قامكوڭىل جانداردى قولداۋ – قوعامعا ورتاق مىندەت. قىركۇيەك ايىنان باستاپ الماتىدا ەرەكشە قاجەتتىلىكتەرى بار ازاماتتارعا ارنالعان «ينۆاتاكسي» جوباسى كەڭ اۋقىمدا ىسكە قوسىلادى. باستاپقى ەكى ايدا قاناتقاقتى جوبا رەتىندە جۇزەگە اساتىن باستاما مۇقتاج جاندارعا ۇلكەن كومەك بولعالى تۇر.
مەگاپوليستە «ينۆاتاكسي» قىزمەتىن ەكى مىڭنان اسا ادام پايدالانادى, ونىڭ 800-ءى – مۇگەدەك بالالار. بيىل اتالعان قىزمەتتى ۇيىمداستىرۋعا جەرگىلىكتى بيۋدجەتتەن 920 ملن تەڭگە بولىنگەن.
«بۇعان دەيىن قالادا قوسىمشا قاجەتتىلىكتەرى بار ادامداردى تاسىمالداۋعا مامانداندىرىلعان كولىك تاپشىلىعى بايقالعان ەدى. اسىرەسە ينۆاتاكسي قىزمەتتەرىنىڭ ساپاسىنا قاتىستى ەسكەرتۋلەر ءجيى بولعان. كورسەتىلەتىن قىزمەتتەردى كوپشىلىككە قولجەتىمدى ەتۋ جانە ساپاسىن ارتتىرۋ ءۇشىن الماتى قالاسى اكىمدىگىنىڭ باستاماسىمەن جانە ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىمەن «ياندەكس.تاكسي» اگرەگاتورى ارقىلى ينۆاتاكسي قىزمەتتەرىن ۇسىنۋ جوباسى جۇزەگە استى», دەيدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ.
ازاماتتار تاراپىنان ايرىقشا سۇرانىس تۋدىرعان جوبانىڭ نورماتيۆتىك-قۇقىقتىق اكتىلەرىنە ەڭبەك جانە حالىقتى الەۋمەتتىك قورعاۋ مينيسترلىگى تاراپىنان ءتيىستى وزگەرىستەر ەنگىزۋ جوسپارلانعان. بۇل – ءوز كەزەگىندە قوسىمشا قاجەتتىلىكتەرى بار ادامدار ءۇشىن قولايلى جانە قاۋىپسىز قوزعالۋدى قامتاماسىز ەتۋدىڭ وڭتايلى جولى. جىل سايىن بۇل قىزمەتكە قاجەتتىلىك ارتىپ كەلەدى. ماسەلەن 2021 جىلى 1 462 مۇگەدەك ادام ينۆاتاكسي قىزمەتىمەن قامتىلسا, 2022 جىلى 1 488 ازامات اتالعان باعدارلامانىڭ كومەگىنە جۇگىنگەن.
جوبانى ۇيلەستىرۋشىلەر قىزمەتتى جەتكىزۋشىلەر ءۇشىن «ياندەكس.تاكسي» پلاتفورماسىندا ەسەپتىك جازبالار جاسالعانىن, مۇگەدەكتىگى بار ادامداردى قاناتقاقتى جوباعا قوسۋ مۇمكىندىگى بەرىلگەنىن اتاپ ءوتتى. وسى جوباعا قوسىلعان مۇگەدەكتىگى بار ادامدار «ياندەكس.تاكسي» قوسىمشاسى ارقىلى قىزمەتتەرگە تاپسىرىس بەرۋدى ىڭعايلى ۋاقىتتا ياندەكس Go قوسىمشاسىندا ارنايى ازىرلەنگەن «INVA» ءتاريفى ارقىلى دەربەس جۇزەگە اسىرا الادى. بۇل جوبادا كۇنىنە ساپارلار سانىنا شەكتەۋ قويىلعان. ماسەلەن, مۇگەدەكتىگى بار ءبىر ادام ءۇشىن كۇنىنە 2 ساپاردان اسپايتىن ليميت بەلگىلەنگەن.
ايتا كەتۋ كەرەك, الماتى قالاسى بويىنشا قىزمەت ازاماتتاردىڭ بەس ساناتى ءۇشىن ۇسىنىلادى. ولار – كرەسلو-اربامەن قوزعالاتىن جانە تىرەك-قيمىل اپپاراتى بۇزىلعان مۇگەدەكتىگى بار ادامدار مەن مۇگەدەكتىگى بار بالالار, كورۋ قابىلەتى بۇزىلعان مۇگەدەكتىگى بار ادامدار مەن مۇگەدەكتىگى بار بالالار, اۋتيزم سپەكترى بۇزىلعان مۇگەدەكتىگى بار جەتكىنشەكتەر.