ماجىلىستە ەلدى مەكەندەرگە ارنالعان وڭىرلىك ستاندارتتار جۇيەسى تۋرالى ۇكىمەت ساعاتى ءوتتى. جيىن بارىسىندا وزەكتى ماسەلەلەر تالقىلانىپ, ونى دامىتۋ جولدارى ءسوز بولدى.
ءىس-شارانى اشقان ءماجىلىس توراعاسىنىڭ ورىنباسارى البەرت راۋ وڭىرلەردى دامىتۋدىڭ مەملەكەتتىك باعدارلاماسىنىڭ, سونداي-اق باسقا دا سالالىق قۇجاتتاردىڭ بىرنەشە كەزەڭى جۇزەگە اسىرىلعانىن اتاپ ءوتتى.
«وسىلايشا, اۋىلدىق اۋماقتاردى دامىتۋ دامۋ الەۋەتى بار اۋىلدىق ەلدى مەكەندەردى باسىمدىقپەن قولداۋ ارقىلى اۋىل تۇرعىندارىنىڭ ءومىر ءسۇرۋ ساپاسىن ارتتىرۋعا باعىتتالعان. قابىلدانعان ءىس-شارالاردى جۇزەگە اسىرۋ ناتيجەسىندە 2020-2022 جىلدارى سۋمەن جابدىقتاۋ قىزمەتتەرىنە قولجەتىمدىلىك 90,1 پايىزدان 94,5 پايىزعا دەيىن ارتتى. 116 مەكتەپكە دەيىنگى مەكەمە, 224 جالپى ءبىلىم بەرەتىن مەكتەپ, 47 دارىگەرلىك امبۋلاتوريا پايدالانۋعا بەرىلدى», دەدى ا.راۋ.
بۇدان كەيىن ۇلتتىق ەكونوميكا ءمينيسترى الىبەك قۋانتىروۆ ءسوز الدى. ۆەدومستۆو باسشىسى ءارتۇرلى ەلدى مەكەندەر ءۇشىن وڭىرلىك ستاندارتتار جۇيەسى ازىرلەنگەنىن جەتكىزدى. قۇجات حالىققا قاجەتتى نىساندار مەن كورسەتىلەتىن قىزمەتتەردىڭ ناقتى تىزبەسىن قامتيدى. اتالعان جۇيە ءاربىر ەلدى مەكەننىڭ مينيمالدى تۇرمىس ستاندارتتارىن ايقىندايدى. مەملەكەتتىك ورگاندار بۇل جۇيەنى ءوڭىردىڭ الەۋمەتتىك-ەكونوميكالىق دامۋىن جوسپارلاۋ كەزىندە پايدالانادى.
«مينيسترلىك وڭىرلەردىڭ مينيمالدى ستاندارتتارعا سايكەستىگى تۇرعىسىنان جىل سايىن مونيتورينگ جۇرگىزىپ, باقىلايدى. وڭىرلىك ستاندارتتار جۇيەسى سايكەس سالاداعى مەملەكەتتىك جوسپارلاۋ جۇيەسىنىڭ نەگىزگى قۇجاتتارىمەن ينتەگراتسيالانعان. ماسەلەن, 2025 جىلعا دەيىنگى اۋماقتىق دامۋ جوسپارىندا جانە اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىندا ەلىمىزدىڭ كەڭىستىكتە دامۋى مەن اۋىلدىق اۋماقتارىنا قاتىستى وڭىرلىك ستاندارتتار جۇيەسى تاسىلدەرى كوزدەلگەن», دەدى ءا.قۋانتىروۆ.
سونىمەن قاتار ازىرلەنىپ جاتقان جاڭا بيۋدجەت كودەكسى شەڭبەرىندە ءوسج ەرەجەلەرىن جالپى سيپاتتاعى ترانسفەرتتەردى, مەملەكەتتىك ورگاندار مەن وبلىستاردىڭ ينۆەستيتسيالىق جوسپارلارىن قالىپتاستىرۋ بولىگىندە بيۋدجەتتىك جوسپارلاۋمەن بايلانىستىرۋ كوزدەلگەن. مينيستر كەلتىرگەن دەرەكتەرگە سايكەس, 2021 جىلى وڭىرلەردەگى بارلىق ەلدى مەكەن بويىنشا نىساندارمەن جانە كورسەتىلەتىن قىزمەتتەرمەن قامتاماسىز ەتۋ دەڭگەيى 2019 جىلمەن سالىستىرعاندا 9,3 پايىزعا ۇلعايىپ, 64,1 پايىزدى قۇراعان.
«سونىمەن بىرگە وڭىرلەر اكىمدىكتەرىنىڭ, مۇددەلى مەملەكەتتىك ورگانداردىڭ, قوعامدىق ۇيىمداردىڭ ۇسىنىستارىن, سونداي-اق وتكەن جىلعى پارلامەنتتىك تىڭداۋلاردىڭ قورىتىندىلارى بويىنشا سىزدەردىڭ ۇسىنىمدارىڭىزدى ەسكەرە وتىرىپ, مينيسترلىك 2022 جىلى وڭىرلىك ستاندارتتار جۇيەسىن جەتىلدىرۋ بويىنشا اۋقىمدى جۇمىس اتقاردى.
