بۇل دا ءبىر سەنساتسيا

ستاتيستيكاعا كوز جۇگىرتەر بولساق, فۋتبولدان قازاقستان ۇلتتىق قۇراماسى دا, ىشكى چەمپيوناتتا دوپ تەبەتىن كو­ماندالارىمىز دا بۇعان دەيىن ۇلىبريتانيا جەرىندە وتكەن بىردە-ءبىر ويىندا جە­ڭىسكە جەتپەگەن ەكەن. ماسەلەن, 2008 جىلى ءبىزدىڭ جىگىت­تەر «ۋەمبليدە» انگليا قۇرا­ماسىنان – 5:1, 2019 جىلى گلاز­ودا شوتلانديادان 3:1 ەسەبىمەن جەڭىلگەن. سونداي-اق ەۋروكۋبوك باسەكەلەرىندە باق سى­ناپ جۇرگەن «استانا», «قايرات», «شاحتەر» كو­ماندالارى ءار جىل­دارى بىرىك­كەن پاتشالىقتىڭ «سەل­تيك», «ابەردين», «مان­چەس­تەر يۋنايتەد» سياقتى كلۋب­تا­رىمەن كەزدەسىپ, بريتا­نيا­داعى بارلىق ويىندا الاڭ يە­لەرىنىڭ مىقتىلىعىن مويىن­داۋعا ءماجبۇر بولىپ ءجۇر ەدى.

وسىنداي ءساتسىز ويىندار سەريا­­سىنان كەيىن كوپ جان­كۇيەر كەشەگى ماتچ الدىندا جەرلەستەرىمىز تەڭ ناتيجەگە قول جەتكىزسە, ءبىز ءۇشىن وتە ءتاۋىر جەتىستىك بولار ەدى دەپ بولجام جاساعان-تىن. الايدا ءبىزدىڭ فۋتبولشىلار جانكۇيەرلەرگە ۇلكەن توسىنسىي دايىنداپ قويعان ەكەن. بەلفاست­تاعى 19 مىڭ جانكۇيەرگە ارنال­عان «ۋيندزور پارك» ستاديو­نىنداعى تارتىستى كەزدەسۋدە وتان­داستارىمىز سولتۇستىك يرلان­­ديا قۇراماسىمەن جاسىل الاڭدا العاش رەت جولىعىپ تۇرسا دا, الاڭ يەلەرىن سوڭعى مينۋتتا سان سوقتىرىپ كەتتى. ەل قۇراماسى ساپىنان كەزدەسۋدەگى جالعىز ءارى جەڭىس گولىن ويىن­نىڭ 88-مينۋتىندا ابات ايىمبەتوۆ سوقتى. «استانا» كلۋبىنىڭ شابۋىلشىسى دوپتى ءوز ايماعىمىزدان قابىلداپ, ءبىر ءوزى قارسىلاس كوماندانىڭ ءۇش فۋتبولشىسىن وڭاي الداپ ءوتىپ, دوپتى بەيلي پيكوك-فاررەل قورعاعان قاقپاعا ءدال باعىتتادى – 1:0.

وسىلايشا, ەۋروپا چەم­پيوناتىنىڭ ىرىكتەۋ كەزەڭىندە قاتارىنان ءۇشىنشى ويىندا جەڭىسكە جەتكەن جەرلەستەرىمىز ن توبىنىڭ تۋرنير كەستەسىندە توعىز ۇپاي جيناپ, فين­ليان­ديامەن بىرگە كوش باس­تادى. سۋو­مي ەلىنىڭ وكىلدەرى بۇل تۋردا سان-مارينودان 6:0 ەسەبى­مەن باسىم ءتۇستى. ال دانيا مەن سلوۆەنيا ءبىر-بىرى­مەن تەڭ ويناپ (1:1), جەتى ۇپاي­مەن ءۇشىنشى جانە ءتورتىنشى ورىندارعا ورنالاستى.

ماگومەد اديەۆ شاكىرتتەرى كەلەسى تۋر ويىندارىن كۇزدە ءوز الاڭىمىزدا فينليانديا (7 قىركۇيەك) جانە سولتۇستىك ير­لانديا (10 قىركۇيەك) فۋت­بولشىلارىمەن وتكىزەدى.