استانا قالاسىنىڭ 25 جىلدىعىنا وراي «ناز» مەملەكەتتىك بي تەاترىنىڭ «قازاق جادىگەرلەرى» اتتى مەرەكەلىك كونتسەرتى ءوتتى.
«ناز» مەملەكەتتىك بي تەاترىنىڭ قالىپتاسۋى باس قالامەن تىكەلەي بايلانىستى. سەبەبى تەاتر ەلوردا ارقا توسىنە كوشكەننەن كەيىن قۇرىلدى. سودان بەرى ونەر ورداسى استانامەن بىرگە دامىپ, رۋحاني كەمەلدەنىپ كەلەدى.وسى جىلدار ىشىندە ونەر ۇجىمى ەلىمىز بەن باس شاھاردىڭ مەرەيىن شەت مەملەكەتتەردە تالاي مارتە اسىردى.تەاتر رەپەرتۋارىنداعى قايتالانباس قويىلىمدار مەن كونتسەرتتىك باعدارلامالار ارقىلى شەتەلدىك كورەرمەندەرگە قازاق بي ونەرىنىڭ ەرەكشەلىگىن تانىتتى.
ەلوردا مەرەكەسىنە ارنالعان كونتسەرتتە ونەر ۇجىمى قازاقتىڭ سالت-ءداستۇرىن پاش ەتەتىن «تۇساۋكەسەر», ء«سۇيىنشى», «سەكىرتپە», «قايىم ايتىس», «كوڭىلاشار» سەكىلدى ەرەكشە قويىلىمداردى تارتۋ ەتتى. سونىمەن بىرگە قازاق جىگىتتەرىنىڭ باتىرلىعىن, ورلىگىن, قايسارلىعىن بەينەلەيتىن «تاۋ ۇلى» تۋىندىسى تەاتردىڭ بەتكە ۇستار قويىلىمى ەكەنىنە كوزىمىز جەتتى. ال قازاق قىزىنىڭ نازىكتىگىن, سۇلۋلىعىن ايشىقتاعان «نازبيكە», «ىڭكار سەزىم», «اققۋ», «سەرپىن» بيلەرى كورەرمەندى بىردەن باۋرادى. سونداي-اق كونتسەرتتە تەاتر انشىلەرى, حالىقارالىق جانە رەسپۋبليكالىق بايقاۋلاردىڭ لاۋرەاتتارى ءباتيما يزەناەۆا, زاعيپا يمانعازيەۆا, ايسۇلتان باسىقارا اۋەلەتىپ ءان سالىپ, تىڭداۋشىلاردىڭ ىقىلاسىنا بولەندى.
ءبىر سوزبەن ايتقاندا, استانامەن بىرگە كوركەيىپ, ارناسى كەڭەيگەن «ناز» مەملەكەتتىك بي تەاترىنىڭ حالقىمىزدىڭ كونە داۋىردەن بۇگىنگە جەتكەن ۇلتتىق قۇندىلىقتارىن حورەوگرافيا تىلىندە جەتكىزگەن ەرەكشە فورماداعى قويىلىمى كوڭىلىمىزدەن شىقتى.