ەل تەننيسىنىڭ بولاشاعى سانالعان زاڭعار نۇرلان ۇلى ەرەۆاندا وتكەن 18 جاسقا دەيىنگىلەر اراسىنداعى «ITF Juniors J30 Tsaghadzor Golds’S Gym Cup 1» ءتۋرنيرىنىڭ ءابسوليۋتتى چەمپيونى اتاندى.
15 جاستاعى وتانداسىمىز اتالعان جارىستىڭ جەكەلەي جانە جۇپتىق سىنىندا تاماشا ونەر كورسەتتى. جەكەلەي سايىستىڭ فينالىندا زاڭعار وسى جارىستىڭ ءبىرىنشى راكەتكاشىسى, چەحيالىق ياكۋب سمىچەكپەن شەبەرلىك بايقاسىپ, ەكى سەتكە جالعاسقان ماتچتا قارسىلاسىن 7:5, 6:1 ەسەبىمەن تىزە بۇكتىردى.
زاڭعار دودا بارىسىندا اۋستريا جاسوسپىرىمدەر قۇراماسى كوشباسشىلارىنىڭ ءبىرى ماكسيميليان حەيدەلمايەرمەن اسا تارتىستى كەزدەسۋ وتكىزىپ, ءۇش سەتكە سوزىلعان ماتچتا جەرلەسىمىزدىڭ مەرەيى ۇستەم بولعانىن ايتا كەتكەن ءجون. ز.نۇرلان ۇلى ەرەۆانداعى ءتۋرنيردىڭ جۇپتىق باسەكەسىندە ءدال سول اۋستريالىق م.حەيدەلمايەرمەن بىرگە جۇپ قۇراپ, فينالدا رەسەيلىك تەننيسشىلەر – ماكسيم كولوبوۆ پەن روديون مالمىگيندى ءۇش سەتتە جەڭدى – 6:7, 6:4, 10:6.
بۇل – زاڭعار نۇرلان ۇلىنىڭ حالىقارالىق تەننيس فەدەراتسياسى وتكىزگەن جارىستا جەكەلەي سىنداعى ەكىنشى تيتۋلى.