ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اقپاراتتىق تەحنولوگيالار فاكۋلتەتىنىڭ وقىتۋشىسى نۇرزادا امانگەلدى قازاقشا ىمداۋ ءتىلىن تانۋدىڭ ينتەللەكتۋالدى جۇيەسىن جاساپ شىعاردى. بىرەگەي ازىرلەمە ەرەكشە قاجەتتىلىكتەرى بار ادامدارعا ارنالعان.
تالانتتى عالىم وسى باعىتتا بەس جىلدان بەرى زەرتتەۋ جۇرگىزىپ كەلەدى. عىلىمي جوبا جاساندى ينتەللەكتكە نەگىزدەلگەن جانە سويلەۋ مەن ەستۋ قابىلەتى بۇزىلعان جاندارعا ارنالعان. سونداي-اق جۇيە قازاقشا ىمداۋ تىلىنە بەيىمدەلگەن. مۇنى ونىڭ نەگىزگى بىرەگەيلىگى دەپ ايتۋعا بولادى. جۇيەنى ازىرلەۋ بارىسىندا عالىم ءبىر ىمنىڭ بىرنەشە نۇسقاسىن دايىنداعان. ولاردى كورسەتىلۋ كۇردەلىلىگى بويىنشا توپتارعا ءبولىپ, ارقايسىسىنا جاساندى نەيروندى جەلى مودەلىن ازىرلەگەن.
– بولاشاقتا بۇل جۇيە ارقىلى ىم ءالىپبيى مەن ىم ءتىلىن بىلەتىن سۋردواۋدارماشىلاردى دايارلاي الادى. مۇنداي ماماندار ءتۇرلى مەملەكەتتىك ۇيىمعا قاجەت ەكەنى انىق. ەندى ءبىز ءموبيلدى قوسىمشا جاساۋعا كىرىستىك. ونىڭ كومەگىمەن ىم تىلىمەن ءوزارا سويلەسۋگە بولادى. سويلەۋدى ماتىنگە, ءماتىندى ىمعا جانە كەرىسىنشە تۇرلەندىرەتىن جۇيە قۇرىلادى. وسى جوبانىڭ ارقاسىندا ەرەكشە قاجەتتىلىكتەرى بار ادامداردىڭ مەكتەپتە ىڭعايلى وقىپ, مەديتسينالىق جانە مەملەكەتتىك مەكەمەلەردە قىزمەت الۋى جانە ەركىن سويلەسۋى وتە ماڭىزدى. ءبىر جاعىنان, وسى تاقىرىپتى زەرتتەپ, ءوز ۇلەسىمدى قوسۋ – ازاماتتىق بورىشىم, – دەدى ول.
زەرتتەۋ ناتيجەسى بويىنشا نۇرزادا امانگەلدى اۆتورلىق كۋالىككە يە بولىپ, الەمدىك رەيتينگى جوعارى جۋرنالداردا ءۇش ماقالاسىن جاريالادى. بىلتىر عالىم ەۋرازيا ۇلتتىق ۋنيۆەرسيتەتىنىڭ «Jana Asu» ىشكى گرانتتىق قارجىسىنا يە بولدى.
– «قازاقستاندىق ساڭىراۋلار قوعامى» قوعامدىق بىرلەستىگىنىڭ ۆيتسە-پرەزيدەنتىمەن كەزدەسكەندە, ولاردىڭ بالالاردى وقىتۋعا قاتىستى ءتۇيىندى ماسەلەلەرى بار ەكەنىن ءبىلدىم. قازاقشا جانە باسقا تىلدەر بويىنشا ىمداۋ ءتىلىن ۇيرەتۋگە ارنالعان زياتكەرلىك ترەناجەر اتالعان قوعامداعى ەستۋ قابىلەتى بۇزىلعان بالالارعا ۇلكەن كومەك كورسەتە الاتىن قاجەتتىلىك سانالادى. مۇنداي وقىتۋ جۇيەسى جەتكىنشەكتەرگە ىمداۋ ءتىلىن ۇيرەنۋ مەن قورشاعان ورتادا بايلانىس جاساۋدى ۇيرەنۋگە مۇمكىندىك بەرەتىن ءتيىمدى قارىم-قاتىناس قۇرالدارىمەن قامتاماسىز ەتەدى. اقش پەن قازاقستان عالىمدارىنىڭ ءبىر توبى ەلىمىزدەگى ەستۋ جانە سويلەۋ قابىلەتى بۇزىلعان ادامدارعا ءبىلىم بەرۋ جانە وعان قولجەتىمدىلىك سالاسىندا بىرقاتار زەرتتەۋدى باستادى. ءبىزدىڭ بىرلەسكەن جۇمىسىمىز ەلىمىزدە عانا ەمەس, ورتالىق ازيادا پايداسى زور اۋقىمدى عىلىمي جوباعا اينالادى دەپ سەنەمىز, – دەدى عالىم.
سونىمەن قاتار ن.امانگەلدى ءاربىر عىلىمي جوبانىڭ ماقساتى الدىمەن ادامعا, قوعامعا, قورشاعان ورتاعا كومەكتەسۋ ەكەنىن اتاپ ءوتتى. ەندى بىلىكتى عالىم ءوزىنىڭ عىلىمي ازىرلەمەسىن كوممەرتسيالاندىرۋدى قولعا الماق.