سەنات دەپۋتاتى سۇيىندىك الداشەۆ ماڭعىستاۋ وبلىسىنا بارىپ, بىرقاتار نىساننىڭ جۇمىسىمەن تانىستى. سونداي-اق ءوڭىر تۇرعىندارىمەن كەزدەسىپ, وزەكتى ماسەلەلەردى تالقىلادى.
سەناتور «مۇناي فيلد سەرۆيس» جشس-عا, سپورت كەشەنى مەن جاتاقحاناعا ارنايى باردى. ۇجىممەن كەزدەسۋدە جۇمىسشىلاردىڭ ەڭبەك شارتتارىنا, وندىرىستىك مىندەتتەردىڭ ورىندالۋىنا جانە الداعى جوسپارلارىنا نازار اۋداردى.
دەپۋتات ماڭعىستاۋ وبلىسىنىڭ كاسىپكەرلەر پالاتاسىنىڭ وكىلدەرىمەن كەزدەسۋدە مۇنايلى ولكەدە كاسىپكەرلىك سالاسىن دامىتۋ, ينفراقۇرىلىم مەن ينۆەستيتسيالىق تەتىكتەردى جاڭعىرتۋ ماسەلەلەرىن تالقىلادى.
سونىمەن قاتار سۇيىندىك الداشەۆ ءماسليحات دەپۋتاتتارىمەن «قازاق گاز وڭدەۋ زاۋىتى» جشس-نىڭ ەڭبەك ۇجىمىمەن كەزدەستى. كۇن تارتىبىندە «ماڭعىستاۋ اتوم ەنەرگەتيكالىق كومبيناتى» جشس-نىڭ شەكتى كوتەرمە قۇنى مەن قىزمەتى شەگىندە گاز باعاسىن بەلگىلەۋ ماسەلەلەرى كوتەرىلدى.
بۇعان دەيىن سۇيىندىك الداشەۆ ماەك-ءتىڭ باسشىسى جاڭبىرباي ماتاەۆپەن كەزدەسىپ, كومبيناتتاعى جوندەۋ جۇمىستارىمەن تانىسقان بولاتىن.
«مەملەكەت باسشىسى قاسىم-جومارت توقاەۆ حالىقتى اۋىز سۋمەن قامتاماسىز ەتۋ ماسەلەسىن شەشۋ جونىندە ناقتى تاپسىرما بەردى. ماەك كوممۋنالدىق مەنشىككە بەرىلگەننىڭ ارقاسىندا, سونداي-اق بولىنەتىن قارجىعا بايلانىستى وبلىس ورتالىعىنداعى سۋ تاپشىلىعى كەزەڭ-كەزەڭىمەن شەشىلەدى دەپ ەسەپتەيمىز», دەدى سەناتور.
سەنات دەپۋتاتى «كاسپي تۇششىتۋ زاۋىتىنا» دا ارنايى ات باسىن بۇردى. كەزدەسۋ كەزىندە تەڭگەرىمدى ءتاسىلدىڭ ماڭىزدىلىعى ءسوز بولىپ, بىرلەسكەن جۇمىستىڭ جاي-جاپسارىنا توقتالدى. الداعى ۋاقىتتا زاۋىت تاۋلىگىنە 40 مىڭ تەكشە مەتر تەڭىز سۋىن تۇششىتادى دەپ كۇتىلۋدە.
سەناتور وبلىسقا ساپارى اياسىندا الەۋمەتتىك نىسانداردىڭ قۇرىلىس-جوندەۋ جۇمىستارىمەن تانىستى. ناقتى ايتقاندا, شەتپە اۋىلىنىڭ ينفراقۇرىلىمىن جاقسارتۋ, ورتا مەكتەپتى كەڭەيتۋ جۇمىستارىنا نازار اۋداردى جانە اۋداندىق اۋرۋحانالار مەن باسقا دا نىساندارعا باردى. سۇيىندىك الداشەۆ نىسانداردىڭ بەلگىلەنگەن مەرزىمگە سايكەس ساپالى جانە ۋاقتىلى تاپسىرىلۋى قاجەت ەكەنىن تىلگە تيەك ەتتى.
* * *
پارلامەنت سەناتىنىڭ دەپۋتاتى الىبەك ناۋتيەۆ اتىراۋ وبلىسى قۇرمانعازى اۋدانىنىڭ تۇرعىندارىمەن كەزدەستى.
فوتو: aikyn.kz
سەناتور اتىراۋ وبلىسىنىڭ اكىمىمەن, ءماسليحات دەپۋتاتتارىمەن, قوعامدىق كەڭەس مۇشەلەرىمەن جانە ارداگەرلەرمەن كەزدەستى. كەزدەسۋگە قاتىسۋشىلار جول, اۋىل شارۋاشىلىعى ونىمدەرىن قايتا وڭدەۋ, اۋىز سۋ, ەلەكتر ەنەرگياسى, وتىن باعاسى, مەديتسينالىق جانە الەۋمەتتىك قامسىزداندىرۋ ماسەلەلەرىن تالقىلادى.
سونىمەن قاتار دەپۋتات سەناتتىڭ زاڭ شىعارۋ قىزمەتى تۋرالى ايتىپ, زاڭداردىڭ جەكەلەگەن نورمالارىنا نازار اۋداردى.
«قازىرگى تاڭدا حالىقتى الەۋمەتتىك قامسىزداندىرۋ ماسەلەسىنە قاتىستى 17 زاڭ بار. زاڭنامانىڭ بارلىق نورمالارى بىرىكتىرىلىپ, الەۋمەتتىك كودەكسكە ەنگىزىلدى. كودەكس ادامنىڭ بۇكىل ومىرلىك تسيكلىن قامتيدى. بۇل قۇجات تۋعاننان كامەلەتكە تولعانعا دەيىنگى الەۋمەتتىك قولداۋدى, جۇمىسقا ورنالاسۋدى, ەڭبەكتى قورعاۋدى, الەۋمەتتىك ساقتاندىرۋ شارالارىن, قيىن جاعدايلاردا الەۋمەتتىك كومەك كورسەتۋدى, سونداي-اق قارتايعان شاقتا قولداۋ كورسەتۋ ماسەلەلەرىن رەتتەيدى», دەدى الىبەك ناۋتيەۆ.