قازاقستان جاڭا ەكونوميكالىق مودەلگە كوشۋ قاجەت - پرەزيدەنت

مەملەكەت باسشىسى قىركۇيەك ايىندا جاريالاناتىن قازاقستان حالقىنا جولداۋىندا ەلدىڭ ەكونوميكالىق ساياساتى تۋرالى ءوزىنىڭ كوزقاراسىن بايانداۋدى جوسپارلاپ وتىر.

ء«بىز مۇلدەم جاڭا باعىتقا كوشۋ ءۇشىن قازاقستاننىڭ ەكونوميكالىق دامۋىنا تىڭ سەرپىن بەرۋىمىز كەرەك. جاۋاپتى تاريحي ءسات كەلدى. دەمەك قازاقستان ەكونوميكاسى دا قازىرگى دەڭگەيدە قالا المايدى. ءسوزسىز سولاي بولارىنا سەنىمدىمىن. ۇكىمەتتىڭ مىندەتى – ءتيىستى ۇسىنىستار بەرۋ. بۇل – ءبىرىنشى. ەكىنشىدەن, وسى ۇسىنىستارعا سايكەس دايىندالاتىن جوسپارلاردى ىسكە اسىرۋعا كەپىلدىك بەرۋ. بىراق مەن جاڭا ەكونوميكالىق مودەلدى ىسكە اسىرۋعا جانە دايىنداۋعا قاتىستى كوزقاراسىمدى جاسىرمايمىن. جاقىندا جوعارى ەكونوميكالىق كەڭەستىڭ وتىرىسىن وتكىزدىم. اشىعىن ايتقاندا, سول جيىندا وتاندىق ەكونوميستەردى سىنعا الدىم. مەنىڭ ويىمشا, ولار ءىستى سوڭىنا دەيىن جەتكىزە المايدى. كرەاتيۆتىلىك جوق. ءبىزدىڭ جانە جالپى مەملەكەتتىڭ الدىندا تۇرعان مىندەتتەردى تۇسىنبەيدى. حالىق بىزدەن ناقتى شەشىمدەر كۇتەدى, ويتكەنى ەڭ وزەكتى ماسەلەلەردى شەشۋ قاجەت. حالقىمىزدىڭ لايىقتى ءومىر ءسۇرۋ دەڭگەيىن قامتاماسىز ەتۋ ەلىمىزدىڭ ەكونوميكاسىنىڭ دامۋ تۇجىرىمداماسىنا قاتىستى ءبىزدىڭ ۇستانىمىمىزعا تىكەلەي بايلانىستى. مۇنى تۇبەگەيلى شەشىمدەرسىز ەڭسەرۋ قيىن. ءبىز ەلىمىزدىڭ ەكونوميكالىق دامۋىنا تىڭ سەرپىن بەرۋگە باعىتتالعان وسى وتە ماڭىزدى جۇمىسقا بىرگە كىرىسۋىمىز كەرەك», دەدى ەل پرەزيدەنتى.