2013 جىلى اقپارات ايدىنىنا قوسىلىپ, سول ۋاقىتتان بەرى قازاق سپورتىنىڭ جارشىسىنا اينالعان «Qazsport» تەلەارناسىنا بيىل 10 جىل تولدى. وسى مەرەيلى كۇنگە وراي «قازاقستان» تەلەراديوكورپوراتسياسى ەلوردادا Open Air فورماتىندا مەرەكەلىك ءىس-شارا وتكىزدى. وعان اقپارات جانە قوعامدىق دامۋ ءمينيسترى دارحان قىدىرالى, مادەنيەت جانە سپورت ءمينيسترى اسحات ورالوۆ, پارلامەنت دەپۋتاتتارى, فەدەراتسيا وكىلدەرى مەن سپورتشىلار قاتىستى.
«Qazsport» تەلەارناسى «قازاقستان» رەسپۋبليكالىق تەلەراديوكورپوراتسياسىنىڭ قۇرامىنان 2013 جىلدىڭ 1 شىلدەسىنەن باستاپ كورەرمەنگە جول تارتقان بولاتىن. وسى ۋاقىت ارالىعىندا ارنانىڭ حابار تاراتۋ كولەمى 66 723 ساعاتقا جەتىپ, كورەرمەن نازارىنا 15 مىڭ ترانسلياتسيا ۇسىنعان.
اقپارات جانە قوعامدىق دامۋ ءمينيسترى دارحان قىدىرالى ەلىمىزدەگى تۇڭعىش سپورت تەلەارناسىن العاشقى بەلەسىمەن قۇتتىقتاي وتىرىپ, بيىل سپورت جۋرناليستيكاسىنا ەرەكشە كوڭىل بولىنگەنىن اتاپ ءوتتى.
«Qazsport» 10 جىلدىڭ ىشىندە ۇلكەن بەلەستەن ءوتتى. سپورتتىق جارىستاردى تاراتىپ قانا قويماي, سپورتتىق رۋحتىڭ بايراعىنا اينالدى. ءبىز سپورت جۋرناليستيكاسىنا ەرەكشە كوڭىل ءبولىپ وتىرمىز. بيىلعى «تۇمار» بايگەسىنە تۇڭعىش رەت سپورت جۋرناليستيكاسى بويىنشا اتالىم قوسىلدى. ارامىزدان ەرتە كەتكەن امانگەلدى سەيىتحان اتىنداعى اتالىمعا لايىق ماماندار وسى تەلەارنادان دا شىعادى دەگەن ويدامىن», دەدى مينيستر.
ال مادەنيەت جانە سپورت ءمينيسترى اسحات ورالوۆ ءپاتريوتيزمدى دامىتۋدا وتاندىق سپورتتىڭ ءرولى ەرەكشە ەكەنىن ايتتى.
ء«پاتريوتيزمدى دامىتۋدا سپورتتىڭ ورنى ەرەكشە. كوك تۋىمىزدى جەڭىس تۇعىرىنان جەلبىرەتەتىن دە, ءانۇرانىمىزدى شىرقاتاتىن دا ءبىزدىڭ سپورتشىلار. ال ولاردىڭ جەڭىسىن «Qazsport» تەلەارناسى ارقىلى ناسيحاتتاپ, جاس بۋىننىڭ بويىنا وتانسۇيگىشتىك قاسيەتتى دارىتامىز. 10 جىلدىقتارىڭىز قۇتتى بولسىن!», دەدى ول.
مەرەكەلىك كەشكە وليمپيا ويىندارىنىڭ جۇلدەگەرى داۋلەت تۇرلىحانوۆ, بوكستان وليمپيادا چەمپيونى سەرىك ساپيەۆ, بوكستان الەم چەمپيونى سانجار تاشكەنباي, اۋىر اتلەتيكادان ءتورت دۇركىن الەم چەمپيونى يليا يلين, شورت-ترەكتەن الەم كۋبوگىنىڭ جۇلدەگەرى ابزال اجىعاليەۆ, كوركەم گيمناستيكادان حالىقارالىق دارەجەدەگى سپورت شەبەرى اننا اليابەۆا قاتىسىپ, «Qazsport» ارناسىن مەرەيتويىمەن قۇتتىقتادى.
جيىندا «قازاقستان» تەلەراديوكورپوراتسياسىنىڭ باسقارما ءتورايىمى ءلاززات تانىسباي ارنانىڭ بۇگىنگى باعىت-باعدارى مەن الداعى جوسپارلارى تۋرالى اتاپ ءوتتى.
«10 جىل ىشىندە ارنا سپورت جۋرناليستەرىنىڭ, سپورت كوممەنتاتورلارىنىڭ ۇستاحاناسىنا اينالدى, ولاردىڭ كاسىبي شىڭدالۋىنا زور ۇلەس قوستى. «Qazsport» ارناسىنىڭ نەگىزگى ماقساتى – وتاندىق كورەرمەندەردى رەسپۋبليكالىق, حالىقارالىق, الەمدىك جارىستاردىڭ ترانسلياتسياسىمەن قامتۋ, سونىمەن قوسا قازاقستاندىقتاردى سالاۋاتتى ءومىر سالتىنا باۋلي وتىرىپ, كىشكەنتاي كورەرمەندەرىمىزدىڭ اراسىنان سپورت جۇلدىزدارىنىڭ, بولاشاق چەمپيونداردىڭ شىعۋىنا ىقپال ەتۋ. الدا سپورت جانكۇيەرلەرىنە بيىلعى XIX جازعى ازيا ويىندارىن, كەلەسى جىلعى XXXIII جازعى وليمپيا ويىندارىن, فۋتبولدان 2024 جىلعى ەۋروپا چەمپيوناتىن كورسەتۋ بويىنشا كەلىسسوزدەر جۇرگىزىلىپ جاتىر», دەدى باسقارما ءتورايىمى.
قازىرگى تاڭدا «Qazsport» تەلەارناسى تاۋلىگىنە 18 ساعات حابار تاراتادى. تەلەارنا سپورتتىق ترانسلياتسيالاردان بولەك, «Sport Review» اقپاراتتىق-ساراپتامالىق باعدارلاماسىن,«Qazsport الاڭى» توك-شوۋىن, ەل فۋتبولىنا ارنالعان «دوپ دودا», «تۋر پو تۋرۋ», «Pro Football» جوبالارىن, حوككەيگە ارنالعان «Pro Hockey», ۆولەيبول سپورتىنا باعىتتالعان «س volley ك پوبەدە», كاسىپقوي بوكس باعىتىنداعى «The Ring», سپورتتىڭ ءار ءتۇرىن قامتيتىن «جۇيرىكتەر جولى» جوبالارىن تۇراقتى تۇردە كورسەتىپ كەلەدى.