اباي كۇنى پەتروپاۆلداعى س.مۇقانوۆ اتىنداعى عىلىمي امبەباپ كىتاپحانادا كەڭىنەن اتالىپ ءوتتى. جينالعاندار دانىشپان اقىننىڭ ماڭگى ولمەيتىن ولەڭدەرى مەن قاراسوزدەرى تۋرالى اڭگىمەلەر مەن عىلىمي باياندامالاردى عالىمدار, ادەبيەتشىلەر, مەكتەپ مۇعالىمدەرى, كوللەدج ۇستازدارى عانا ەمەس, اسكەري ءبولىمنىڭ تالىمگەرلەرىنىڭ اۋزىنان قىزىعا تىڭدادى.
سونىڭ ىشىندە 6637 اسكەري ءبولىمنىڭ تاربيە جانە الەۋمەتتىك-قۇقىقتىق جۇمىستارى بولىمشەسى باستىعىنىڭ اعا كومەكشىسى باقىت سادۋاقاسوۆ «اباي – ۇلت اقىنى» اتتى بايانداما جاسادى. باياندامادا اقىننىڭ ۇلت تاربيەسىنە قاتىستى دانالىقتى ويلارى تۋرالى ايتىلدى. اباي قاجىماي, تالماي ەڭبەكتەنۋدىڭ ادام ومىرىندەگى ماڭىزىنا نازار اۋدارعان. «ساقالىن ساتقان كارىدەن ەڭبەگىن ساتقان بالا ارتىق» دەيدى دانىشپان. «اۋەلi قۇدايعا سىيىنىپ, ەكiنشi ءوز قايراتىڭا سۇيەنiپ, ەڭبەگiڭدi ساۋساڭ, ەڭبەك قىلساڭ, قارا جەر دە بەرەدi, قۇر تاستامايدى, جەمىسىن بەرەدى» دەگەن حاكىمنىڭ دانالىقتارى جينالعان جاستارعا وڭ اسەر ەتىپ وتىرعانى بايقالدى.
نازارباەۆ زياتكەرلىك مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى اسىل ىسقاقوۆا «اباي جولى» رومانىنداعى اباي وبرازىنا توقتالدى. «تاريحي ءداۋىر كەلبەتى جانە كوركەمدىك شىندىق» دەپ اتالعان بايانداما بۇگىنگى كوزقاراستاعى اباي وبرازىنا تەرەڭدەپ بويلاماققا ۇمتىلعان. «سوتسرەاليزمنىڭ» قۇرساۋىمەن ابايدى ءوز زامانىنىڭ وزىق ويلى ادامدارىنان, ەل بيلەگەن اقىلدىلاردان الىستاتۋدى ويلاعان سولاقاي سىنشىلاردىڭ ادىستەرىنەن ادالانعان بايانداماشى باسقاشا, جاڭاشا ويلاۋعا ۇمتىلىپ, ابايدىڭ ءوز اكەسى قۇنانبايدان, ەلدىڭ اتقامىنەر باسشىلارى بوجەي, سۇيىندىك, بايدالى, بايسالدان العان ۇلگىلەرىن, ونەگەلەرىن الىپ, اقىلمان سوزدەرىن ۇققاندارىنان باستاپ, ازامات رەتىندە قالىپتاسۋ جولدارىنا توقتالىپ ءوتتى. وبلىس ورتالىعىنداعى اباي ورتا مەكتەبىنىڭ مۇعالىمى پەريزات مولداعوجينا «وقۋعا قۇشتار مەكتەپ – وقۋعا قۇشتار ۇلت» جوباسى اياسىندا اباي شىعارمالارىن وقىپ ۇيرەتۋ» دەگەن تاقىرىپتا بايانداما جاساپ, دانىشپاننىڭ ولەڭدەرىن تالداۋ, قاراسوزدەرىنىڭ دانالىق قىرلارىن اشۋدىڭ بۇگىنگى تالاپتارىنا توقتالىپ ءوتتى.
جەرگىلىكتى اقىندار وزدەرىنىڭ ابايعا ارناعان ولەڭدەرىن دە وقىدى. سونىڭ ىشىندە جازۋشى زەينەلعابي يمانباەۆتىڭ قىزى مارال وسپانوۆا ءوزىنىڭ «ابايعا تاعزىم», جازۋشىلار وداعىنىڭ مۇشەسى كۇلايحان راحمەت «اباي جاققان ساۋلە سونبەيدى» اتتى ولەڭدەرىن وقىپ بەردى. ارداگەر ۇستاز, قالالىق ارداگەرلەر ۇيىمىنىڭ توراعاسى جانگەلدى ءتاجين دومبىرامەن ابايدىڭ «كوزىمنىڭ قاراسى» جانە «سەگىز اياق» اندەرىن شىرقادى. كۇيشى سەرىكباي قۇسايىنوۆ اباي ولەڭدەرى مەن كۇيلەرىنىڭ تاريحىنان اڭگىمە شەرتسە, سەگىز سەرى اتىنداعى قازاق حالىق اسپاپتارى وركەسترىنىڭ دومبىراشىسى بايىمبەت قۇبايدوللا اقىننىڭ بىرنەشە كۇيىن تارتىپ بەردى.
ءسويتىپ, اباي كۇنى – رۋحانيات مەرەكەسى رەتىندە كەڭىنەن اتالىپ ءوتتى. وعان قاتىسقان ستۋدەنتتەر, كۋرسانتتار, وقۋشىلار مەن اتا-انالار, ونەرسۇيەر جاس-كارى ءبىر سەرپىلىپ قالدى.
پەتروپاۆل