ءباا استاناسى ابۋ-دابي قالاسىندا 12-17 جاس ارالىعىنداعى جاcوسپىرىمدەر اراسىندا ارالاس جەكپە-جەكتەن ءوتىپ جاتقان الەم چەمپيوناتىندا ەلىمىزدىڭ ەكى سپورتشىسى توپ جاردى, دەپ حابارلايدى Egemen.kz.
46 ەلدەن 653 سپورتشى قاتىسىپ جاتقان الەمدىك اۋقىمدى قامتىعان ءدۇبىرلى دودادا ەلىمىزدىڭ قورجىنىنا ءبىر التىن, ءبىر قولا جۇلدە ءتۇستى.
فينالدا ليۆاندىق سپورتشى ومار انتاردى جەڭگەن 40 كەلىگە دەيىنگى سالماقتاعى ماڭعىستاۋلىق ەركەبۇلان يمانعالي الەم چەمپيونى اتاندى.
ال جارتىلاي فينالعا شىققان تۇركىستاندىق ورىنباسار پەردەبەك 44 كەلىگە دەيىنگى سالماق دارەجەسىندە قولا جۇلدەگەر اتاندى.
اتالمىش الەم چەمپيوناتىندا ەلىمىزدىڭ نامىسىن 14-15 جانە 16-17 جاس ارالىعىنداعى جاسوسپىرىمدەر قۇراماسىنىڭ 35 مۇشەسى قورعاپ جاتىر.