ءمينيستردىڭ ايتۋىنشا, ءوسج كورسەتكىشتەرىن ەسەپتەۋدىڭ جاڭا ادىستەمەسىنە نىساندار مەن كورسەتىلەتىن قىزمەتتەردىڭ ساپاسىن سيپاتتايتىن كورسەتكىشتەر قوسىلعان. ەندى نىساننىڭ تەحنيكالىق سيپاتتامالارى جانە ماتەريالدىق-تەحنيكالىق بازامەن جاراقتاندىرىلۋ دەڭگەيى دە ەسكەرىلمەك.
«ماسەلەن, بۇرىن قولدانىلعان ءوسج ادىستەمەسىندە جۇمىس ىستەپ تۇرعان نىساننىڭ بار-جوعى عانا باعالاندى. مىسالى, اقمولا وبلىسىنىڭ زەرەندى اۋىلىندا ءۇش مەكتەپ بار, ءوسج بويىنشا قامتاماسىز ەتىلۋى 100 پايىز دەپ ەسەپتەلدى. قازىرگى ۋاقىتتا زەرەندى اۋىلىندا 3 مەكتەپتىڭ 2-ءى كۇردەلى جوندەۋدى قاجەت ەتەدى, سونداي-اق تاعى 1 مەكتەپتىڭ قۇرىلىسى قاجەت. تيىسىنشە, ساپالىق كورسەتكىشتەردى ەسكەرە وتىرىپ, جاڭا ءوسج ادىستەمەسى بويىنشا زەرەندى اۋىلىنىڭ قامتاماسىز ەتىلۋ دەڭگەيى 81 پايىزعا دەيىن تومەندەدى», دەدى ءا.قۋانتىروۆ.
ۆەدومتسۆو باسشىسى باستى ماقسات قالا مەن اۋىل اراسىنداعى ايىرماشىلىقتى بارىنشا ازايتۋ ەكەنىن جەتكىزدى. وسىعان بايلانىستى 2022 جىلعى وڭىرلىك ستاندارتتار جۇيەسى كورسەتكىشتەرىن مونيتورينگتەۋدىڭ نەگىزگى سالالارىن بايانداپ بەردى.
«مەكتەپتەر بويىنشا ەلدى مەكەندەردى قامتاماسىز ەتۋ دەڭگەيى 83, مەكتەپكە دەيىنگى ءبىلىم بەرۋ مەكەمەلەرى – 82, تەحنيكالىق جانە كاسىبي ءبىلىم نىساندارى 57 پايىزدى قۇرادى. «دەنساۋلىق ساقتاۋ» سالاسىنداعى مەكەمەلەرمەن قامتاماسىز ەتۋ دەڭگەيى – 75, ءدارىحانالاردىڭ قامتىلۋى 32 پايىزعا جەتتى. مادەني-دەمالىس ۇيىمدارى بويىنشا ەلدى مەكەندەردىڭ قامتاماسىز ەتىلۋ دەڭگەيى 72, مۇراجايلار – 45, دەنە شىنىقتىرۋ-ساۋىقتىرۋ كەشەنى – 54 جانە سپورتتىق جاتتىعۋ زالدارى 56 پايىزدى قۇرادى.
«ينجەنەرلىك ينفراقۇرىلىم» سالاسىندا: ورتالىقتاندىرىلعان سۋمەن جابدىقتاۋ بويىنشا ينجەنەرلىك ينفراقۇرىلىم سالاسىنداعى نىساندارمەن جانە كورسەتىلەتىن قىزمەتتەرمەن قامتاماسىز ەتۋ دەڭگەيى – 89, سۋ بۇرۋ جۇيەسى بويىنشا 51 پايىزعا تەڭەستى. «كولىك ينفراقۇرىلىمى» سالاسىندا, ەلدى مەكەندەردىڭ قالاىشىلىك/كەنتىشىلىك جولدارمەن قامتاماسىز ەتىلۋ دەڭگەيى – 76, جولدى جارىقتاندىرۋ – 45, اۆتوكولىك جۋ ورىندارى – 60, تەمىرجول ۆوكزالدارى بويىنشا 60 پايىزعا جەتتى», دەدى ءا.قۋانتىروۆ.
بۇدان بولەك, ۇلتتىق ەكونوميكا ءمينيسترى بيۋدجەتتىك باعدارلامالار شەڭبەرىندە وڭىرلەردى دامىتۋ جۇمىستارىنا توقتالدى. ماسەلەن, 2023 جىلى وڭىرلەردىڭ ينجەنەرلىك جانە كولىك ينفراقۇرىلىمىن دامىتۋ ءۇشىن 14 وبلىس ورتالىعىندا 67 بيۋدجەتتىك ينۆەستيتسيالىق جوبانى ىسكە اسىرۋعا 42,1 ملرد تەڭگە ءبولىندى. وسى قاراجات شەڭبەرىندە قالا ىشىندەگى 60 شاقىرىمعا جۋىق جولداردى جانە 140 شاقىرىم ينجەنەرلىك جەلىلەردى جاڭعىرتۋ جۇمىسى ءجۇرىپ جاتىر. بۇدان باسقا, 29 مونو جانە شاعىن قالالاردا 74 جوبانى جۇزەگە اسىرۋعا 34,9 ملرد تەڭگە قاراستىرىلعان. قالاىشىلىك جولداردىڭ 90 شاقىرىمىن جانە ينجەنەرلىك جەلىلەردىڭ 180 شاقىرىمىن جاڭعىرتۋ جوسپارلانعان.