«Coursera»-نىڭ قازاقشا دارىستەرى

كەزدەسۋگە جوباعا قاتىسۋشى 25 ايماقتىق ۋنيۆەرسيتەتتىڭ رەكتورلارى, پرورەكتورلارى جانە ستۋدەنتتەرى جينالدى. ولار وڭىر­دەگى وقۋ ورىندارىنىڭ اكادە­ميا­لىق الەۋەتىن ارتتىرۋعا باعىت­تال­عان جوبانىڭ العاشقى ناتيجەلەرىن ۇلكەن قىزىعۋشى­لىقپەن تالقىلادى.

«Astana IT University» عيمارا­تىن­دا بولعان كەزدەسۋگە عىلىم جانە جوعارى ءبىلىم ءمينيسترى ساياسات نۇربەك, «قازاقستان حال­قى­­نا» قوعامدىق قورىنىڭ تور­ا­عا­سى بولات جامىشەۆ, «Coursera» كوم­پانياسىنىڭ باس اتقارۋشى ديرەكتورى دجەفف مادجونكالدا, «BMG Upskill» كومپانياسىنىڭ باسشىسى راۋان كەنجەحان ۇلى جانە باسقالار قاتىستى.

دجەفف مادجونكالدا بولا­شاقتاعى ءبىلىم مەن ەڭبەك نارى­عىنداعى مۇمكىندىكتەر, وزگەرىس­تەر, جاڭاشىلدىقتار تۋرالى ويىمەن ءبولىستى. ء«بىز جوعارى وقۋ ورىندارى ستۋدەنتتەرىنىڭ تسيفرلىق ەكونوميكادا وركەندەۋى ءۇشىن ماڭىزدى داعدىلاردى دامىتۋدا عىلىم جانە جوعارى ءبىلىم مينيسترلىگىمەن كۇش بىرىك­تىرگەنىمىزگە قۋانىشتىمىز. بۇل ىن­تىماقتاستىق – ەڭبەك نارى­عىن­داعى قۇزىرەتتەردى دامىتاتىن ءبىلىم بەرۋ باعدارلامالارى مەن قىز­مەتتەرىنە دەگەن سۇرانىس­تىڭ دالەلى. ءارى بۇل جوعارى ءبىلىم جۇيەلەرى ستۋدەنتتەر كون­تينگەنتىن «Coursera» كومەگىمەن كاسىبي داعدىلارعا قالاي ۇيرەتە الاتىنىنىڭ ءتيىمدى مودەلى رەتىن­دە قىزمەت ەتەدى», دەدى ول.

– بۇل جوبا جەرگىلىكتى ستۋدەنتتەرگە زاماناۋي ءبىلىم الىپ, جاڭا ترەندتەردى مەڭگەرۋگە جول اشادى. نارىقتا بىلىكتىلىگى جو­عارى ءارى سۇرانىسقا يە مامان اتانۋىنا, سونداي-اق قازاق ءتىلىنىڭ وزەكتىلىگىن ارتتىرۋعا مۇمكىندىك بەرەدى. 2023 جىلى تۇلەكتەردىڭ 75 پايىزى ۇبت-نى قازاق تىلىندە تاپسىرعاندىقتان, الەمدىك ۇزدىك كۋرستاردىڭ مازمۇنىن قازاق تىلىنە اۋدارۋ ماڭىزدى. ءارى بۇل قازاق ءتىلىن قولداناتىن تالاپكەرلەر سانى ايتارلىقتاي ەكەنىن كورسەتەدى. كورسەتكىش جىل ساناپ ارتا تۇسەرى انىق, – دەيدى «قازاق­ستان حالقىنا» قوعام­دىق قورىنىڭ توراعاسى بولات جامىشەۆ.

