ەلوردا تورىندە ايتۋلى ونەر وقيعاسى – «وپەراليا» حالىقارالىق فەستيۆالى شىمىلدىق ءتۇردى. «استانا وپەرانىڭ» 10 جىلدىق مەرەيتويىنا وراي ۇيىمداستىرىلعان اۋقىمدى شارا اياسىندا تەاتر ساحناسىندا ءبىر اي بويى الەمنىڭ 12 ەلىنەن كەلگەن اتاقتى ارتىستەر ونەر كورسەتەدى, سونداي-اق جۇرتشىلىق نازارىنا زاماناۋي ينتەرپرەتاتسياداعى وپەرانىڭ پرەمەراسى ۇسىنىلادى.
فەستيۆالدىڭ سالتاناتتى اشىلۋىندا «استانا وپەرا» تەاترىنىڭ ديرەكتورى عالىم احمەدياروۆ ونىنشى مەرەيتويلىق ماۋسىمدى اتاقتى فەستيۆالمەن قورىتىندىلاۋ – تەاتردىڭ بارلىق ۇجىمى ءۇشىن ۇلكەن مارتەبە ەكەنىن اتاپ ءوتتى.
– بيىلعى «وپەراليانىڭ» اۋقىمى وتە كەڭ. ونىڭ اياسىندا وپەرالىق جانە بالەتتىك قويىلىمدار, سيمفونيالىق كونتسەرتتەر ۇسىنىلادى. فەستيۆال وتەتىن كۇندەرى كورەرمەندەرىمىزدى تانىمال تۇلعالاردىڭ قاتىسۋىمەن وپەرالىق جانە بالەتتىك سپەكتاكلدەر كالەيدوسكوپى, ايگىلى كومپوزيتورلاردىڭ ۇلتتىق جانە شەتەلدىك تۋىندىلارى ەنگەن اۋقىمدى كونتسەرتتىك باعدارلامالار, سونداي-اق «قۇرمانعازى» وپەراسىنان سيمفونيالىق سيۋيتانىڭ پرەمەراسى كۇتەدى. ءبىز حالىقتىڭ رۋحىن كوتەرگىمىز كەلەدى, سەبەبى الەمدى باسقا جاعىنان اشا الاتىن عالامات كۇش تەك ونەردە عانا بار. سول ءۇشىن بىرقاتار قايىرىمدىلىق اكتسياسىن وتكىزەمىز, سپەكتاكلدەرگە از قامتىلعان وتباسىلاردى, زەينەتكەرلەردى, بالالار ۇيلەرىنىڭ تاربيەلەنۋشىلەرىن جانە حالىقتىڭ باسقا دا الەۋمەتتىك وسال توپتارىن شاقىردىق, – دەدى عالىم احمەدياروۆ.
فەستيۆالدىڭ رەسمي سالتاناتتى اشىلۋى الدىندا تەاتر فويەسىنە كەلگەن كورەرمەندەر تەاترلاندىرىلعان قويىلىم مەن ونەر جۇلدىزدارى شەرۋىنىڭ كۋاسى بولدى. قىزىل كىلەممەن وپەرا جانە بالەت ساحناسىنىڭ ارتىستەرى, اتاقتى رەجيسسەرلەر, ديريجەرلەر, الەمدىك بالەت جۇلدىزى التىناي اسىلمۇراتوۆا, تانىمال حالىقارالىق كوۋچ اللا سيمونيشۆيلي, يتاليالىق سۋرەتشى مانانا گۋنيا مەن باسقا دا شىعارماشىلىق زيالى قاۋىم وكىلدەرى ءجۇرىپ ءوتتى.
فەستيۆالدىڭ سالتاناتتى اشىلۋىندا زالدا ينە شانشىر ورىن بولمادى. لىق تولى زال «استانا وپەرا» مەن «استانا بالەت» سەكىلدى بىردەن ەكى شىعارماشىلىق ۇجىمدى قارسى الدى. قوس ۇجىم بىرىگىپ زامانىمىزدىڭ ءبىرتۋار حورەوگرافى يرجي كيلياننىڭ ءبىر اكتىلى سپەكتاكلدەرىنىڭ ۇشتىگىن ۇسىندى. اتاپ ايتساق, ءبىرىنشى ءبولىمدى «جولدان تايعاندار» بالەتى اشسا, ەكىنشى بولىمدە ەلوردا تۇرعىندارى مەن قوناقتارىنىڭ نازارىنا «التى بي» مەن «كىشى ءولىم» ۇسىنىلدى. اتالعان قوس قويىلىم دا «استانا وپەرا» رەپەرتۋارىنداعى جاڭادان قويىلعان ۇزدىك بالەتتەر قاتارىندا.
– قالىپتاسقان تەاترلىق ءداستۇر بويىنشا فەستيۆالدەر جاڭا ءارى قىزىقتى دۇنيەمەن اشىلۋعا ءتيىس. حالىقارالىق فەستيۆال باعدارلاماسىن قۇرۋ كەزىندە بىزدە ءۇش كورىنىستى, اتاپ ايتساق «التى ءبيدى», «استانا بالەت» تەاترىنىڭ سپەكتاكلى «جولدان تايعانداردى» جانە ءبىزدىڭ تەاتردىڭ جۋىرداعى پرەمەراسى «كىشى ءولىمدى» ءبىر بالەت كەشىنە بىرىكتىرۋ يدەياسى تۋدى. ونەرگە قىزىعۋشىلىقپەن قارايتىن, ءار جەردە كورسەتىلە بەرمەيتىن سيرەك قويىلىمداردى تاماشالاۋ ءۇشىن كەيدە باسقا ەل, وزگە قالاعا بارۋعا ءماجبۇر بولاتىن كوپشىلىك ءۇش بالەتتى ءبىر ۋاقىتتا ءبىر تەاتردا تاماشالاي الادى. فەستيۆالدىڭ اشىلۋى سونىسىمەن ەرەكشە بولدى عوي دەپ ويلايمىن, – دەدى الەمدىك ساحنا جۇلدىزى, «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا.
