كەشە سەنات توراعاسى ماۋلەن اشىمباەۆ پالاتا وتىرىسىندا دەپۋتاتتارعا جاڭا سەناتوردى تانىستىردى. سونداي-اق وتىرىس كەزىندە «تمد-عا قاتىسۋشى مەملەكەتتەردىڭ جالعان تاۋار بەلگىلەرىن جانە گەوگرافيالىق كورسەتكىشتەردى پايدالانۋدىڭ الدىن الۋ مەن جولىن كەسۋ جونىندەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالىپ, ماقۇلداندى.
وتىرىستى اشقان ماۋلەن اشىمباەۆ ارىپتەستەرىنە سولتۇستىك قازاقستان وبلىسىنان سايلانعان جاڭا سەناتور اسەم راحمەتوۆانى تانىستىرىپ, وعان جاڭا جۇمىستا ساتتىلىك تىلەدى. كونستيتۋتسيالىق نورماعا سايكەس اسەم راحمەتوۆا انت بەردى. سونداي-اق الەۋمەتتىك-مادەني دامۋ جانە عىلىم تۇراقتى كوميتەتىنىڭ مۇشەسى بولىپ سايلاندى.
بۇدان بولەك, پالاتا وتىرىسىندا سەناتورلار «تمد-عا قاتىسۋشى مەملەكەتتەردىڭ جالعان تاۋار بەلگىلەرىن جانە گەوگرافيالىق كورسەتكىشتەردى پايدالانۋدىڭ الدىن الۋ مەن جولىن كەسۋ جونىندەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى. بۇل كەلىسىم تمد-عا مۇشە ەلدەردىڭ مەملەكەتتىك شەكارالارى ارقىلى مۇنداي تاۋارلاردىڭ تاسىمالدانۋىنا جول بەرمەۋ جونىندەگى شارتتى قامتاماسىز ەتەدى.
قۇجات جونىندە بايانداما جاساعان سەناتور قايرات تاستەكەەۆتىڭ ايتۋىنشا, قۇجاتتا جالعان تاۋار بەلگىلەرى مەن گەوگرافيالىق كورسەتكىشتەرى بار تاۋارلاردى ءوندىرۋ مەن وتكىزۋدىڭ انىقتالعان فاكتىلەرى تۋرالى اقپارات الماسۋ كوزدەلگەن. سونداي-اق ونەركاسىپتىك مەنشىك سالاسىندا بىرلەسكەن عىلىمي زەرتتەۋلەر جۇرگىزۋ, زياتكەرلىك مەنشىك قۇقىقتارىن قورعاۋ جانە ساقتاۋ سالاسىندا كادرلاردى دايارلاۋ, ولاردىڭ بىلىكتىلىگىن ارتتىرۋ جونىندەگى بىرلەسكەن ءىس-شارالار قاراستىرىلعان.
«تمد-عا قاتىسۋشى مەملەكەتتەردىڭ تاۋارلاردى دارالاندىرۋ قۇرالدارىن قورعاۋدىڭ ۇلتتىق جۇيەلەرىن ودان ءارى دامىتۋ جونىندەگى كۇش-جىگەرىن بىرىكتىرۋگە باعىتتالعان. زاڭدى ازىرلەۋشىلەردىڭ پىكىرىنشە, ونى قابىلداۋ تەرىس الەۋمەتتىك, ەكونوميكالىق جانە قۇقىقتىق سالدارلارعا اكەپ سوقپايدى, سونداي-اق رەسپۋبليكالىق بيۋدجەت ەسەبىنەن قوسىمشا قارجى-قاراجاتتى تالاپ ەتپەيدى. زاڭ بويىنشا عىلىمي قۇقىقتىق جانە لينگۆيستيكالىق ساراپتامالار جۇرگىزىلگەن. «اتامەكەن» ۇلتتىق كاسىپكەرلەر پالاتاسى مەن جەكە كاسىپكەرلىك سۋبەكتىلەرىنىڭ اككرەديتتەلگەن بىرلەستىكتەرىنەن زاڭ بويىنشا ساراپتامالىق قورىتىندى جاسالدى», دەدى ق.تاستەكەەۆ.
سەناتوردىڭ ايتۋىنشا, ارمەنيا, بەلارۋس, وزبەكستان جانە قىرعىزستان مەملەكەتىشىلىك راسىمدەردى جۇرگىزدى. «قازاقستان رەسپۋبليكاسىنىڭ حالىقارالىق شارتتارى تۋرالى» زاڭىنا سايكەس كەلىسىم راتيفيكاتسيالاۋعا جاتادى. سەنات كوميتەتتەرىنەن زاڭ جوباسى بويىنشا ەسكەرتۋلەر مەن ۇسىنىستار كەلىپ تۇسپەگەن.
«ماقۇلدانعان زاڭ تمد شەڭبەرىندە جالعان تاۋار بەلگىلەرى مەن گەوگرافيالىق كورسەتكىشتەردى پايدالانۋدىڭ الدىن الۋ جانە جولىن كەسۋ ءۇشىن قاجەتتى قۇقىقتىق ورتا قالىپتاستىرادى. سول ءۇشىن كەلىسىم ارقىلى مەملەكەتتەر تاراپىنان قابىلداناتىن بىرلەسكەن ءىس-شارالار مەن قۇقىقتىق تەتىكتەر ايقىندالادى. الداعى ۋاقىتتا كەلىسىم قاتىسۋشى مەملەكەتتەردىڭ زياتكەرلىك مەنشىك قۇقىقتارىن قورعاۋ سالاسىنداعى الەۋەتىن ارتتىرۋعا وڭ ۇلەسىن قوسادى دەپ سەنەمىز», دەدى ماۋلەن اشىمباەۆ.
بۇدان باسقا سەنات وتىرىسىندا قازاقستان رەسپۋبليكاسىنىڭ ورنىقتى دامۋى سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگتەۋ جونىندەگى پارلامەنتتىك كوميسسيانىڭ قۇرامىنا قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ تۋرالى ماسەلە قارالدى. كوميسسيا قۇرامىنا ءار پالاتادان 9 دەپۋتاتتان مۇشە بولادى.
«مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرماسى بويىنشا پارلامەنتتە ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزەتىن پارلامەنتتىك كوميسسيا قۇرۋ جۇمىستارى قولعا الىندى. بۇل كوميسسيانىڭ نەگىزگى ماقساتى – پرەزيدەنتىمىزدىڭ رەفورمالارى اياسىندا ورنىقتى دامۋ سالاسىنداعى ۇلتتىق ماقساتتار مەن مىندەتتەردى ءتيىمدى ىسكە اسىرۋعا جاردەمدەسۋ. ونىڭ جۇمىسىنا ۇكىمەت مۇشەلەرى, حالىقارالىق ۇيىمدار مەن قوعامدىق ۇيىمداردىڭ, ۇكىمەتتىك ەمەس سەكتوردىڭ وكىلدەرى جانە ساراپشىلار مەن عالىمدار قاتىسىپ وتىرادى», دەدى سەنات سپيكەرى.