قازاقستاننىڭ كاسىپقوي فۋتبول ليگاسى (قكفل) ەل چەمپيوناتىنىڭ مامىر ايىنداعى ەڭ ۇزدىك ويىنشىسى مەن باس باپكەرىنىڭ ەسىمىن اتادى.
ءداستۇر بويىنشا, قكفل ءار ايدا كوماندالاردىڭ باس باپكەرلەرى مەن كاپيتاندارى اراسىندا ساۋالداما جۇرگىزىپ, ايدىڭ ۇزدىك فۋتبولشىسى مەن باس باپكەرىن انىقتايدى. مامىر ايىنداعى ساۋالداما قورىتىندىسى بويىنشا, «ورداباسى» مەن قازاقستان ۇلتتىق قۇراماسىنىڭ جارتىلاي قورعاۋشىسى اسحات تاعىبەرگەن وتكەن ايداعى ەلىمىزدىڭ ەڭ ۇزدىك فۋتبولشىسى اتاندى. تاعىبەرگەن مامىر ايىنداعى ويىنداردا 3 گول سوعىپ, 4 ناتيجەلى پاس بەرگەن.
ال باس باپكەرلەر اراسىندا «ورداباسى» كلۋبىنىڭ جاتتىقتىرۋشىسى الەكساندر سەدنەۆ ۇزدىك دەپ تانىلدى. شىمكەنتتىك كوماندا مامىر ايىندا بەس ويىن وتكىزىپ, سونىڭ بارلىعىندا جەڭىسكە جەتتى. ءتورت مارتە ەل بىرىنشىلىگىندەگى ويىندا, ءبىر مارتە كۋبوك باسەكەسىندە قارسىلاستارىنان باسىم تۇسكەن بولاتىن.