بۇگىن سەگىزىنشى سايلانعان پارلامەنتتىڭ ءبىرىنشى سەسسياسى رەسمي تۇردە جابىلدى. دەپۋتاتتار 1 قىركۇيەككە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى, دەپ حابارلايدى Egemen.kz.
«بۇگىن ءبىز سەگىزىنشى سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىنىڭ جۇمىسىن اياقتاپ, قورىتىندىلاپ وتىرمىز. اتقارعان قىزمەتىمىزدىڭ ناتيجەسىن ءداستۇر بويىنشا تۇيىندەپ, بولاشاققا جوسپارىمىزدى ناقتىلاپ الۋىمىز قاجەت. وتكەن جىلى قازاقستان حالقى بۇكىلحالىقتىق رەفەرەندۋمدا پرەزيدەنت رەفورمالارىن قولدادى. ەلىمىزدىڭ جاڭارعان كونستيتۋتسياسى بۇكىل مەملەكەتتىك جۇيە بويىنشا اۋقىمدى وزگەرىستەرگە جول اشتى. سۋپەرپرەزيدەنتتىك جۇيەدەن پرەزيدەنتتىك رەسپۋبليكا ۇلگىسىنە كوشتىك», دەدى ەرلان قوشانوۆ.
وسى ورايدا ول پارلامەنتتىڭ ءرولى مەن مارتەبەسى كۇشەيگەنىن اتاپ ءوتتى. ەل باسقارۋ ىسىنە حالىقتىڭ اتسالىسۋ بەلسەندىلىگى ارتا ءتۇستى. ازاماتتاردىڭ قۇقىعىن قورعاۋدىڭ كونستيتۋتسيالىق تەتىكتەرى نىعايتىلدى.
«سەنات پەن ءماجىلىس سايلاۋى ەلدەگى ساياسي جاڭعىرۋدىڭ شەشۋشى كەزەڭىنە اينالدى. زاڭ شىعارۋشى ورگان تولىعىمەن قايتا قۇرىلدى. سەناتتىڭ قۇرىلىمى وزگەردى. قازاقستان حالقى اسسامبلەياسى سەناتتا ءوز مانداتتارىن الدى. ماجىلىسكە العاش رەت 6 ساياسي پارتيا سايلاندى. وسىعان دەيىن ۇزاق ۋاقىت بويى وپپوزيتسيادا بولعان پارتيا پارلامەنتكە ءوتتى», دەدى ءماجىلىس توراعاسى.
سونداي-اق ول بۇل جولعى سايلانىم قازاقستان تاريحىنداعى ەڭ كوپ پارتيالى پارلامەنت ەكەنىن ايتتى.ء ماجىلىس ءتۇرلى كوزقاراستار مەن ساياسي كۇشتەر توعىسقان الاڭعا اينالدى. حالىق قالاۋلىلارىنىڭ جاڭا تولقىنى كەلدى.
ء«ماجىلىس قۇرامى ۇزاق جىلدان بەرى العاش رەت ءبىرمانداتتى وكرۋگتەن سايلانعان, شىنايى ءارى تارتىستى باسەكەدە وزىپ شىققان دەپۋتاتتارمەن تولىقتى. سونىمەن قاتار ايەلدەر مەن ەرەكشە قاجەتتىلىگى بار ادامداردىڭ جانە جاستاردىڭ قاتارى كوبەيدى», دەدى ە.قوشانوۆ.