ۇلتتىق مۋزەيدە سۋرەتشىلەر مەن ساۋلەتشىلەر وداعىنىڭ مۇشەسى, بەلگىلى قىلقالام شەبەرى بەرىك مولجىگىتتىڭ «مەنىڭ الەمىم» اتتى جەكە كورمەسى ءوتىپ جاتىر.
كورمەگە تالانتتى سۋرەتشىنىڭ 80-نەن استام كەسكىندەمەلىك جانە گرافيكالىق جۇمىسى قويىلعان. مۇندا اۆتور ءوزىنىڭ بالالىق شاعىنان باستاپ, تابيعات سۇلۋلىعى مەن ادامدار اراسىنداعى قاراپايىم قارىم-قاتىناس جانە قالاداعى ءوزىمىز بايقاي بەرمەيتىن قىم-قۋىت تىرشىلىكتى قىلقالام تىلىمەن كوركەم سويلەتە بىلگەن. كارتينالارىنىڭ بوياۋى قانىق, وبرازعا باي. اسىرەسە قىلقالام شەبەرىنىڭ «دالا كورريداسى», «بوتانيكالىق باق» اتتى تسيكلدى توپتاماسىنان باستاپ, «تەرەزە الدىندا», «كۇزگى تەرەك», «تۇنگى قالا», «ايلى ءتۇن», «كۇننىڭ باتۋى», «ەسكى جول», «اۆتوپورترەت», «جۋسان» سەكىلدى مايلى بوياۋمەن سالعان ەڭبەكتەرىنەن ونىڭ جان-دۇنيەسىنىڭ تازالىعى مەن ونەرگە دەگەن ادالدىعىن تاپ باسىپ تانيسىز. سونداي-اق تۋىندىگەردىڭ ادامدى قيال الەمىنە جەتەلەيتىن ساۋلەت ونەرىندەگى كومپوزيتسيالارى دا اسەمدىگىمەن كوز تارتىپ, باۋراپ اكەتەدى.
مادەني ءىس-شارانىڭ اشىلۋىندا تانىمال ساۋلەتشى سەرىك رۇستەمبەكوۆ پەن قوعام قايراتكەرى دارحان مىڭباي كورمە يەسىنىڭ سان قىرلى تالانتىنا توقتالىپ, ونىڭ كاسىبي ساۋلەتشىلىگى مەن سۋرەتشىلىگى تۋرالى ءسوز قوزعادى. سۋرەتشىلەر وداعى استانا قالاسىنداعى فيليالىنىڭ توراعاسى قوڭىر مۇحامەديەۆ جىلى لەبىزىن جەتكىزدى. بەلگىلى سۋرەتشى قاليوللا احمەتجان ارىپتەسىن ساۋلەت پەن بەينەلەۋ ونەرىندە ءوز قولتاڭباسى بار, ەرەكشە تالانت يەسى دەپ باعالادى.
ءىس-شارا سوڭىندا ءسوز العان بەرىك مولجىگىت كورمەگە 1993 جىل مەن 2013 جىل ارالىعىنداعى تۋىندىلارىنىڭ ەڭ تاڭداۋلىسى ۇسىنىلعانىن ايتتى.
«مەنەن كوپشىلىك ء«سىز سۋرەتشىسىز بە, الدە ساۋلەتشىسىز بە؟» دەپ سۇرايدى. شىنىمدى ايتسام, بويىمداعى ەكى ونەرىمدى «مىناۋ – ارتىق, اناۋ – كەم» دەپ بولە المايمىن. اركىم وزىنە ۇناعانىن كورەدى. ءارتۇرلى ستيلدە جۇمىس ىستەگەندى ۇناتامىن. ءبىر ستيلدە 10-15 جىل جۇمىس ىستەگەننەن كەيىن ونى ءارى قاراي جالعاستىرا المايمىن. قىسقاسى, كوڭىلىم نەنى قالايدى, سونى ىستەيمىن», دەپ كورمەگە كەلگەن قاۋىمعا ريزاشىلىعىن ءبىلدىردى.
كورمە 6 تامىزعا دەيىن جالعاسادى.