ەلوردا كۇنىندە كوپشىلىك «تولاعاي» الىپتار سايىسىن تاماشالادى. دۋى باسىم دوداعا ەل بىرىنشىلىگىندە, الەم چەمپيوناتىندا ونەر كورسەتىپ جۇرگەن سپورتشىلار قاتىستى. ياعني توپقا تۇسكەن جاۋىرىنى قاقپاقتاي ساڭلاقتاردىڭ قاي-قايسىسى دا جۇلدەدەن ءۇمىتتى ەدى. بايگەنىڭ اتى بايگە بولعان سوڭ, ۇزدىكتەردەن قارا ءۇزىپ شىققان وعلاندار توپ جاردى.
الىپتار سايىسىنىڭ اشىلۋ سالتاناتىنا استانا قالاسى اكىمىنىڭ ورىنباسارى ەسەت بايكەن, پارلامەنت ءماجىلىسىنىڭ دەپۋتاتتارى داۋلەت تۇرلىحانوۆ, قازىبەك يسا, سايىستىڭ وتۋىنە باستاماشى بولعان تەمىر سپاتاي ءسوز سويلەپ, توپقا تۇسكەن 15 جىگىتكە تابىس تىلەدى.
– ەلوردا كۇنى قارساڭىندا قالادا مادەني-سپورتتىق ءىس-شارالار ءوتىپ جاتىر. بۇگىنگى «تولاعاي» سايىسى – سونىڭ جالعاسى. الىپتار سايىسى – سالاماتتى ءومىر سالتىن ناسيحاتتايتىن كوپسايىستى تۋرنير. ەرەكشە جوبا بىلتىر جەتىسۋ وبلىسىنىڭ جاركەنت قالاسىندا ۇيىمداستىرىلعان ەدى. الىپتار سايىسى ەلوردا تورىندە العاش رەت وتكىزىلىپ وتىر. ايگىلى قاجىمۇقان مۇڭايتپاس ۇلى, بالۋان شولاق بابامىزدىڭ ءىزىن جالعاعان نار تۇلعالى دارابوزداردى تانىتاتىن جوبانىڭ جاڭعىرۋى – ءبىز ءۇشىن ۇلكەن جاڭالىق. سوندىقتان بۇل جوبا ءداستۇرلى تۇردە وتەتىن سايىستاردىڭ قاتارىنا قوسىلسىن دەيمىز. الىپتار سايىسىندا كىل مىقتىلار دارا شىقسىن,– دەدى قالا اكىمىنىڭ ورىنباسارى ەسەت بايكەن.
بىلەكتىلەر سايىستىڭ 5 ءتۇرى بويىنشا سىنعا ءتۇستى. اۋەلى دارابوزدار 1 مينۋتتا 141 كيلو تاستى 10 مەتر قاشىقتىققا اپارۋعا بەكىندى. ياعني مۇندا جۇپ-جۇمىر تاستى كىم الىس قاشىققا اپارسا, سول – جەڭىمپاز. ەكىنشى, 10 كيلو نايزانى 10 مەتر قاشىقتىققا لاقتىرۋدان سىناستى. ءۇشىنشى, 130 كيلولىق بورەنەنى يىققا اسىپ, وتىرىپ-تۇرۋعا ءتيىس بولدى. ءتورتىنشى, كولەمى 1,5 مەتر تەمىردى جەلكەگە قويىپ, قولمەن مايىستىرۋى كەرەك. ەرەجەگە ساي, بىلەكتىلەر سوڭعى سايىستا جارتى توننالىق اربانى 1 مينۋتتا مەيلىنشە ۇزاققا سۇيرەۋگە تىرىستى. الىپتار سايىسىن باس تورەشى ەركىن مۇقاش ۇلى باستاعان قازىلار باعالادى. ارينە, تارتىستى ءتۋرنيردى تاماشالاۋعا كەلگەن كوپشىلىك قازاق كۇرەسى, قول كۇرەسىنىڭ شەبەرلەرى جانە زىلتەمىر كوتەرۋدەن شىنىققان وعلاندار جەكەلەگەن سايىستاردا الدىنا قارا سالمايدى دەپ توپشىلاسا كەرەك. الايدا الاماننىڭ ەرەكشەلىگى سول, تەك بەس سايىس بويىنشا توپ جارعاندار عانا جۇلدەلى بولدى.
سونىمەن, جارىس قورىتىندىسى بويىنشا ارىس قالاسىنان كەلگەن ازامات ماقۇلبەكوۆ الدىنا قارا سالماي, كوش باستادى. ەسكە سالايىق, ازامات وسىعان دەيىن سۇلتان بايبارىستىڭ 800 جىلدىق مەرەيتويىنا وراي ۇيىمداستىرىلعان الىپتار سايىسىندا كۇمىس جۇلدەنى ەنشىلەگەن. جەڭىمپاز 1 ملن تەڭگە اقشالاي سىيلىق يەمدەندى. ەكىنشى ورىن قوناەۆ قالاسىنىڭ سپورتشىسى فايد تەڭىزباەۆقا بۇيىرىپ, ول 600 مىڭ تەڭگە قارجىلاي سىيلىق الدى. ءفايدتىڭ دە سايىستان حابارى بارىن, وسىعان دەيىن قوناەۆ قالاسىندا وتكەن الىپتار سايىسىندا توپ جارعانىن ايتا كەتكەنىمىز ءلازىم. ۇزدىك ۇشتىكتى شىمكەنت قالاسىنىڭ تۋماسى نۇرعيسا ادىلەت ۇلى تۇيىندەپ, 400 مىڭ تەڭگە قارجىلاي سىيلىقتى قانجىعالادى. بىلسەڭىزدەر, نۇرعيسا دا قاراجاياۋ ەمەس, ول – اۋىر اتلەتيكادان ەلدىڭ ەڭبەك سىڭىرگەن سپورت شەبەرى, الەم, ازيا چەمپيوناتىنىڭ جۇلدەگەرى.