قوناەۆ قالاسىندا جوسپارلانعان گريگوري لەپستىڭ كونتسەرتىنە بايلانىستى تۋىنداعان قوعام قارسىلىعى قازاق ەلىندە ەندى قىلاڭ بەرىپ كەلە جاتقان «قابىل الماۋ ادەبى» دەپ اتالاتىن جاڭا قۇبىلىستى قالىپتاستىرا باستاعانىن بايقاتتى. ادامزاتتى بەيبىتشىلىك پەن بىرلىككە الدىمەن ۇندەۋگە ءتيىس ونەر وكىلدەرى دەسەك, رەسەي ءانشىسىنىڭ ۋكرايناعا قاتىستى استامشىلىقپەن ايتقان ءبىر اۋىز ءسوزى باسىنا تاياق بولىپ ءتيىپ, الەۋمەتتىك جەلىنىڭ بەتىن جايپاپ وتكەن قوعامدىق پىكىردىڭ جويقىن كۇشى اقىرى ونى قازاق ساحناسىندا ءان ايتۋ قۇقىنان ايىرىپ, ەل شەتىنە اياعىن باستىرماي, قۋىپ تاستادى. جۇرگەن جەرى لاڭ لەپس ەندىگىدە ابايلاپ سويلەپ, اياقتى اڭداپ باسۋ كەرەگىن كوكەيىنە ءتۇيىپ كەتكەن بولار.
جالپى, ۋكرايناداعى سوعىس رەسەيدەگى تانىمال مەديا تۇلعالاردىڭ اراسىنا جىك ءتۇسىرىپ, «كىمنىڭ كىم» ەكەنىن ايقىنداۋعا كەلگەندە تاپتىرمايتىن «قۇرالعا» اينالدى. ازاماتتىق ۇستانىمى مەن قۇندىلىق قاعيداسى سايكەس كەلمەگەنى ءۇشىن وتانىن تاستاپ كەتۋگە ءماجبۇر بولعان ورىستىڭ ءار تانىمال تۇلعاسىنىڭ ارتىندا ءبىر ەسەككە ەمەس, عۇمىرىنا جەتەرلىك ايىپ پەن قارعىس, قوعامدىق قۋدالاۋ مەن ماتەريالدىق شىعىن ەڭسەسىنە سالماق سالۋدا. ونىڭ تاعى ءبىر مىسالى, وسى ەلدەگى بەلگىلى قانداسىمىز, كوپشىلىكتىڭ سۇيىكتىسىنە اينالعان سىقاق ونەرىنىڭ ساڭلاعى نۇرلان سابىروۆتىڭ ۋكراينا تاقىرىبىنداعى ورىنسىز ءازىلى ءۇشىن جەلى بەتىندە جۇندەي ءتۇتىلىپ, اقىرى اككاۋنتىن جاۋىپ, امەريكاداعى تۋر-ساپارىن توقتاتۋعا ءماجبۇر بولدى.
سالىستىرمالى تۇردە العاندا, ءبىزدىڭ ەلدە جاڭا ءۇردىس بولىپ باستالعانىمەن, سىرت ەلدەردە مۇنىڭ سان الۋان اتىشۋلى وقيعاسى بار. ار-نامىستى اياققا تاپتاۋ, ۇلتتى قورلاۋ, ازاماتتىق, ناسىلدىك كەمسىتۋگە جول بەرۋ, اينالاسىنان قىسىم كورۋ, تىلىنەن جازىپ, ارتىق ءسوز ايتۋدىڭ سوڭىن سيپاتتايتىن «حاراسسمەنت», «بۋللينگ», «ابيۋزمەنت» تەرميندەرىمەن قازىر ەكىنىڭ ءبىرى تانىس. ابايلاماعان ادام قاسىقتاپ جيناعان ابىرويىنان, دەنساۋلىعىنان, وتباسىنان, قىزمەتىنەن, ميلليون دوللارلىق جارناما كەلىسىمشارتتارىنان ءبىر-اق مەزەتتە ايىرىلىپ جاتىر. سوڭىنان تىزەرلەپ تۇرىپ كەشىرىم سۇراعانىمەن ءبارى دە كەش, ەلدىڭ ءبارى قاناتى كۇيىپ, كۇلدىڭ ىشىنەن قايتا كوتەرىلگەن فەنيكس قۇسى سياقتى سوتتان سوتقا جۇگىنىپ, سۇمدىقتىڭ وتى مەن توزاعىن كەشىپ ءجۇرىپ, ادىلدىك پەن ابىرويىن اقتاپ العان اتاقتى كينوجۇلدىز دجونني دەپپ ەمەس. جەڭىسكە قول جەتكىزىپ, اقتالعانىمەن الپاۋىت كومپانيالار ونىمەن بۇرىنعىداي جۇمىس ىستەگىسى كەلمەيدى, ءتيىمدى, قىمبات جوبانىڭ ءبارى ودان قيىس كەتىپ جاتىر.