«التى بي», «جولدان تايعاندار», «كىشى ءولىم» دەپ اتالاتىن ايتۋلى ءۇش سپەكتاكل دە «اق-قارا» بالەتتەر توپتاماسىنا كىرەدى. ءبىرىنشى ءبولىمدى اشىپ بەرگەن «جولدان تايعاندار» بالەتى يرجي كيلياننىڭ حورەوگرافياسى مەن ستيۆەن رايحتىڭ بارابانعا ارنالعان كومپوزيتسياسىنىڭ ءبىر ارناعا توعىسۋىنىڭ ۇزدىك ۇلگىسىن پاش ەتتى. سپەكتاكل سەگىز بالەرينانىڭ تاڭعالدىرارلىق شارىقتاۋ ءساتىن قامتيدى. ال قالعان ەكى سپەكتاكل ەكىنشى بولىمدە ورىندالدى. ۆ.ا.موتسارتتىڭ مۋزىكاسىنا قويىلعان بۇل بالەتتەر دە سيۋجەتسىز نەگىزدەن تۇرادى. شەبەردىڭ وسىناۋ كەمەڭگەر جۇمىستارىن كورەرمەن ءاردايىم ك ۇلىپ, سونىمەن بىرگە كوزدەرىنە جاس الا وتىرا تاماشالايدى. سەبەبى وندا ادام ءومىرىنىڭ تەرەڭ ءپالساپاسى جاتىر.
فەستيۆالدىڭ تاعى ءبىر ەرەكشەلىگى – Astana Opera حالىقارالىق وپەرا اكادەمياسىنىڭ العاشقى تۇلەكتەرى دايىنداعان «الجيردەگى يتاليالىق قىز» وپەراسىنىڭ تۇساۋى كەسىلەدى.
– مەرەيتويلىق ماۋسىمدا تاعى ءبىر ايتۋلى وقيعا بولادى. جۋىردا Astana Opera حالىقارالىق وپەرا اكادەمياسىنىڭ العاشقى تۇلەكتەرى قانات قاعادى. ولار اكادەميادا ەكى جىل ءبىلىم الدى. وسىناۋ از عانا مەرزىم ىشىندە جاس ارتىستەر ۇلكەن ناتيجە كورسەتتى, كوپتەگەن بەدەلدى بايقاۋلاردىڭ لاۋرەاتتارى اتاندى. قازاقستاننىڭ جانە شەتەلدىڭ جەتەكشى ساحنالارىندا ونەر كورسەتتى. فەستيۆال اياسىندا اكادەميستەر «الجيردەگى يتاليالىق قىز» وپەراسىنىڭ پرەمەراسىن ۇسىنادى, – دەپ اتاپ ءوتتى تەاتر ديرەكتورى ع.احمەدياروۆ.
بيىلعى «وپەراليا» باعدارلاماسىنا ارمەنيا, قازاقستان, يتاليا, بولگاريا, موڭعوليا, قىتاي, وڭتۇستىك كورەيا, گەرمانيا, رەسەي, وزبەكستان, قىرعىزستان جانە تاجىكستان سەكىلدى الەمنىڭ 12 ەلىنەن شاقىرىلعان ارتىستەر مەن ديريجەرلەر قاتىسادى. جالپى, فەستيۆالدە 4 گراند-وپەرا كورسەتىلەدى, ولار – دج.ۆەرديدىڭ «دون كارلوسى» مەن «ايداسى», دج.ءروسسينيدىڭ «الجيردەگى يتاليالىق قىز» وپەراسىنىڭ پرەمەراسى جانە دج.ءپۋچچينيدىڭ «تۋراندوتى». ءار وپەرا سوليستەردىڭ ءتۇرلى قۇرامىمەن ەكى رەتتەن ورىندالادى. سونداي-اق كوپشىلىكتىڭ نازارىنا ۇسىنۋعا 2 بالەت دايىندالدى, ولار – ر.رەبەكتىڭ حورەوگرافياسىندا س.پروكوفەۆتىڭ «كۇلبيكە» قويىلىمى مەن «ي.كيلياننىڭ بالەت كەشتەرى». بۇدان بولەك, كورەرمەندەرگە 4 كونتسەرت ۇسىنىلادى. اتاپ ايتساق, قازاقستان رەسپۋبليكاسى پرەزيدەنتتىك وركەسترى حالىقتىق مۋزىكا ءانسامبلىنىڭ «سەرپىن» مۋزىكالىق كەشى, شىۇ ەلدەرىنەن شاقىرىلعان سوليستەردىڭ قاتىسۋىمەن وتەتىن گالا-وپەرا, «جىل ون ەكى اي» كامەرالىق مۋزىكا كونتسەرتى. سونىمەن قاتار «وپەراليانىڭ» جانە «استانا وپەرانىڭ» ح مەرەيتويلىق ماۋسىمىنىڭ جابىلۋىنا وراي سيمفونيالىق كونتسەرت وتەدى. وندا العاش رەت ا.جۇبانوۆ پەن ع.جۇبانوۆانىڭ «قۇرمانعازى» وپەراسىنان الىنعان تاقىرىپتارعا سيمفونيالىق سيۋيتا شىرقالادى.