جاقىندا بىرقاتار اقپارات قۇرالىندا «ساكەن سەيفۋللين تۋرالى فيلم تۇسىرىلەدى», دەگەن اقپارات تاراعان ەدى. وعان مادەنيەت جانە سپورت ءمينيسترىنىڭ الەۋمەتتىك جەلىدەگى جازباسى نەگىز بولعان. دەگەنمەن مينيستر فيلم تۇسىرىلەدى دەپ ناقتى ايتپاعان بولاتىن. وسىعان بايلانىستى دراماتۋرگ, اكتەر قانات جۇنىسوۆكە حابارلاسىپ انىق-قانىعىن بىلگەن ەدىك, دەپ حابارلايدى Egemen.kz.
«مەن جاقىندا مادەنيەت جانە سپورت ءمينيسترى اسحات ورالوۆتىڭ قابىلداۋىندا بولدىم. وندا ءبىز كينو مەن تەاتر ونەرى تۋرالى ءسوز قوزعادىق. سولاردىڭ ىشىندە كەلەسى جىلى ساكەن سەيفۋلليننىڭ 130 جىلدىعىنا بايلانىستى كينو ستسەناري مەن وپەرانى ۇسىندىم. مينيستر وسى ماسەلەگە بايلانىستى الەۋمەتتىك جەلىدەگى پاراقشاسىندا «اكتەر, جازۋشى قانات ءجۇنىسوۆ كينو تۇسىرۋگە بايلانىستى ءوزىنىڭ ۇسىنىستارىمەن كەلدى. اسىرەسە وپەرا قىزىعۋشىلىق تۋدىردى», دەگەن ماعىنادا جازبا قالدىردى. وسىنى كەيبىر باق دۇرىس تۇسىنبەي جازبا جاريالاعان ەكەن. سايتتار اسىعىستىق تانىتىپ, ساكەن جايلى فيلم تۇسىرىلەتىن بولدى, ءتىپتى كەيبىرەۋلەرى ساكەن جايلى فيلم ءتۇسىرىلدى, دايىن», دەپ جازىپ جىبەرىپتى.
بۇل جەردە مەن ۇسىنعان ستسەناريمەن كينو ءتۇسىرۋ ءۇشىن, ەن الدىمەن ۇلتتىق كينونى قولداۋ مەملەكەتتىك ورتالىعى وتكىزەتىن ىرىكتەۋگە قاتىسۋ كەرەك. ول جەردە ءتۇسىرىلىم توبىنىڭ قۇجاتتارى تەكسەرىلەدى. ودان كەيىن ۇلكەن كينو ماماندارىنان قۇرالعان ساراپتامالىق كەڭەس بار. ساراپتامالىق كەڭەس ءار ستسەناريدىڭ كوركەمدىك دەڭگەيىن قارايدى. وسى ىرىكتەۋدەن وتسە عانا كينو تۇسىرىلەدى. ءتۇسىرىلىم توبىنىڭ بۇل ىرىكتەۋگە دايىندىعى جاقسى. ستسەناري بۇعان دەيىن دە كينوتانۋشىلاردىڭ سۇزگىسىنەن وتكەن. جاقسى رەتسەنزيالار جازىلعان. ناعىز ۇلتتىق فيلم ستاتۋسىنا لايىقتى جوبا ەكەنى ايتىلعان. دەگەنمەن سوڭعى ءسوزدى بيىلعى ساراپتامالىق كەڭەس ايتادى. سولاردىڭ ىرىكتەۋىنەن وتسەك قانا كينو تۇسىرەمىز. ەندى ساكەن جايلى فيلم تۇسىرەتىن ۋاقىت كەلدى. ونىڭ ۇستىنە كەلەسى جىلى 130 جىلدىق مەرەيتويى كەلە جاتىر. ساكەننىڭ قازاق تاريحىندا اتقارعان ۇلى ىستەرى از ەمەس. قاي قىرىنان السا دا قازاق ۇلتى وسىنداي دەپ ماقتانىشپەن كورسەتەتىن قايراتكەر. ساكەننىڭ قيلى قايشىلىققا تولى تاعدىرى بارلىعى كينو تۇسىرۋگە سۇرانىپ تۇر. سوندىقتان مەن مينيسترلىككە ۇلكەن ۇسىنىس جاسادىم.
ەندى وپەراعا كەلەتىن بولساق, بۇل وپەرانى كومپوزيتور ءالىبي ءابدىنۇروۆ ەكەۋمىز جازدىق. وپەرا وتكەن جىلى رەسپۋبليكالىق «دالا داۋىسى» بايقاۋىندا گران-پري سىيلىعىن جەڭىپ العان. كاسىبي ۇلكەن مامانداردىڭ سۇزگىسىنەن وتكەن. وپەراعا قىزىعۋشىلىق تۋدىراتىن سەبەبى - بىزدە ۇلتتىق وپەرا ونەرى كەنجەلەپ قالدى. سوندىقتان وپەرانى دامىتۋىمىز كەرەك. مادەنيەت جانە سپورت ءمينيسترى اسحات ورالوۆ: «بۇل جوبانى قولداۋىمىز كەرەك», دەپ ءوز ويىن ايتتى. ەندى كەلەسى جىلى كينومىز تاسپالانسا, وپەرامىز ساحنالانۋ ءۇشىن جان-جاقتى دايىندىقتى جۇرگىزىپ جاتىرمىز», دەپ ويىن اياقتادى قانات ءجۇنىسوۆ.