قايبىر جىلى الەۋمەتتىك جەلىدە ءبىر ارىپتەسىمىز «قازىر اۋىر اتلەتتەرىمىز ءبىر جارىستان جۇلدە جەڭىپ السا قۋانبايتىن جاعدايعا جەتتىك. قايتا سول مەدالىن ەندى قاشان قايتارىپ الادى ەكەن دەپ ۋايىمدايتىن بولدىق» دەپ ازىلدەپ پوست جازعانى بار ەدى. ارادا كوپ ۋاقىت وتپەي, سول ءازىلى بۇگىندە شىندىققا اينالدى. سەبەبى كۇنى كەشە ەلىمىزدىڭ كوك بايراعىن الەمدىك ارەنادا بيىككە كوتەرىپ جۇرگەن بىرنەشە اۋىر اتلەتىمىزدىڭ قانىنان تىيىم سالىنعان پرەپارات تابىلعانى انىقتالىپ, جۇلدەنى قوسىمشا «كۇشپەن» جەڭىپ العانى بەلگىلى بولدى.
اۋىر اتلەتيكا فەدەراتسياسى تاراتقان مالىمەت بويىنشا دوپينگپەن ۇستالعان سپورتشىلاردىڭ قاتارىندا 2018 جىلى اشعاباتتاعى الەم چەمپيوناتىنىڭ كۇمىس جۇلدەگەرى, 2021 جىلى تاشكەنتتە وتكەن جاھان بىرىنشىلىگىنىڭ جەڭىمپازى, 2020 جىلعى سارى قۇرلىق دوداسىنىڭ ەكى دۇركىن قولا جانە كۇمىس جۇلدەگەرى, سونىمەن قاتار ازيا چەمپيونى دەگەن دارداي اتاعى بار ارلي چونتەي, جۋىردا عانا وڭتۇستىك كورەيانىڭ چيندجۋ قالاسىندا ۇيىمداستىرىلعان ازيا چەمپيوناتىنىڭ التىن مەدال يەگەرى, جاستار اراسىنداعى ازيا چەمپيونى جانە الەم چەمپيوناتىنىڭ كۇمىس جۇلدەگەرى, ماماندار تاراپىنان پاريج وليمپياداسىندا ەل قورجىنىنا جۇلدە سالۋى مۇمكىن دەگەن سپورتشىلاردىڭ قاتارىندا بولعان 23 جاستاعى نۇرعيسا ادىلەت ۇلى, ەرەسەكتەر اراسىنداعى الەم جانە ازيا چەمپيوناتىنىڭ قولا جۇلدەگەرى الەكسەي چۋركين, ازيا چەمپيوناتىنىڭ قولا جانە كۇمىس جۇلدەگەرى ارتەم انتروپوۆ, بىلتىرعى جاسوسپىرىمدەر اراسىنداعى ازيا چەمپيوناتىنىڭ جەڭىمپازى دەنيس پولۋبويارينوۆ, سونىمەن قاتار ءجاسوسپىرىم قىزدار اراسىنداعى ازيا چەمپيوناتىنىڭ كۇمىس جۇلدەگەرى الينا كوليۋشكو مەن قولا جۇلدەگەرى ەكاتەرينا الياكينا بار.
«12 ماۋسىمدا اۋىر اتلەتيكا فەدەراتسياسى حالىقارالىق تەستىلەۋ اگەنتتىگىنەن (ITA) ەلىمىزدىڭ ۇلتتىق قۇراماسىنىڭ سپورتشىسى ارتەم انتروپوۆتىڭ دوپينگ-سىناماسى وڭ ناتيجە كورسەتكەنى تۋرالى حابارلاما الدى. سپورتشى دوپينگ سىنامانى 12 مامىردا وڭتۇستىك كورەيادا وتكەن ازيا چەمپيوناتىنان كەيىن تاپسىرعان بولاتىن. ال وزگە سپورتشىلاردان دوپينگ سىناما ءساۋىر ايىندا جارىستان تىس جاعدايدا الىنىپ, ونىڭ ىشىندە التى اۋىر اتلەتىمىزدىڭ قانىنان تىيىم سالىنعان پرەپارات تابىلعانى انىقتالىپ وتىر. بۇگىنگى كۇنى سپورتشىلار دوپينگكە قارسى ەرەجەلەردى بۇزعانى تۋرالى حابارلاما الدى. ولارعا تاعايىندالاتىن جازا ءتۇرى ارقايسىسى قولدانعان پرەپاراتىن جانە تولىق تەرگەۋدىڭ ناتيجەسى بويىنشا قابىلدانادى. جوعارىدا اتالعان سپورتشىلاردىڭ بارلىعى قازىرگى ۋاقىتتا سپورتتىق ءىس-شارالار مەن وقۋ-جاتتىعۋ جيىندارىنان ۋاقىتشا شەتتەتىلدى.
فەدەراتسيا «تازا سپورت» ساياساتىن ۇستانا وتىرىپ, وقيعانى تاۋەلسىز تەكسەرۋ ءۇشىن كوميسسيا قۇردى. تەرگەۋ كەزەڭىندە كوميسسيا قۇرامى سپورتشىلاردىڭ دوپينگتى كەز كەلگەن تاماق ءتۇرى ارقىلى ابايسىزدا پايدالانعانىن نەمەسە دوپينگ ەكەنىن بىلە تۇرا قاساقانا قولدانعانىن انىقتايدى. تەكسەرۋ ءۇشىن سپورتشىلاردان دايىندىق كەزەڭىندە جەگەن, قابىلداعان سپورتتىق تاماقتارى مەن ۆيتاميندەرىنىڭ ۇلگىلەرى الىندى. سونداي-اق سپورتشىلارعا «ب» سىناماسىن قايتا تاپسىرۋعا مۇمكىندىك جاعىن بەرۋ دە قاراستىرىلىپ جاتىر», دەلىنگەن حابارلامادا.
سونىمەن قاتار فەدەراتسيا سپورتشىلاردى تەرگەۋ جۇمىستارىنان بولەك, جۇمىسىنا سالعىرتتىق تانىتقانى ءۇشىن ەلىمىزدىڭ ەرلەر جانە ايەلدەر قۇراما كوماندالارىنىڭ باس جاتتىقتىرۋشىلارىن قىزمەتىنەن بوساتۋ تۋرالى مينيسترلىككە ءوتىنىش جولداعانى بەلگىلى بولدى.
دوپينگكە قارسى ۇلتتىق ورتالىعىنىڭ مالىمەتى بويىنشا جىل باسىنان بەرى 14 تاۋ كوتەرگەن «تولاعايىمىز» دوپينگپەن ۇستالىپ وتىر. ناۋرىز ايىندا توكيو وليمپياداسىنىڭ قولا جۇلدەگەرى يگور سون باستاعان جاسوسپىرىمدەر اراسىنداعى الەم جانە ازيا چەمپيونى راحات بەكبولات, جاسوسپىرىمدەر اراسىنداعى الەم جانە ازيا چەمپيوناتىنىڭ قولا جۇلدەگەرى ابىلاي اۋەلحانوۆ جانە تاعى باسقا سپورتشىلارىمىزدىڭ دا دوپينگ قولدانعانى انىقتالىپ, ءتورت جىلدان سەگىز جىلعا دەيىن سپورتتان شەتتەتىلگەن بولاتىن.