استانادا قالا كەلبەتىن ديزاين-كود بويىنشا رەتكە كەلتىرۋ جۇمىسى قارقىندى ءجۇرىپ جاتىر. ءبىر اپتا ىشىندە قالا بويىنشا 800-گە جۋىق زاڭسىز ىلىنگەن ماڭدايشا مەن جارناما بانەرى الىنىپ تاستالدى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ماڭدايشالار مەن جارناما بانەرلەرىنىڭ الىنىپ تاستاۋىنىڭ بىردەن ءبىر سەبەبى – ولاردىڭ ءبارى 2019 جىلى بەكىتىلگەن استانا ديزاين كودىنا سايكەس كەلمەيدى.
نۇرا اۋدانىنىڭ اكىمدىگى «استانا-جارناما» كمم-مەن بىرلەسىپ 9 تۇرعىن ءۇي كەشەنىندە («قۇلاگەر» تك, «جاعالاۋ-3» تك, «قۇلاگەر-2» تك, «كوركەم Tower» تك) ورنالاسقان شوب سۋبەكتىلەرىنىڭ تىلدەر تۋرالى زاڭنىڭ ساقتالۋى جانە زاڭسىز جارنامانىڭ (ديزاين-كودقا سايكەس كەلمەيتىن) جويىلۋىن تەكسەرىپ شىقتى. ناتيجەسىندە 26-28 شىلدە كۇندەرى 91 جارناما مەن 30 ماڭدايشا دەمونتاجدالدى.
سول سياقتى زاڭسىز جارنامالار مەن ماڭدايشالاردى الىپ تاستاۋ تۋرالى 36 حابارلاما بەرىلىپ, 3 تۇرعىن ءۇي كەشەنىندە ورنالاسقان («Aru Qala» تك, «مانحەتتەن» تك, «مانحەتتەن» تك) ماڭدايشالاردى ديزاين كودقا سايكەستەندىرۋ بويىنشا ءىس-قيمىل الگوريتمى تابىستالدى.
ال سارىارقا اۋدانىندا زاڭسىز ىلىنگەن 382 جارناما مەن ماڭدايشا الىنىپ تاستالدى.
بايقوڭىر اۋدانىندا جىل باسىنان بەرى اپپارات قىزمەتكەرلەرى ءتۇسىندىرۋ جانە زاڭسىز جارنامالاردى بولشەكتەۋ بويىنشا 40-تان استام كوشپەلى ءىس-شارا وتكىزدى. قورىتىندىسى بويىنشا بۇگىنگى كۇنى 300-گە جۋىق زاڭسىز جارناما وبەكتىسى بولشەكتەلدى.
قالعان اۋدانداردا دا وسى باعىتتاعى جۇمىس قارقىندى ءجۇرىپ جاتىر. وسىلايشا, ءبىر اپتا ىشىندە اكىمدىك قىزمەتكەرلەرىنىڭ جۇمىسىنىڭ ناتيجەسىندە ديزاين-كودقا سايكەس كەلمەيتىن 800-گە جۋىق زاڭسىز ىلىنگەن باننەرلەر مەن ماڭدايشالار الىنىپ تاستالدى.
ايتا كەتەيىك, 2019 جىلدىڭ جەلتوقسان ايىندا قالا ماسليحاتىمەن ديزاين-كود بەكىتىلگەن. الايدا اياقاستىنان پاندەميا باستالىپ جۇمىس كەيىنگە شەگەرىلگەن. ال 2023 جىلدىڭ 4 ساۋىرىندە استانا قالاسىن دامىتۋ ماسەلەلەرى جونىندەگى كەڭەستە پرەزيدەنت ق.توقاەۆ كوشە جارناماسىن ورنالاستىرۋعا قويىلاتىن تالاپتاردىڭ ساقتالۋىن باقىلاۋدى كۇشەيتۋ تۋرالى تاپسىرما بەرگەن بولاتىن.
وسى باعىتتاعى جاۋاپتى مىندەت «استانا-جارناما» كوممۋنالدىق مەملەكەتتىك مەكەمەسىنە جۇكتەلدى. قازىرگى ۋاقىتتا عيماراتتاردىڭ نەمەسە قۇرىلىستاردىڭ قاسبەتىنە ماڭدايشالاردى ورنالاستىرۋ تۇجىرىمداماسى ازىرلەندى. وندا بيزنەس وكىلدەرىنە ەلوردانىڭ ساۋلەتتىك ءسانىن ءبىر ستيلگە كەلتىرۋدىڭ ۇلگىسى كورسەتىلگەن. ۋربانيستيكا ورتالىعى مەن اكىمدىك قىزمەتكەرلەرى ءار اۋداننىڭ كاسىپكەرلەرىمەن كەزدەسۋ ۇيىمداستىرىپ, تۇجىرىمدامانى تالقىلادى.