پەتروپاۆل قالاسىنا ەنەرگەتيكا ءمينيسترى الماسادام ساتقاليەۆ كەلىپ, وبلىس باسشىلىعىمەن كەزدەسىپ, «سەۆكازەنەرگو» اق قارايتىن جەو-2-ءنى ارالاپ, بۇگىنگى تاڭداعى جۇمىس بارىسىمەن تانىستى.
وقىرمانداردىڭ ەسىنە سالا كەتەتىن بولساق, بىلتىرعى ناۋرىزدا وسى ورتالىقتىڭ ءبىر مۇرجاسى قۇلاپ, ءبىر ادام قازا تاۋىپ, بۇكىل قالا حالقىنىڭ الاڭداۋشىلىعىن تۋدىرعان. سودان بەرى قالا مەن وبلىسقا جىلۋ مەن جارىق بەرەتىن جالعىز كوز – جەو-2 جۇمىسى ۇكىمەت پەن وبلىس باسشىلىعىنىڭ نازارىندا. جۋىردا عانا وعان وبلىس اكىمى ايداربەك ساپاروۆ تا بارىپ, جاعدايىمەن تانىستى.
قازىر قۇلاعان مۇرجانى قالپىنا كەلتىرۋ جۇمىستارى جۇرگىزىلىپ جاتىر. كاسىپورىن جۇمىسىمەن تانىسقاننان كەيىن الماسادام ساتقاليەۆ وبلىس ورتالىعىنىڭ بەلسەندى تۇرعىندارىمەن, ءماسليحات دەپۋتاتتارىمەن س.مۇقانوۆ اتىنداعى وبلىستىق كىتاپحانادا كەزدەسىپ, جاعدايدى باياندادى جانە جينالعانداردى مازالاعان سۇراقتارعا جاۋاپ بەردى.
«بەلگىلى اپاتتان كەيىن مينيسترلىك پەتروپاۆلدىڭ جەو-2 ورتالىعىنا تاۋەلسىز ساراپ كوميسسياسىن جىبەرگەن ەدىك. ولار بارلىق تەحنيكالىق جاعدايدى انىقتاعاننان كەيىن ورتالىقتىڭ جۇمىسىن قالپىنا كەلتىرۋ بويىنشا جول كارتاسى دايىندالدى. ونى ىسكە اسىرۋعا 2022 جىلى 6,3 ملرد تەڭگە بولىنسە, بيىل تاعى دا 5,3 ملرد تەڭگە قاراستىرىلدى. بيىل جول كارتاسى بەس بلوكقا بولىنگەن. ولاردىڭ ءبارى جەو جۇمىسىن الدىمىزداعى جىلىتۋ ماۋسىمىنا ۋاقىتىلى, ساپالى دايىنداۋعا باعىتتالدى», دەدى مينيستر.
ءمينيستردىڭ سوزىنەن ءاربىر بلوكتىڭ اتقاراتىن جۇمىسى دا بەلگىلى بولدى. العاشقى بلوك قۇلاعان №1 مۇرجانىڭ ورنىن تەگىستەۋگە باعىتتالعان. ول جۇمىستار بيىل تولىق اياقتالىپ, جاڭا مۇرجانى قالاۋ جۇمىستارى باستالىپ كەتكەن. سونىمەن بىرگە وسى بلوكتا №2 مۇرجانى كۇردەلى جوندەۋدەن وتكىزۋ جانە №3 مۇرجانىڭ جاعدايىن تولىق زەرتتەۋ جۇمىستارى قامتىلعان.
جول كارتاسىنىڭ ەكىنشى بلوگى باس كورپۋستى تولىق قالپىنا كەلتىرۋ مەن №4 جانە 5-قازاندىقتاردىڭ قالىپتى جۇمىس ىستەۋىنە مۇمكىندىك بەرەتىن گازدىڭ №2 مۇرجاعا ءوتۋىن قامتاماسىز ەتەتىن ۋاقىتشا گاز قۇبىرىن سالۋدى جوسپارلاعان. قازىر بۇل جۇمىستار تولىق اياقتالىپتى. ءۇشىنشى بلوك بارلىق قازاندىق جانە قوسىمشا جاراقتاردى جوندەۋدى قامتىعان ەدى. قازىر №9 جانە 11 قازاندىقتاردى جوندەۋدەن باسقاسى تولىق اياقتالعان, ال وسى ەكەۋىندەگى جوندەۋ جۇمىستارى كەلەسى ايدىڭ اياعىندا اياقتالۋعا ءتيىستى. ەكى تۋربواگرەگاتتى كۇردەلى جوندەۋدەن وتكىزۋ جۇمىستارى ءتورتىنشى بلوكتا قامتىلعان. بۇگىندە ول جۇمىستار تولىق اياقتالعان.
بەسىنشى بلوكتىڭ جۇمىستارى بىلتىر قۇلاعان №1 مۇرجانى جاڭادان قالاۋدى قامتيدى. قازىر بۇل جۇمىس قىزۋ ءجۇرىپ جاتىر. ونى اياقتاۋ مەرزىمى 2024 جىلدىڭ 30 قىركۇيەگىنە بەلگىلەنگەن.
قازىر جاڭا مۇرجانىڭ ىرگەتاسىن قالاۋ جۇمىستارى اياقتالىپ قالدى. ودان ءارى تەمىر-بەتوننان قۇيىلاتىن مۇرجانىڭ ءوزىنىڭ قۇرىلىسى جالعاسادى. سونىمەن بىرگە ينۆەستيتسيالىق كەلىسىمدە كورسەتىلگەن №2 قازاندىقتىڭ قۇرىلىسىن جاڭعىرتۋ جۇمىستارىن جۇرگىزۋ دە جوسپارلانعان», دەدى ا.ساتقاليەۆ.
دەگەنمەن شارۋانىڭ ءبارى بەلگىلەنگەن سىزبامەن شوتقا قاققانداي تولىق جۇرگىزىلىپ جاتقان جوق. ءمينيستردىڭ ايتۋىنا قاراعاندا, №9 قازاندىقتى جوندەۋ جۇمىستارى سىزبادان ارتتا قالعان. ال №1 قازاندىقتى كۇردەلى جوندەۋ جۇمىستارىن ينۆەستور 2024 جىلعا شەگەرىپتى, بيىل تەك اعىمداعى جۇمىستاردى جاساماقشى. «جەو نەگىزگى جابدىقتارىنىڭ توزۋى 56 پايىزعا جەتكەندىكتەن كۇردەلى جوندەۋدى كەيىنگە قالدىرۋعا بولمايدى», دەدى مينيستر. سونىمەن بىرگە وبلىس اكىمدىگىنە كۇل توگەتىن الاڭنىڭ جاڭا سەكتسياسىن سالۋ ءۇشىن جەر ءبولۋدى تەزدەتۋ كەرەكتىگى ايتىلدى.
تۇرعىندارمەن بولعان كەزدەسۋدە ا.ساتقاليەۆ «سەۆكازەنەرگو» اق ەلەكتر قۋاتىن وندىرۋىنە ەڭ جوعارعى تاريفكە رۇقسات بەرىلگەنىن اتاپ ءوتتى. ناقتى ايتقاندا, ءبىر كۆت/ساعاتتىڭ بوساتىلۋ باعاسى – 16,47 تەڭگە. بۇل – بىلتىرعىمەن سالىستىرعاندا ءبىر جارىم ەسە ارتىق.
پەتروپاۆل