استانا مەديتسينا ۋنيۆەرسيتەتىنىڭ تۇلەكتەرىنە ديپلوم تاپسىرۋ سالتاناتى «استانا وپەرا» تەاترىندا ءوتتى. ەندى مەديتسينا سالاسىنىڭ مايتالمانى بولۋعا نيەتتەنگەن مىڭنان استام تۇلەك ارمانىنا ءبىر تابان جاقىندادى دەۋگە بولادى.
سالتاناتتى ءىس-شارانىڭ اشىلۋىندا دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك تۇلەكتەرگە دەنساۋلىق ساقتاۋ ءمينيسترى اجار عينياتتىڭ قۇتتىقتاۋىن وقىپ بەردى.
– بۇگىنگى كۇن – استانا مەديتسينا ۋنيۆەرسيتەتى مەن ستۋدەنتتەردىڭ, اتا-انالارىنىڭ مەرەكەسى عانا ەمەس, بۇكىل جوعارى ءبىلىم بەرۋ جۇيەسىنىڭ سالتاناتى. دەنساۋلىق ساقتاۋ سالاسى ۇلت دەنساۋلىعى ءۇشىن ءوزىنىڭ كرەاتيۆتى جانە زاماناۋي ءتاسىلىن ەنگىزە الاتىن جاڭا جاس كادرلارمەن تولىقتىرىلىپ جاتىر. ۋنيۆەرسيتەتتىڭ تابىستى دامۋى ەلىمىزدىڭ ادامي كاپيتالىنىڭ وسۋىنە ودان ءارى ىقپال ەتەتىنىنە جانە وتاندىق دەنساۋلىق ساقتاۋدى قازىرگى زاماننىڭ بارلىق سىن-تەگەۋرىنىنە قارسى تۇرۋ ءۇشىن الەمدىك دەڭگەيگە شىعارۋعا مۇمكىندىك بەرەتىنىنە سەنىمدىمىن, – دەپ مينيستر اعىنان جارىلىپتى.
وسىدان سوڭ دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ قۇتتىقتاۋ سوزىندە ۇكىمەتتەن دەنساۋلىق ساقتاۋ سالاسىنا كورسەتىلىپ جاتقان قولداۋلار تۋراسىندا ايتىپ بەرگەن ەدى. ءيا, ۆيتسە-مينستر ايتقانداي, مەديتسينا سالاسىنداعى ۇلتتىق باعدارلامالار شەڭبەرىندە سالانىڭ ينفراقۇرىلىمىن ايتارلىقتاي جاڭارتۋعا, امبۋلاتوريالىق جانە ستاتسيونارلىق ەمدەۋ-پروفيلاكتيكالىق مەكەمەلەردى قايتا جاراقتاندىرۋعا, اقپاراتتاندىرۋعا, مەديتسينا قىزمەتكەرلەرىنىڭ جالاقىسىن وسىرۋگە مۇمكىندىك بەرىپ وتىر.
استانا مەديتسينا ۋنيۆەرسيتەتىنىڭ رەكتورى كامالجان نادىروۆ تا تۇلەكتەردى قۇتتىقتاپ, ءسات-ساپار تىلەدى.
– ديپلوم تاپسىرۋ ءراسىمى ۋنيۆەرسيتەت ءۇشىن عانا ەمەس, بۇكىل ەل ءۇشىن ماڭىزدى وقيعا دەپ بىلەمىز. سوندىقتان, تۇلەكتەر, ەستەرىڭىزدە بولسىن, ديپلوم – ساتتىلىكتىڭ كەپىلى ەمەس. جۇمىس بارىسىندا كۇن سايىن ىشتەي ەمتيحان تاپسىرىپ, ءوز ىستەرىڭنىڭ ناعىز بىلگىر مامانى ەكەندەرىڭدى ءالى تالاي دالەلدەۋلەرىڭ كەرەك. الدا ماماندىقتىڭ قيىن سىناقتارى تۇر. ەندى اق جەلەڭ كيگەن سوڭ, ار-نامىستان اتتاماي, اقتىعىن ساقتاۋ ماڭىزدى, – دەدى ك.نادىروۆ.
جىلدار بويى جيعان ءبىلىمىن وندىرىستە شىڭداۋعا بەكىنىپ وتىرعان تۇلەكتەر ۇستازدارىنا اق العىسىن جاۋدىردى. سالتاناتتى ءراسىمنىڭ كوڭىل تولقىتقان شاعى – تۇلەكتەر دارىگەر انتىن قابىلداعان ءسات.
اقپارات ءۇشىن ايتار بولساق, 1964 جىلدان باستاپ كۇنى بۇگىنگە دەيىن استانا مەديتسينا ۋنيۆەرسيتەتىندە 28 مىڭنان استام جاس دارىگەر ءبىلىم العان. بۇگىندە تۇلەكتەردىڭ الدى – ەلگە جانە شەتەلگە تانىمال ءوز ءىسىنىڭ بىلگىرلەرى.