ەلوردادا قويان-قولتىق ۇرىستان ەرەسەكتەر اراسىنداعى VII الەم چەمپيوناتى ءوز مارەسىنە جەتتى. جاقسىلىق ۇشكەمپىروۆ اتىنداعى جەكپە-جەك سارايىندا ۇيىمداستىرىلعان ءدۇبىرلى دودادا جەر-جاھاننىڭ 32 ەلىنەن كەلگەن 312 سپورتشى باق سىنادى. ولاردىڭ قاتارىندا الەم مويىنداعان مايتالمان جەرلەستەرىمىزدىڭ دە بار ەكەنىن ايتا كەتكەن ءجون.
ءۇش كۇنگە جالعاسقان الەم چەمپيوناتىندا قازاقستان ۇلتتىق قۇراماسىنىڭ سپورتشىلارى ەكى باعدارلاما قورىتىندىسى بويىنشا 61 مەدال ولجالاپ (21 التىن, 19 كۇمىس جانە 21 قولا), جالپىكوماندالىق ەسەپتە باس جۇلدەگە يە بولدى. ەكى سپورتشى اراسىنداعى جەكپە-جەك تۇرىندە ەرلەر – 8, ايەلدەر – 6 جانە 2 ءابسوليۋتتى سالماقتا كۇش سىناستى. بۇدان بولەك, ءوزىن-ءوزى قورعاۋ باعدارلاماسىندا ەرلەر – 11, ايەلدەر 8 سالماقتا كىم مىقتىنى انىقتادى. تاعى ءبىر ايتا كەتەرلىگى, جارىس قوجايىنى رەتىندە ەڭ كوپ سپورتشىنى (65 ادام) قازاقستان قۇراماسى قوستى.
سونىمەن قاتار 7 التىن, 7 كۇمىس جانە 15 قولا مەدالدى قورجىندارىنا سالعان رەسەي قۇراماسى جالپىكوماندالىق ەسەپتە ەكىنشى ورىنعا يە بولسا, ۇزدىك ۇشتىكتى وزبەكستان سپورتشىلارى تۇيىندەدى. ولاردىڭ ەنشىسىندە 25 جۇلدە بار (7 التىن, 6 كۇمىس, 12 قولا). كەيىنگى ورىندارعا مولدوۆا (1 كۇمىس, 1 قولا), قىرعىزستان (6 قولا) مەن تايلاند (3 قولا) قۇرامالارى جايعاستى.
جارىستىڭ جابىلۋ سالتاناتىندا مادەنيەت جانە سپورت ءمينيسترى اسحات ورالوۆ, مەملەكەتتىك كۇزەت قىزمەتىنىڭ باسشىسى, قازاقستان قويان-قولتىق ۇرىس قاۋىمداستىعىنىڭ پرەزيدەنتى, گەنارال-مايور ساكەن يسابەكوۆ, حالىقارالىق قويان-قولتىق ۇرىس فەدەراتسياسىنىڭ پرەزيدەنتى سەرگەي استاحوۆ قاتىسىپ, جۇلدەگەرلەردى ماراپاتتادى.
«بۇگىندە ەلىمىز بويىنشا قويان-قولتىق ۇرىستىڭ 500-گە جۋىق سەكتسياسى جۇمىس ىستەيدى, وندا 22 مىڭنان استام ادام وسى سپورتپەن شۇعىلدانادى. جەكپە-جەك تۇرلەرى قازاقستاندا وتە تانىمال, سوندىقتان بۇل سپورت ءتۇرىنىڭ ەلىمىزدە بولاشاعى زور دەپ بىلەمىن. حالىقارالىق قويان-قولتىق ۇرىس فەدەراتسياسىنا, سونداي-اق بۇكىلقازاقستاندىق قويان-قولتىق ۇرىس قاۋىمداستىعىنا جانە ونىڭ پرەزيدەنتى – مەملەكەتتىك كۇزەت قىزمەتىنىڭ باستىعى, گەنەرال-مايور ساكەن يسابەكوۆكە ايرىقشا العىس ايتقىم كەلەدى. مۇنداي تۋرنيرلەردىڭ سپورت پەن سالاماتتى ءومىر سالتىن ناسيحاتتاۋعا قوساتىن ۇلەسى وراسان زور, سوندىقتان ءبىز وسىنداي جارىستاردى ەلىمىزدە مۇمكىندىگىنشە جۇيەلى تۇردە وتكىزۋ ءۇشىن جۇمىس ىستەيمىز», دەدى ا.ورالوۆ.
جالپى, قويان-قولتىق ۇرىس – كۇش قولداناتىن بىرنەشە سپورت ءتۇرىنىڭ قوسىندىسىنان شىققان. جەكپە-جەك تۇرىندە ەكى سپورتشى ءبىر-بىرىمەن كۇش سىناسسا, ءوزىن-ءوزى قورعاۋدا جەكەلەي جانە جۇپتىق سىندا شابۋىلدان قالاي قورعانۋ كەرەگى كورسەتىلەدى. مۇندا ءار جاتتىعۋ 5 قورعانىس ادىسىنەن توپتاستىرىلعان.