قاراعاندى وبلىسىنىڭ بالالارعا الەۋمەتتىك قىزمەت كورسەتۋ ورتالىعىندا بولعان جاعداي تۋرالى دەنساۋلىق ساقتاۋ مينيسترلىگى كەشە, اتاپ ايتقاندا, 31 شىلدەدە حابار العان. قاراعاندى وبلىسىنا ارنايى بارعان دەنساۋلىق ساقتاۋ ءمينيسترى اجار عينيات بالالاردىڭ جاعدايى قاتاڭ باقىلاۋعا الىنعانىن ايتتى, دەپ حابارلايدى Egemen.kz.
«بالالاردىڭ جاعدايى ناشارلاۋى, اتاپ ايتقاندا, دەنە قىزۋىنىڭ كوتەرىلۋى, قۇسۋى سياقتى بەلگىلەرمەن تاعى دا ءتورت بالانىڭ جانساقتاۋ بولىمىنە ءتۇسۋى, جاعدايدىڭ اسقىنىپ كەتۋى قانداي دا ءبىر ۋلانۋ جاعدايلارىنا ۇقسامايتىنىن كورسەتتى. دەنساۋلىق ساقتاۋ مينيسترلىگىنىڭ ەڭ ۇزدىك ماماندارى قاراعاندىلىق ماماندارمەن بىرگە بالالاردىڭ ءومىرى ءۇشىن كۇرەسىپ جاتىر», دەدى اجار عينيات.
بۇگىندى تاڭدا وبلىس اۋرۋحاناسىنا جەتكىزىلگەن 14 بالا ەم قابىلداپ جاتىر, التى بالا جانساقتاۋ بولىمىنە جاتقىزىلدى. جانساقتاۋ بولىمىندە جاتقان ەكى بالانىڭ جاعدايى وتە اۋىر. قالعان بەس بالانىڭ جاعدايى جاقسى. قازىر بالالاردا اۋرۋ بەلگىلەرى جوق.
«قازىر بالالاردا ءىش اۋرۋ, قۇسۋ ءتارىزدى اۋرۋ بەلگىلەرى جوق. بىراق ءالى دە دارىگەرلەردىڭ قاداعالاۋىندا بولادى. اۋرۋحانادان سوڭ ەم الىپ جاتقان ورتالىققا قايتا جىبەرىلەدى. ال جاعدايى اۋىر التى بالانىڭ دەنساۋلىعى بويىنشا دارىگەرلەردىڭ كونسيليۋمى جۇرگىزىلىپ جاتىر. بالالاردىڭ ومىرىنە تونگەن باستى قاتەر اعزا ۋلانۋىنان بولىپ وتىر», دەپ ءتۇسىندىردى مينيستر.
ونىڭ ايتۋىنشا, باستاپقى تالداۋلار ناتيجەسى بالالاردا ىشەك ينفەكتسياسىنىڭ بولماعانىن كورسەتكەن. وقيعانىڭ سەبەبى ءالى دە انىقتالاتىن بولادى.
«قاراعاندى وبلىسىنىڭ بالالارعا ارناۋلى الەۋمەتتىك قىزمەتتەر كورسەتۋ ورتالىعى» كمم-دە بالالاردىڭ تاماقتان ۋلانۋ فاكتىسى بويىنشا قىلمىستىق كودەكستىڭ 304-بابى 2-بولىگى (اۋىر زارداپتارعا اكەپ سوقتىرعان سانيتارلىق ەرەجەلەردى نەمەسە گيگيەنالىق نورماتيۆتەردى بۇزۋ) بويىنشا سوتقا دەيىنگى تەگرەپ-تەكسەرۋ باستالدى.
قىلمىستىق ءىس قاراعاندى وبلىسى پروكۋراتۋراسىنىڭ ارنايى پروكۋرورلارىنىڭ وندىرىسىنە قابىلداندى. قۇقىق قورعاۋ جانە ارنايى ورگانداردىڭ تاجىريبەلى قىزمەتكەرلەرى جۇمىلدىرىلىپ, ۆەدومستۆوارالىق جەدەل-تەرگەۋ توبى قۇرىلدى. ءتيىستى ساراپتامالار تاعايىندالدى. تەرگەۋ شارالارى اياسىندا جاۋاپتى لاۋازىمدى تۇلعالاردىڭ ءىس-ارەكەتتەرىنە ءتيىستى قۇقىقتىق باعا بەرىلەتىن بولادى.
ەستەرىڭىزگە سالا كەتەيىك, قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا ۋلانۋ سالدارىنان ءبىر بالا قايتىس بولدى, تاعى التاۋى جانساقتاۋ بولىمىندە جاتىر.
وبلىس اكىمى ەرماعانبەت بولەكپاەۆ تەرگەۋ ناتيجەسىندە جاۋاپتى تۇلعالار انىقتالىپ, قاتاڭ جازالاناتىنىن ەسكەرتتى. مەكەمە ديرەكتورىنىڭ مىندەتىن اتقارۋشى قىزمەتىنەن بوساتىلدى.
قاسىمحان عالىم,
قاراعاندى وبلىسى