ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن ستۋدەنتتەرى ءۇشىن ەلەكتروندى تسيفرلىق قولتاڭبانىڭ كومەگىمەن QR كودى ارقىلى قۇجاتقا قول قويۋدىڭ ءتيىمدى ءادىسى ەنگىزىلدى.
ءسويتىپ, وقۋ ورنىنىڭ IT ماماندارى smart.enu اقپاراتتىق جۇيەسىن «Egov Mobile» قوسىمشاسىمەن تولىقتىردى. ەندى جوعارى وقۋ ورنىنىڭ قىزمەتكەرلەرى مەن ستۋدەنتتەرى QR كودتى سكانەرلەۋ ارقىلى 10-عا جۋىق قۇجاتقا قول قويا الادى.
– ءبىزدىڭ ۋنيۆەرسيتەت پاندەميا كەزىندە ادامداردىڭ عيماراتتارعا ءوزارا بايلانىسسىز كىرۋى ءۇشىن ءوزىنىڭ اقپاراتتىق جۇيەسىنە QR كود ەنگىزدى. 2021 جىلدان بەرى ەلەكتروندى ساندىق قولتاڭبا قولدانىلادى. سونداي-اق جەكە ەكوجۇيەسىن بەلسەندى تۇردە دامىتىپ, ۇدەرىستەردى جەڭىلدەتىپ وتىر. QR ارقىلى قۇجاتتارعا قول قويۋ مۇمكىندىگى بار ەكەنى تۋرالى حابارلاندىرۋدان كەيىن بىردەن ءتيىستى مينيسترلىككە ءوتىنىش بەردىك. ءبىزدىڭ جۇيەمىز سايكەستىك پەن قاۋىپسىزدىككە بايلانىستى تەكسەرىستەن ءساتتى ءوتتى. ەندى ءبىز smart.enu جۇيەسىندە قۇجاتتارعا QR ارقىلى قول قويۋدىڭ ىڭعايلى ءادىسىن ەنگىزدىك. ول ءۇشىن تەلەفونعا «eGov» ءموبيلدى قوسىمشاسىنىڭ سوڭعى نۇسقاسىن جۇكتەۋ قاجەت. تسيفرلىق مۇمكىندىك قۇجاتتاردى باسىپ شىعاراتىن ۋاقىت پەن قارجىنى ۇنەمدەپ قانا قويماي, قورشاعان ورتاعا دا پايداسىن تيگىزەدى, – دەيدى ۋنيۆەرسيتەتتىڭ تسيفرلىق دامۋ جانە قاشىقتىقتان وقىتۋ دەپارتامەنتىنىڭ ديرەكتورى گۇلميرا بەكمانوۆا.
شىن مانىندە, اۆتوماتتاندىرۋ وندىرىستىك ۇدەرىستەردى جەڭىلدەتىپ, جىلدامداتۋعا مۇمكىندىك بەردى. بيىلعى بەس ايدىڭ ىشىندە smart.enu جۇيەسى ارقىلى 3 100 كەلىسىمشارت پەن 5 000 سيللابۋسقا قول قويىلعان.
ايتا كەتەيىك, سوڭعى ەكى جىلدا ەۋرازيا ۇلتتىق ۋنيۆەرسيتەتىنىڭ ءىت ماماندارى 15 ءونىم جاسادى. ەندى ولار جەكە قۇجات اينالىمى جۇيەسىن ازىرلەۋگە كىرىستى.