دۇنيەجۇزىلىك قۇندىلىقتارعا شولۋ جاسايتىن WVS زەرتتەۋ جوباسى جۇرگىزگەن ناتيجەگە قاراعاندا, قازاقستاندىقتار ۇساق قۇقىق بۇزۋشىلارعا ءالى دە بولسا كوز جۇمىپ قارايدى ەكەن. ءتىپتى 77 مەملەكەت تۇرعىندارىنىڭ اراسىندا جۇرگىزىلگەن «بيلەتسىز جول جۇرۋگە قالاي قارايسىز؟» دەگەن قاراپايىم ساۋالعا قازاقستان رەسپوندەنتتەرى «قوياندى» اقتاپ الۋ جاعىنان جەتىنشى ورىننىڭ ناتيجەسىن كورسەتكەن. وسىنداي نازار اۋدارۋعا تۇرمايتىن ۇساق نارسەنىڭ ءوزى ۋاقىت وتە كەلە زاردابى اۋىر سوعاتىن اۋقىمدى قىلمىستارعا اۋىسۋى ابدەن مۇمكىن ەكەنىن ءبىلىپ تۇرىپ, كەي ادام جوق جەردەن وبال-ساۋاپتى ويلاي قالادى. ءتىپتى وتباسىنداعى زورلىق-زومبىلىق, تۇرمىستىق كيكىلجىڭدەردى تالقىلايتىن ەلدەگى ەڭ ءىرى تەلەارنالارداعى توك-شوۋلاردا ەكى تاراپتى تاتۋلاستىرعىسى كەلەتىن جۇرگىزۋشى «كەشىرىممەن قارايىق پا؟» دەپ كورەرمەنگە ساۋال تاستاسا, جۇماتاي سابىرجانوۆ ايتقانداي, «ادام دەيىن دەسەڭ, سياعى جوق, مال دەيىن دەسەڭ, تۇياعى جوق» زورلىقشىل قىلمىسكەرگە كەشىرىممەن قاراپ, جاقتاسىپ جاتادى. تەك تالانتتى بولعانى ءۇشىن, ەل الدىندا ونەردە جۇرگەن تانىمال تۇلعا بولعانى ءۇشىن عانا قىلمىسىن ەلەۋسىز قالدىرۋعا تىرىسىپ, باسىنان سيپاپ, جونىنە جىبەرەتىن دە ءبىزدىڭ ەل. ءارى قاراي قۇددى ەشنارسە بولماعانداي, قولايلى قىزمەتكە تۇياق ىلىكتىرتىپ, جايلى ءومىر سۇرۋىنە جاعداي جاساپ, لاجى بولسا, ءوسىپ, وركەندەۋىنە دە مۇددەلەس. مەملەكەت قازىناسىن ميلليونداپ جۇتىپ جاتقان جەمقورلاردىڭ ىلۋدە ءبىرى قاقپانعا ىلىگىپ, ءىسى سوتقا دەيىن جەتىپ جاتقانىن كورە تۇرا, اباقتىعا قيماي, اياۋشىلىق ءبىلدىرىپ, اقتاپ الۋعا يكەمدەلىپ تۇراتىنىن ءوزىمىز بولماساق, وزگە جۇرت قاۋاشاعىنا سالىپ قانشا شايقاسا دا, قابىلداي الماس.
جەكە تۇلعاعا تۇتقيىلدان جاسالاتىن شابۋىل كەزىندە ورە تۇرەگەلەتىن, قارجى مۇددەسىن كوزدەگەن «ساۋداگەر بوتتار توبى» كەيىنگى كەزدە بەلسەندى كۇش الدى. ازىن-اۋلاق تيىن-تەبەن, كەيدە قوماقتى اقشا ءۇشىن زاڭعا قايشى كەز كەلگەن ءىستى اقتاپ, ادىلدىك, اقيقاتتى شىمىرىكپەستەن اياقاستى ەتىپ بەرەدى. قوعامعا تىكەلەي قاۋىپ تۋعىزاتىن وسىلاردىڭ كەسىرىنەن جەلىدەگى جەڭىس, «قابىل الماۋ ادەبى» تولىق قۋاتىن تانىتۋعا قاۋقارسىز, قور بولىپ جاتادى.