وسكەمەندە كوللەدج وقۋشىسىن سوققىعا جىققان قىزدار سوتتالدى

بۇل ءىس بويىنشا 14 قىز تەرگەۋگە الىنىپ, ءۇش بويجەتكەن ايىپتالۋشى دەپ تانىلعان.

شىعىس قازاقستان وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى كامەلەتكە تولماعان قىزدارعا قاتىستى قىلمىستىق ءىستى قر قىلمىستىق كودەكسىنىڭ 293-بابى 2-بولىگىنىڭ 1-تارماعى (الدىن الا ءسوز بايلاسۋ ارقىلى ادامدار توبى بۇزاقىلىق جاساۋ) قر قك 194-بابى 2-بولىگىنىڭ 1,2-تارماعى (كۇش قولدانۋ, ادامدار توبى الدىن الا ءسوز بايلاسۋى ارقىلى بوپسالاۋ) بويىنشا جۇرگىزگەن ەدى.

ناتيجەسىندە, كۇدىكتى دەپ تانىلعان 2 بويجەتكەندى ءۇش جىلعا باس بوستاندىعىنان ايىرۋ جازاسى, ال ءۇشىنشى قىزعا ءبىر جىلعا باس بوستاندىعىنان شەكتەۋ جازاسى تاعايىندالدى.

«سوت ءىستىڭ ءمان-جايىن جانە كۇدىكتى تاراپتىڭ جەكە باسىن, جابىرلەنۋشىلەردىڭ پىكىرلەرىن, قۇقىققا قايشى ارەكەتتەردىڭ سيپاتىن ەسكەرە وتىرىپ ا جانە ت ەسىمدى كۇدىكتى قىزدارعا قر قك 293-بابى 2-بولىگىنىڭ 1-تارماعى بويىنشا 1 جىل باس بوستاندىعىن شەكتەۋ, قر قك 194-بابى 2-بولىگىنىڭ 1,2-تارماقتارى بويىنشا ءۇش جىل مەرزىمگە باس بوستاندىعىنان ايىرۋ تۇرىندە جازا تاعايىندادى, تۇپكىلىكتى جازا قر قك 293-بابى 2-بولىگىنىڭ 1-تارماعىنا سايكەس ءۇش جىلعا باس بوستاندىعىنان ايىرۋ. ال و ەسىمدى كۇدىكتىنى ءبىر جىل مەرزىمگە باس بوستاندىعىن شەكتەۋ تۇرىندە جازا تاعايىندالدى», دەلىنگەن سوت حابارلاماسىندا.

سونداي-اق جابىرلەنۋشىنىڭ پايداسىنا 9 000 000 تەڭگە سوماسىندا مورالدىق زياندى وتەۋ وندىرىلگەنىن اتاپ ءوتتى.

ۇكىم زاڭدى كۇشىنە ەنگەن جوق.