پرەزيدەنت قازاقستان-گەرمانيا بيزنەس-فورۋمىنا قاتىستى

پرەزيدەنت فورۋمدا سويلەگەن سوزىندە ءوزىنىڭ مەملەكەتتىك ساپارى اياسىندا جەتەكشى نەمىس كومپانيالارىنىڭ باسشىلارىن الا كەلگەن فرانك-ۆالتەر شتاينمايەرگە العىس ايتىپ, قازاقستان گەرمانيانىڭ ورتالىق ازياداعى ەڭ باستى  ەكونوميكالىق سەرىكتەسى  ەكەنىن اتاپ ءوتتى.

– بۇگىندە گەرمانيا كومپانيالارى ءبىزدىڭ ەكونوميكامىزعا شامامەن 6 ميلليارد دوللار ينۆەستيتسيا قۇيدى. بۇل ينۆەستيتسيانىڭ شامامەن 90 پايىزى شيكىزاتتىق ەمەس سەكتورعا تيەسىلى ەكەنىن ايتا كەتكەن ءجون. ەلىمىزدە نەمىس كاپيتالىنىڭ ۇلەسى بار 1000-نان استام كومپانيا بەلسەندى جۇمىس ىستەپ جاتىر. ولاردىڭ كوپشىلىگى – الەمگە ايگىلى برەندتەر, ال باسقالارى – ورتا دەڭگەيدەگى وتباسىلىق بيزنەس. نەمىس كومپانيالارىنىڭ بارلىعىن قازاقستانعا شاقىرامىز. باتىلدىلىققا, ناقتىلىققا جانە جاۋاپكەرشىلىككە نەگىزدەلگەن نەمىس بيزنەسىنىڭ تاسىلىن باعالايمىز. بۇل قاسيەتتەر بيزنەستەگى تابىس ءۇشىن وتە ماڭىزدى, – دەدى قاسىم-جومارت توقاەۆ.

مەملەكەت باسشىسى بۇگىن شتاينمايەر مىرزامەن كەزدەسۋ بارىسىندا تابيعي رەسۋرستاردى بىرلەسىپ بارلاۋ جانە يگەرۋ ىسىندەگى ىنتىماقتاستىعىمىزدى نىعايتۋعا ۋاعدالاسقانىن ايتىپ, بۇل شيكىزات, ونەركاسىپ جانە تەحنولوگيا سالالارىنداعى سەرىكتەستىك تۋرالى ۇكىمەتارالىق كەلىسىمگە تىڭ سەرپىن بەرەتىنىنە سەنىم ءبىلدىردى.

سونىمەن قاتار پرەزيدەنت كولىك جانە لوگيستيكا سالالارىندا ءوزارا ءتيىمدى ىنتىماقتاستىق ءۇشىن مۇمكىندىك مول ەكەنىنە نازار اۋداردى.

– قازاقستان ەۋرازيانىڭ جۇرەگىندە ورنالاسقان. مۇنىڭ ستراتەگيالىق ءمانى زور. قىتاي مەن ەۋروپا اراسىنداعى بارلىق قۇرلىقتىق جۇك تاسىمالىنىڭ 80 پايىزى ءبىزدىڭ ەلىمىزدىڭ اۋماعى ارقىلى وتەدى. قازىرگى جاڭا گەوساياسي جاعدايدا «ورتا ءدالىزدىڭ» ماڭىزى ارتا ءتۇستى. بۇل – ورتالىق جانە شىعىس ازيادان ەۋروپاعا جۇك تاسىمالداۋدىڭ ەڭ قىسقا ءارى تۇراقتى باعىتى. 2022 جىلدان باستاپ كاسپي ءدالىزى ارقىلى ەۋروپالىق وداققا مۇشە ەلدەرگە تاسىمالداناتىن جۇك كولەمى ەكى ەسە ارتتى. شىعىس پەن باتىس اراسىنداعى ۇلعايىپ كەلە جاتقان ساۋدا كولەمىنە قولداۋ كورسەتۋ ءۇشىن ءبىز ينفراقۇرىلىمدى جاڭارتۋ جانە كەدەرگىلەردى جويۋ جۇمىستارىن جۇرگىزىپ جاتىرمىز. ءبىز قازاقستاندىق پورتتاردىڭ وتكىزۋ مۇمكىندىگىن 30 ميلليون تونناعا دەيىن ارتتىرۋدى كوزدەپ وتىرمىز,  – دەدى مەملەكەت باسشىسى.

سونىمەن قاتار پرەزيدەنت جاڭارتىلاتىن ەنەرگيا كوزدەرىن ىنتىماقتاستىعىمىز ءۇشىن كەلەشەگى مول سەكتوردىڭ ءبىرى رەتىندە اتادى.

مەملەكەت باسشىسىنىڭ پىكىرىنشە, قازاقستان جاسىل سۋتەگىن وندىرەتىن الەمدەگى جەتەكشى ەل اتانۋى ءۇشىن العىشارتتاردىڭ ءبارى بار. بۇل رەتتە پرەزيدەنت SVEVIND Group كومپانياسىمەن قۇنى 50 ميلليارد دوللار بولاتىن جاسىل سۋتەگىن ءوندىرۋ تۋرالى كەلىسىمگە قول قويىلعانىن اتاپ ءوتىپ, جاسىل سۋتەگى ءوندىرىسى ەكولوگيالىق تازا بولات, اليۋميني جانە باسقا دا مەتالدار وندىرىسىنە جول اشاتىنىنا نازار اۋداردى.

بۇدان بولەك, مەملەكەت باسشىسى قازاقستانىڭ گەرمانيامەن يننوۆاتسيا جانە تسيفرلاندىرۋ, ادامي كاپيتالدى دامىتۋ سالالارى بويىنشا ىنتىماقتاستىقتى دامىتۋعا مۇددەلى ەكەنىن جەتكىزدى. بۇل ورايدا قاسىم-جومارت توقاەۆ اقتاۋ قالاسىنداعى كاسپي مەملەكەتتىك ۋنيۆەرسيتەتى جانىنان قازاق-نەمىس ينجينيرينگ ينستيتۋتىن, سونداي-اق شىعىس قازاقستان تەحنيكالىق ۋنيۆەرسيتەتىنىڭ جانىنان قازاق-نەمىس عىلىم جانە تەحنولوگيالار ينستيتۋتىن اشۋ ەلىمىزدەگى ادامي كاپيتال مەن باسەكەگە قابىلەتتىلىكتى ودان ءارى جەتىلدىرۋگە ىقپال ەتەتىنىنە سەنىم ءبىلدىردى.

جيىندا سونداي-اق گەرمانيا پرەزيدەنتى فرانك-ۆالتەر شتاينمايەر, قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ, گەرمانيانىڭ فەدەرالدىق ەكونوميكا جانە كليماتتى قورعاۋ ءمينيسترى ۋدو فيليپپ ءسوز سويلەدى.