نەگىزگى ۇلتتىق بىرىڭعاي تەستىلەۋ باستالعاننان بەرى 169 مىڭ رەتتەن استام تەست تاپسىرىلدى. ونىڭ ىشىندە تالاپكەرلەردىڭ 74 پايىزى – قازاق تىلىندە, 26 پايىزى – ورىس تىلىندە, 0,1 پايىزى اعىلشىن تىلىندە تەستىلەۋدەن ءوتتى.
ۇبت باستالعالى شەكتى بالدى 77 پايىزدان استام تالاپكەر جيناعان. ورتاشا ۇپاي 69 بالدى قۇرادى. ەڭ جوعارى بالل – 137, ونى ەل بويىنشا ءۇش تالاپكەر جيناعان.
«ۇبت-نىڭ ءتورتىنشى اپتاسى اياقتالدى. تالاپكەرلەر تەستىلەۋدىڭ ەكىنشى مۇمكىندىگىن تاپسىرىپ جاتىر. وسى اپتادا ءبىز Ielts جانە Toefl حالىقارالىق سەرتيفيكاتتارىن «اعىلشىن ءتىلى» بويىنشا ۇبت بالىنا اۋىستىرۋ شكالاسىن جاريالادىق. سونداي-اق SAT, ACT, IB, A-Level ستاندارتتالعان تەست بالدارى بەكىتىلدى. بۇل سەرتيفيكات ناتيجەلەردى ۇبت بالىنا كونۆەرتاتسيالاۋعا مۇمكىندىك بەرەدى», دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ايتا كەتەيىك, ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ناتيجەسىندە ۇبت-عا ءتورت اپتانىڭ ىشىندە 486 تالاپكەر قاتىستى.
بۇگىنگى تاڭدا 229 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 175 ادام شىعارىلىپ, ولاردىڭ ناتيجەلەرى جويىلدى. بوگدە تۇلعالار انىقتالماعان.
ايتا كەتەيىك, 2023 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ۇبت ناتيجەلەرى جويىلادى.