ەسىل وزەنىنىڭ جاعالاۋىندا ورنالاسقان قالالىق امفيتەاتر ساحناسىندا ەسىرتكىگە قارسى كۇرەس كۇنىنە وراي قالانىڭ شىعارماشىلىق ۇجىمدارى كونتسەرت قويدى, دەپ حابارلايدى Egemen.kz استانا اكىمدىگىنىڭ ءباسپاسوز قىزمەتىنە سىلتەمە جاساپ.
سالاۋاتتى ءومىر سالتىن ناسيحاتتاۋ ماقساتىندا ءتۇرلى پروفيلاكتيكالىق ءىس-شارامەن قاتار استانادا «دەنىڭ ساۋ بولۋ – ساندە» اتتى كونتسەرت وتكىزىلدى.
«جىل سايىن ءارتۇرلى ەسىرتكى زاتتارىنىڭ سانى ارتىپ كەلەدى. ولار كوپشىلىككە قولجەتىمدى ءارى كەڭ تارالىپ جاتىر. ەسىرتكى – ءومىر ءسۇرۋ ۇزاقتىعىن قىسقارتاتىن, فيزيكالىق جانە پسيحيكالىق دەنساۋلىقتى بۇزاتىن جاھاندىق ماسەلە. سوندىقتان دا اۋرۋدىڭ الدىن الۋ جانە مامانداردىڭ كەڭەس بەرۋى اسا ماڭىزدى. بۇگىنگى ماقساتىمىز – سالاۋاتتى ءومىر سالتىن ناسيحاتتاۋ», دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باسقارماسى باسشىسىنىڭ ورىنباسارى باقىتجان ءامىرحانوۆ.
ەلوردانىڭ قوعامدىق دەنساۋلىق ساقتاۋ باسقارماسىنىڭ مالىمەتىنشە, قازىرگى تاڭدا قالالىق پسيحيكالىق دەنساۋلىق ورتالىعىندا مىڭعا جۋىق ەسىرتكىگە تاۋەلدى ادام ەسەپتە تۇر. جىل باسىنان بەرى 234 ناۋقاس ستاتسيونارلىق ەمدەۋدەن ءوتتى. ال ونىڭ 16 پايىزى رەميسسيا بويىنشا ەسەپتەن شىعارىلدى.
ءىس-شارا استانا اكىمدىگىنىڭ, ەلوردالىق قوعامدىق دەنساۋلىق ساقتاۋ باسقارماسىنىڭ جانە قالالىق پوليتسيا دەپارتامەنتىنىڭ قولداۋىمەن وتكىزىلدى.