الماتى, استانا جانە اقتوبە قالالارىندا ۇيىمداستىرىلعان تىرەك قيمىل اپپاراتى جانە كورۋ قابىلەتى زاقىمدانعان سپورتشىلار اراسىندا التىنشى جازعى پاراليمپيا ويىندارىنىڭ الاۋى ءسوندى. جارىسقا ەلىمىزدىڭ 20 وڭىرىنەن 1000-نان استام سپورتشى قاتىسىپ, سپورتتىڭ 10 تۇرىنەن جۇلدەلەردى ساراپقا سالدى.
جيىرما كۇنگە جالعاسقان جارىس قورىتىندىسى بويىنشا, جالپىكوماندالىق ەسەپتە 44 التىن, 15 كۇمىس جانە 10 قولا مەدال ولجالاعان قاراعاندى وبلىسىنىڭ سپورتشىلارى ەكىنشى رەت ۇزدىك شىقتى. ەكىنشى ورىندى 35 التىن, 9 كۇمىس جانە 9 قولا مەدال جەڭىپ العان اتىراۋ وبلىسىنىڭ وكىلدەرى يەلەنسە, ۇزدىك ۇشتىكتى 24 التىن, 16 كۇمىس جانە 6 قولا مەدالمەن اقتوبە وبلىسى تۇيىندەدى.
پاراليمپيا ويىندارى – ءتورت جىلدا ءبىر رەت وتەتىن ەلىمىزدەگى ەڭ ماڭىزدى سپورتتىق ءىس-شارا. ونىڭ باستى ماقساتى – دەنە مۇمكىندىكتەرى شەكتەۋلى تۇلعالار اراسىندا سالاماتتى ءومىر سالتىن ناسيحاتتاۋ, ەلىمىزدە پاراليمپيادالىق سپورت تۇرلەرىن دامىتۋ جانە ۇزدىك ونەر كورسەتكەن سپورتشىلاردى ۇلتتىق قۇراما ساپىنا ىرىكتەۋ. بيىل پاراليمپيادا جارىستارىنا ەلىمىزدىڭ بارلىق وڭىرىنەن ءارتۇرلى جاستاعى سپورتشىلار قاتىستى. ولاردىڭ اراسىندا ەڭ جاس سپورتشى 16 جاستا بولسا, ەڭ ۇلكەنى 78 جاستا. قاتىسۋشىلاردىڭ اراcىندا 2016 جىلعى ريو پاراليمپياداسىنىڭ جەڭىمپازى زۋلفيا گابيدۋللينا, 2020 جىلعى توكيو پاراليمپياداسىنىڭ چەمپيونى داۆيد دەگتيارەۆ, جۇلدەگەرلەر – ءانۋار ساريەۆ پەن نۇرداۋلەت جۇماعالي, پارا دزيۋدودان الەم چەمپيوندارى اقمارال ناۋاتبەك, ەرعالي شامەي, باسقا دا ءىرى حالىقارالىق جارىستاردىڭ جەڭىمپازدارى دا بولدى.
بيىلعى ويىندار بارىسىندا پارا جەڭىل اتلەتيكا (247 سپورتشى), پارا ۇستەل تەننيسى (157 سپورتشى) جانە پارا ءجۇزۋ (124 سپورتشى) سپورت تۇرلەرىنەن ەڭ كوپ سپورتشى قاتىسقانىن ەرەكشە اتاپ وتكەن ءجون. وسى جارىس اياسىندا العاش رەت ەلىمىزدە ت-64 ساناتى بويىنشا پروتەزبەن جۇگىرۋدەن جارىس ۇيىمداستىرىلدى. سونىمەن قاتار بيىلعى پاراليمپيا ويىندارىندا ەلىمىزدىڭ 9 رەكوردى جاڭارتىلدى.
سونداي-اق وسى جارىستاردا ۇزدىك ونەر كورسەتكەن سپورتشىلار ۇلتتىق قۇراما ساپىنا قابىلدانىپ, الدا كەلە جاتقان حانچجوۋ-2022 IV پارا ازيا ويىندارى مەن XVII جازعى پاراليمپيا ويىندارىنىڭ ىرىكتەۋ جارىستارىنا قاتىسۋعا مۇمكىندىك الدى.
«بيىلعى پاراليمپيا ويىندارى مەن ءۇشىن وتە قىزىقتى ءوتتى. مىقتى سپورتشىلاردىڭ اراسىندا ءوز كۇشىمدى سىناپ كورۋگە مۇمكىندىك بەرگەن ۇيىمداستىرۋشىلارعا العىسىم شەكسىز. پارا ۇستەل تەننيسىنەن وتكەن S4 ساناتىنداعى سايىستا ەلىمىزدىڭ ەڭ مىقتى تەننيسشىلەرىنەن باسىم ءتۇسىپ, جارىس جەڭىمپازى اتاندىم», دەپ اعىنان جارىلدى پارا ۇستەل تەننيسىنەن ۇلتتىق قۇراما سپورتشىسى مەيىربەك وتەپوۆ.