مادەنيەت جانە سپورت مينيسترلىگىنىڭ قولداۋىمەن جارىققا شىققان «بەسىك جىرى» قىسقامەتراجدى انيماتسيالىق ءفيلمى ءۇندىستاندا وتكەن Roshani International film festival 2023 فەستيۆالىندە «ۇزدىك انيماتسيالىق فيلم» اتاعىن جەڭىپ الدى.
اۋرانگاباد قالاسىندا ءتورتىنشى مارتە وتكەن حالىقارالىق فەستيۆالدە الەمنىڭ تۇكپىر-تۇكپىرىنەن تالانتتى كينەماتوگرافيستەر جينالدى. بيىل بايقاۋعا 1 300-گە جۋىق جۇمىس ۇسىنىلعان. ونىڭ ىشىندە 132-ءسى انيماتسيالىق فيلم. Dala animation شىعارماشىلىق ۇجىمى تۇسىرگەن «بەسىك جىرى» ءمۋلتفيلمى قازىلاردىڭ جوعارى باعاسىن الىپ, كورەرمەننىڭ كوڭىلىنەن شىقتى.
تۋىندى 2021 جىلى ۇلتتىق كينونى قولداۋ مەملەكەتتىك ورتالىعىنىڭ قولداۋىمەن جارىق كورگەن بولاتىن.
«بۇل «بەسىك جىرى» انيماتسيالىق ءفيلمىنىڭ العاشقى جۇلدەسى ەمەس. اتالعان مۋلتفيلم مامىر ايىندا يسپانيا استاناسى مادريدتە وتكەن بەدەلدى كينوفەستيۆالدە «ەڭ ۇزدىك قىسقامەتراجدى انيماتسيالىق فيلم» جۇلدەسىن جەڭىپ العان ەدى. ول بايقاۋعا 1 500 انيماتسيالىق جۇمىس ۇمىتكەر رەتىندە ۇسىنىلعان», دەدى مادەنيەت كوميتەتىنىڭ توراعاسى ارمان جۇدەباەۆ.