قازاقستان پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ بۇۇ باس حاتشىسىنىڭ ورىنباسارى, بۇۇ تەرروريزمگە قارسى كۇرەس باسقارماسىنىڭ (تقكب) باسشىسى ۆلاديمير ۆورونكوۆپەن كەلىسسوز جۇرگىزدى.
كەزدەسۋگە سونداي-اق بۇۇ قاۋىپسىزدىك كەڭەسىنىڭ تەرروريزمگە قارسى كوميتەتى (بۇۇ تقك) اتقارۋشى ديرەكتوراتىنىڭ اتقارۋشى ديرەكتورى ناتاليا گەرمان قاتىستى.
تاراپتار وڭىرلىك قاۋىپسىزدىك, اۋعانستانداعى احۋال, «جۋسان» جانە «رۋسافا» قازاقستاندىق گۋمانيتارلىق وپەراتسيالارى, قازاقستاننىڭ بۇۇ تقكب جانە تقك-مەن ءوزارا ءىس-قيمىلىن تالقىلادى. سونداي-اق بۇۇ-نىڭ ورتالىق ازيا مەملەكەتتەرىنە تەرروريزمگە قارسى كۇرەس, زورلىق-زومبىلىق ەكسترەميزمنىڭ الدىن الۋ جانە وعان قارسى ءىس-قيمىل ماسەلەلەرى بويىنشا باعدارلامالىق قولداۋى ماسەلەلەرى ءسوز بولدى. كەزدەسۋدە الماتىدا بۇۇ-نىڭ ورتالىق ازيا ەلدەرى مەن اۋعانستاننىڭ ورنىقتى دامۋى جونىندەگى وڭىرلىك ورتالىعىن قۇرۋ جونىندەگى قازاقستان باستاماسى تالقىلاندى.
وسى كۇنى سىرتقى ىستەر مينيسترلىگىندە ۆەدومستۆونىڭ ەرەكشە تاپسىرمالار جونىندەگى ەلشىسى تالعات قاليەۆ پەن بۇۇ باس حاتشىسىنىڭ ورىنباسارى ۆ.ۆورونكوۆتىڭ توراعالىعىمەن قازاقستاندا اككرەديتتەلگەن ديپلوماتيالىق كورپۋس پەن حالىقارالىق ۇيىمداردىڭ وكىلدەرىنە ارنالعان بريفينگ ءوتتى. ءىس-شارا بۇۇ تەرروريزمگە قارسى كۇرەس باسقارماسىنىڭ جۇمىسى جانە ورتالىق ازيا مەملەكەتتەرىنە جاڭا سىن-تەگەۋرىندەر مەن قاۋىپ-قاتەرلەرگە قارسى تۇرۋعا كومەگى تۋرالى حاباردار بولۋدى ارتتىرۋعا باعىتتالعان.
بۇۇ-نىڭ جوعارى لاۋازىمدى وكىلدەرىنىڭ ساپارى 13-14 شىلدەدە استانادا وتەتىن قاۋىپسىزدىك جانە ىنتىماقتاستىق جونىندەگى ورتالىق ازيا فورۋمىنا قاتىسۋىنا ورايلاس ۇيىمداستىرىلدى.