قازاقستاندا كوكپارشى قىز ەۆا جيگالينا جايىندا «ەۆا. باتىر قىز» اتتى دەرەكتى فيلم ءتۇسىرىلدى. بۇل – بالا كەزىنەن سايىن دالا توسىندە جەلمەن جارىسىپ, تابيعاتتان ەسكەن ەركىندىككە ەركەلەپ وسكەن تاباندى قىزدىڭ جانى قالاعان سۇيىكتى ىسىمەن اينالىسۋ حاقى ءۇشىن كۇرەسى تۋرالى وقيعا.
ءداستۇرلى قوعامدا ايەلگە كوكپارعا قاتىسۋعا قاتاڭ تىيىم سالىنعان. بىراق ەۆا قيىندىقتارعا مويىماستان تاباندىلىق تانىتىپ, قالىپتاسقان قاساڭ قاعيدالاردى بۇزدى, الەۋمەتتىك جانە مادەني توسقاۋىلداردى ەڭسەرە ءبىلدى. ول «كوكپار – تەك ەرلەردىڭ ويىنى» دەگەن مىقتىلارمەن تەكەتىرەستە بولدى. دەگەنمەن ەۆانى قولدايتىندار دا تابىلىپ, ونىڭ جىگەرىنە, ارمانىنا, ادال مىنەزىنە لايىقتى باعاسىن بەرىپ, جىگەرلەندىرىپ, توسقاۋىلدارعا توتەپ بەرۋىنە كومەگىن ايامادى. ەتى ءتىرى ەۆا كادىمگى بىلەك كۇشىنەن دە, ەپتىلىكتەن دە كەندە ەمەس, ال ونىڭ ىشكى تەگەرشىگىنىڭ مىقتىلىعى, جالىنى مەن تاباندىلىعى كورگەن ادامنىڭ كوڭىلىن ەرىكسىز قاناتتاندىرادى.
فيلم كورەرمەندى ەموتسيالىق ساياحاتقا ءۇيىرىپ اكەتىپ, كەيىپكەر جولىندا كەزدەسكەن قيىندىقتاردى, ونىڭ سايگ ۇلىككە دەگەن ماحابباتىن قىزىقتى مىسالدارمەن بايانداي جونەلەدى.
«اتا-انام كوكپارعا قاتىسۋعا تىيىم سالعان. بىراق ءبىر جەردە كوكپار بولىپ جاتىر دەسە, دەگبىرىم قاشىپ, دەلەبەم قوزىپ, ۇيدەن قاشىپ كەتەتىنمىن. كوكپارعا العاش رەت 15 جاسىمدا قاتىستىم. شاقىرۋسىز بارعان ەدىم. ءوزىم دە تاڭعالدىم. اتتا وتىرىپ, ەرلەردىڭ كوكپاردا جان الىپ, جان بەرگەنىن كوردىم. ولارعا قوسىلا كەتىپ, سەركەنى ج ۇلىپ الىپپىن. ەرلەر مەنى قۋا جونەلدى, بىراق ۇستاتپاي كەتتىم. قازىر جۇرتتىڭ كوكپارعا قىزىعۋى ارتقانىن كورىپ ءجۇرمىن. ماعان ۇلدار دا, قىزدار دا حات جازىپ, كوكپار تارتۋدى ۇيرەتشى دەپ ءوتىنىپ جاتادى», دەيدى ەۆا جيگالينا.
«ەۆا. باتىر قىز» دەرەكتى دراماسى – تەمىربەك امانجولدىڭ العاشقى رەجيسسەرلىك قادامى. تەمىربەكتىڭ ءوزى دە تۇلپارمەن ءتۋريزمدى ناسيحاتتاپ, اتقا ءمىنۋ مادەنيەتىن زەرتتەپ ءجۇر. «ەۆانىڭ حيكاياسى – سالت-ءداستۇر, جىگەر مەن قۇرباندىق شيەلەنىسكەن الەمگە جەتەلەيتىن شىتىرمان ساياحات. وسىنداي قىم-قۋىت الەمدە نازىك جان اعىسقا قارسى ءجۇزىپ, ماحاببات پەن جالىننىڭ المايتىن قامالى جوعىن ايشىقتايدى», دەيدى ول.
«12 جىلدان بەرى جىلقى جانۋارىن فيلمدەرگە ءتۇسىرىپ, اتقا ءمىنۋ مادەنيەتىن, نەونوماديزمدى زەرتتەپ ءجۇرمىن. «ەۆا. باتىر قىز» فيلمىندە قازاقىلىقتىڭ فورمۋلاسىن پاش ەتكىم كەلەدى. ەلى بوتەن, ءدىنى بوتەن باسقا جۇرتتىڭ بالاسى نەلىكتەن وسى ويىنعا قۇمار بولىپ, بار ءومىرىن سارپ ەتۋگە سەرت بەردى؟ كوكپار مەن قامبار اتا جانۋارى نەسىمەن تارتىمدى؟ بۇل ءفيلمدى وسى سۇراققا جاۋاپ ىزدەيتىن زەرتتەۋ دەسەڭىز دە بولادى», دەيدى تەمىربەك امانجول.
ءفيلمنىڭ پوديۋسەرى دۋمان قوجاحمەتتىڭ ايتۋىنشا, بۇل تۋىندىنىڭ حالىقارالىق دەڭگەيگە شىعۋعا الەۋەتى مول. «قازىر بىرنەشە شەتەلدىك ستريمينگ-سەرۆيستەرمەن پروكات تۋرالى كەلىسسوزدەر ءجۇرىپ جاتىر», دەيدى ول.
دەرەكتى ءفيلمدى «Black & White Production» كومپانياسى مادەنيەت جانە سپورت مينيسترلىگىنىڭ تاپسىرىسىمەن جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن 2022 جىلى ءتۇسىردى.