17 جاسقا دەيىنگى ەلىمىزدىڭ جاسوسپىرىمدەر قۇراماسى 24-29 مامىر ارالىعىندا ۆولگوگرادتا وتكەن ۋەفا دامۋ جارىسىنا قاتىسىپ, ءۇشىنشى ورىنعا يە بولدى.
اينالما جۇيە بويىنشا ۇيىمداستىرىلعان تۋرنيردە مارات ەسلياموۆ جاتتىقتىراتىن قازاقستاننىڭ جاسوسپىرىمدەر قۇراماسى رەسەي, قىرعىزستان جانە بەلارۋس كوماندالارىمەن جاسىل الاڭدا شەبەرلىك بايقاستى. العاشقى تۋردا رەسەي فۋتبولشىلارىنا 5:0 ەسەبىمەن جول بەرگەن جەرلەستەرىمىز كەيىنگى ەكى تۋردا قىرعىزستان قۇراماسىن – 4:1, بەلارۋس جاسوسپىرىمدەرىن 3:0 ەسەبىمەن تىزە بۇكتىردى.
جارىس قورىتىندىسى بويىنشا رەسەي, بەلارۋس جانە قازاقستان قۇرامالارى ءۇش تۋردا ەكى مارتە جەڭىسكە جەتىپ, بىردەي ۇپاي جيناعانىمەن, دوپ ايىرماسى بويىنشا باس جۇلدە الاڭ قوجايىندارىنا بۇيىردى. بەلارۋس فۋتبولشىلارى كۇمىس جۇلدەگە يە بولسا, ۇشتىكتى قازاقستان قۇراماسى تۇيىندەدى. ماتچتار «زەنيت» جانە «وليمپيا» ستاديوندارىندا ءوتتى.