىلىكتەردە كەرەمەت ناتيجە كورسەتۋدە. مىسالى, ستەند اتۋدان قازاقستان قۇراماسى الماتىدا وتكەن الەم كۋبوگىنىڭ مەدالدىك ەسەبىندە ۇزدىك اتاندى. قۇرامانىڭ وزگە دە مۇشەلەرىنىڭ جوعارى ناتيجە كورسەتۋلەرىنە تىلەكتەسپىن», دەدى مينيستر.
وق پەن ستەند اتۋدان الەمنىڭ 100 ەلىنەن 1500-دەن استام سپورتشى قاتىسىپ جاتقان ليتسەنزيالىق الەم چەمپيوناتىندا پاريج وليمپياداسىنىڭ 48 جولداماسى ساراپقا سالىنادى.