تەننيستەن ەلىمىزدىڭ ءبىرىنشى, الەمنىڭ ءتورتىنشى راكەتكاشىسى ەلەنا رىباكينا پاريجدە مارەسىنە جەتكەن رولان گارروس تۋرنيرىندە ۇزدىكتەر قاتارىنان كورىنە الماسا دا, كۇنى كەشە جاڭارعان ايەلدەر تەننيسى قاۋىمداستىعىنىڭ (WTA) رەيتينگىندە ءۇشىنشى ورىنعا كوتەرىلدى.
وتانداسىمىز جۇلدە قورى 49 600 000 ەۋرونى قۇراعان تەننيس ءتۋرنيرىن سىرقاتىنا بايلانىستى ءۇشىنشى كەزەڭنەن اياقتاۋعا ءماجبۇر بولسا دا, بۇل وعان رەيتينگتە جوعارىلاۋىنا ەش كەدەرگى بولمادى. ويتكەنى بۇعان دەيىن رەيتينگتە ءۇشىنشى ورىندا تۇرعان اقش وكىلى دجەسسيكا پەگۋلا بيىلعى رولان گارروستا بىلتىرعى ۇپايىن قورعاي الماي (ول 2022 جىلى شيرەك فينالعا دەيىن جەتسە, بيىل ءۇشىنشى كەزەڭدە جەڭىلدى), بەسىنشى ساتىعا ءتۇسىپ قالدى. ال رولان گارروستىڭ بيىل ءۇشىنشى مارتە توپ جارعان پولشالىق يگا شۆەنتەك – ءبىرىنشى, بەلارۋس وكىلى ارينا سوبولەنكو ەكىنشى ورنىن ساقتاپ قالدى. يۋليا پۋتينتسەۆا 58-دەن 51-ءشى ساتىعا جوعارىلادى.
پاريجدەگى دودانىڭ ەرلەر اراسىنداعى سايىسىندا ۇزدىك شىعىپ, «ۇلكەن دۋلىعا» ساناتىنداعى جەڭىس سانىن 23-كە جەتكىزگەن سەربيالىق نوۆاك دجوكوۆيچ رەيتينگتە يسپانيالىق جاس تالانت كارلوس الكاراستى ىعىستىرىپ, ءبىرىنشى ورىنعا كوتەرىلدى. الكاراس – ەكىنشى, رەسەيلىك دانيل مەدۆەدەۆ ءۇشىنشى ساتىعا جايعاستى. ەرلەر اراسىنداعى ەلىمىزدىڭ ءبىرىنشى راكەتكاشىسى الەكساندر بۋبليك ATP رەيتينگىندە 47-ورىنعا تۇراقتادى.