ساياسات نۇربەكتىڭ ايتۋىنشا, بۇگىنگىدەي جاھاندانۋ مەن تسيفرلاندىرۋ جاعدايىندا حالىقارالىق ەڭبەك نارىعىنداعى باسەكەنىڭ ارتۋى ۇلتتىق ءبىلىم بەرۋ جۇيەسىنىڭ اشىق ءارى باسەكەگە قابىلەتتى, ۇزدىكسىز وقۋ مەن كاسىبي داعدىلاردى دامىتۋعا جول اشاتىن يكەمدى ۇلگىسىنە قاجەتتىلىك تۋدىردى. ء«بىز «Coursera» قازاق تىلىندە» جوباسى اياسىندا الەمنىڭ ەڭ ۇزدىك پروفەسسورلارىنىڭ كۋرستارىن قازاق تىلىنە اۋدارۋدى باستادىق. بۇل – ەلىمىزدىڭ بولاشاعى, ءتىلىمىزدىڭ الەۋەتى, ءبىلىم ساپاسىن كوتەرۋ تۇرعىسىنان العاندا وتە ماڭىزدى باستاما», دەدى مينيستر.

ەسكە سالا كەتەيىك, «قازاقستان حالقىنا» قوعامدىق قورى مەن عىلىم جانە جوعارى ءبىلىم مينيسترلىگىنىڭ قولداۋىمەن «Coursera» قازاق تىلىندە» جوباسى اياسىندا 654 كۋرس قازاقشاعا اۋدارىلىپ, ەلىمىزدەگى 25 وڭىرلىك جوعارى وقۋ ورنىنىڭ ستۋدەنت­تەرىنە ۇسىنىلادى. قازىرگى تاڭدا بۇل ۋنيۆەرسيتەتتەردە 155 مىڭ ستۋدەنت ءبىلىم الادى.

كۋرستاردى قازاق تىلىنە اۋدارۋ جۇمىسى «Coursera»-نىڭ تەحنيكالىق جانە ادىستەمەلىك قولداۋىنا سۇيەنە وتىرىپ جۇزەگە اسىرىلىپ جاتىر. قازىر 50 كۋرس قازاق جانە ورىس تىلدەرىنە تولىقتاي اۋدارىلىپ, پلاتفورماعا جۇكتەلگەن. اۋدارما جۇمىسى جالعاسا بەرەدى. كەزەكتى 50 كۋرستىڭ اۋدارماسى دا اياقتالۋعا تاياۋ. جاقىن كۇندەرى ولار دا پلاتفورماعا جۇكتەلەدى.

قازىرگى تاڭدا ايماقتىق وقۋ ورنىنىڭ ستۋدەنتتەرى بىرنەشە كۋرس­تى اياقتادى. بۇل رەتتە كۋرس­تاردى ستۋدەنتتەردىڭ 11 358-ءى – قازاق تىلىن­دە, 8 653-ءى – اعىلشىن تىلىن­دە, 6 096-ى ورىس تىلىندە وت­كەن. جەر­­گىلىكتى ستۋدەنتتەر ارا­سىن­دا «كاسىپ­كەرلىك: كاسىپتىڭ نەگى­زىن قا­لاۋ», «كوماندالارعا جەتەك­شىلىك ەتۋ: كوشباسشى رەتىن­دە دامۋ», «21 عا­سىر جۇمىس ورنىن­داعى قا­رىم-قاتىناس», «كاسىبي جانە جەكە ونىم­دىلىككە ارنال­عان ۋاقىتتى باس­قارۋ», «ينجە­نەرلەرگە ارنالعان ديففە­رەنتس­يالدىق تەڭدەۋلەر», «پروب­لەمانى ءتيىمدى شەشۋ جانە شەشىم قابىلداۋ» دەپ اتالاتىن كۋرستار جوعارى سۇرانىسقا يە ەكەنى انىقتالدى.

«Coursera»-نىڭ قازاقستان­داعى جەرگىلىكتى رەسمي سەرىكتەسى – «BMG Upskill» كومپانياسى. كومپانيا «Coursera-Qazaqstan» پلاتفورماسىن دايىنداپ, وڭىرلەردەگى ۋنيۆەرسيتەتتەردە «سoursera» ورتالىقتارىن (كومپيۋتەرلەر مەن قۇرىلعىلار) قۇردى.