قوستاناي وبلىسىندا ەسىرتكى تاراتقان كۇدىكتى ۇستالدى

- «قاراسورا-2023» جەدەل-الدىن الۋ ءىس-شاراسى بارىسىندا پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى رۋدنىي قالاسىنىڭ 23 جاستاعى تۇرعىنىن ۇستادى. ول ەسىرتكىنى جاسىرىن ورىنعا قويىپ كەتۋ ارقىلى تاراتقان, - دەلىنگەن قوستاناي وبلىسى پد ءباسپاسوز قىزمەتى حابارلاماسىندا.

كۇدىكتىدەن «PvP» ەسىرتكىسىنىڭ 96 بايلامى تاركىلەنگەن. سونىمەن قاتار گاراجدى تەكسەرۋ كەزىندە سينتەتيكالىق ەسىرتكىنىڭ تاعى 65 ورامى تاركىلەندى. تاركىلەنگەن زاتتىڭ جالپى سالماعى 50 گرامنان اسادى. كۇدىكتى 10-15 جىلعا دەيىن باس بوستاندىعىنان ايىرىلۋى مۇمكىن.

قر قك-ءنىڭ 297-بابى بويىنشا سوتقا دەيىنگى تەرگەۋ باستالدى. الدىن الا مالىمەتتەر بويىنشا, كۋرەر ەسىرتكىنى Telegram كانال ارقىلى تاراتىپ, رۋدنىيعا عانا ەمەس, ليساكوۆسك قالاسىنا دا قويىپ كەتىپ وتىرعان.