اقمولا وبلىسى اقكول اۋدانىنىڭ پروكۋراتۋراسى ساۋىقتىرۋ, تۋريستىك جانە سپورتتىق ماقساتتار ءۇشىن ۇزاق مەرزىمگە پايدالانۋعا بەرىلگەن ورمان قورىنىڭ ۋچاسكەسىن مەملەكەتكە قايتاردى.
جالپى اۋدانى 264 گا قۇرايتىن ۋچاسكە 2018 جىلدان باستاپ كوزدەلگەن ماقساتتا پايدالانىلماعان, جالداۋ اقىسى تولەنبەگەن. سونىمەن قاتار ورمان ورتتەرى قاۋپىنىڭ جوعارى دارەجەسىنە قاراماستان, ولاردىڭ الدىن الۋ بويىنشا ءىس-شارالار جۇرگىزىلمەي, ورتكە قارسى جوسپارلار ازىرلەنبەگەن. بۇل ءمان-جايلاردى نەگىزگە الا وتىرىپ, اۋدان پروكۋراتۋراسىنىڭ اكتىسى بويىنشا ۋاكىلەتتى ورگان سوتقا جۇگىندى. اقمولا وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن ۇزاقمەرزىمدى ورمان پايدالانۋ شارتى بۇزىلىپ, جالپى قۇنى 1,6 ملرد تەڭگەنى قۇرايتىن ۋچاسكە مەملەكەت مەنشىگىنە قايتارىلدى.
بۇدان بولەك, جاقىن كۇندەرى استانا قالاسىنىڭ پروكۋراتۋراسى مەملەكەتكە 700 ملن تەڭگەگە جۋىق جەر تەلىمدەرىن قايتارعانىن ايتا كەتەيىك. قالا پروكۋراتۋراسى مەملەكەت مۇقتاجدىعى ءۇشىن الىنعان جەر تەلىمدەرى بويىنشا سوت اكتىلەرىنىڭ ورىندالۋىنا تەكسەرىس جۇرگىزگەن بولاتىن. تەكسەرۋ بارىسىندا اكتسيونەرلىك قوعام ەرىكسىز يەلىكتەن شىعارىلاتىن جەر ۋچاسكەسى ءۇشىن 663 ملن تەڭگە كولەمىندە وتەماقى العانى انىقتالدى. الايدا 2 جىل بويى سوتتىڭ مەكتەپ پەن جاتاقحانا سالۋ ءۇشىن 2 جەر تەلىمىن مەملەكەتكە بەرۋ تۋرالى شەشىمىن ورىنداماعان. پروكۋرورلىق قاداعالاۋ اكتىسى بويىنشا سوت شەشىمى ورىندالىپ, جەر ۋچاسكەلەرى مەملەكەتكە بەرىلدى.