قىزىلورداداعى وڭىرلىك كوممۋنيكاتسيا قىزمەتىندە ايماق ءۇشىن ماڭىزدى نىساندارعا كوشپەلى بريفينگ ۇيىمداستىراتىن ءبىر جاقسى ءداستۇر بار. وتكەندە بۇقارالىق اقپارات قۇرالدارى وكىلدەرى وسىنداي بريفينگ اياسىندا قۇرىلىسى جاڭا باستالىپ جاتقان «قىزىلوردا – جەزقازعان» كۇرە جولىنداعى جۇمىس بارىسىن كورىپ قايتقان. ال جۋىقتا وسىنداي ساپارمەن قالا ىرگەسىندەگى شىنى زاۋىتىنا باردىق.
بىلتىر عانا ىسكە قوسىلعان زاۋىتتى كەمى ون جىلدىڭ ۇستىندە جىر قىلىپ كەلىپپىز. سوناۋ 2008 جىلى قازاقستان مەن قىتاي ۇكىمەتتەرى اراسىندا بىرىككەن كاسىپورىندار تۋرالى كەلىسىم جاسالىپ, العاشقى قادام رەتىندە قىزىلوردادا شىنى زاۋىتىن سالۋ جوسپارلانادى. ءسال كەشىگىپ بارىپ ىرگەتاسى قالانعان بولاشاق ءوندىرىس ورنىنىڭ جارناماسى جاقسى-اق ەدى. قۇرىلىسى كىدىرىستەپ ءجۇرىپ, سالىنىپ بىتكەننەن كەيىن دە ۇزاق ۋاقىت قىبىرسىز قالعان نىسانعا كەيىنگى جىلدارى جان ءبىتىپ, بىلتىر ىسكە قوسىلدى. ءوندىرىس ورنى وتكەن جىلى 32 مىڭ, بيىل 75 مىڭ تونناعا جۋىق ءونىم شىعارعان. 40 مىڭ توننا ءونىمى ەكسپورتقا كەتكەن.
«Orda Glass LTD» سەرىكتەستىگىنىڭ بۇل جوباسىن جۇزەگە اسىرۋ ءۇشىن 42 ملرد تەڭگە شەتەلدىك ينۆەستيتسيا تارتىلدى. ءوندىرىس ورنىنىڭ ءوڭىردىڭ وڭدەۋ ونەركاسىبىندەگى ۇلەسى شامامەن 8 پايىز, ال قۇرىلىس يندۋسترياسىنداعى ۇلەسى 42,2 پايىز شاماسىندا.
قازىر زاۋىتتاعى 400-گە جۋىق جۇمىسشىنىڭ 70 پايىزى جەرگىلىكتى ازاماتتار. جاڭادان اشىلعاندا قىتايدان 147 مامان كەلىپتى. سودان بەرى لوگيستيكا, كەسۋ, وراۋ ءبولىمىنىڭ جۇمىسىن جەرگىلىكتى ازاماتتار مەڭگەرىپ, كورشى مەملەكەتتەن كەلگەندەردىڭ 35-ءى كەرى قايتارىلىپتى. مۇنداعى وتاندىق مامانداردىڭ ورتاشا ايلىعى 404 مىڭ تەڭگە, ال بۇل سالادا تاجىريبەسى مول, بىلىكتىلىگى جوعارى شەتەلدىكتەردىڭ تابىسى ودان دا جوعارى.
– بولاشاقتا جەرگىلىكتى ازاماتتاردى قىتايدا وقىتىپ, تاجىريبە جيناۋىنا مۇمكىندىك جاسايمىز. مىندەتتى تۇردە كاسىپكە بەيىم, ۇيىمداستىرۋشىلىق قابىلەتى جوعارى ازاماتتاردى باسشىلىق قىزمەتكە جوعارىلاتامىز, – دەيدى «Orda Glass LTD» جشس باس ديرەكتورى حان ليتسزيۋن.
شىنى زاۋىتى باسقا دا ىلەسپە ءوندىرىس ورىندارىن اشۋعا مۇمكىندىك تۋعىزىپ وتىر. وسى باعىتتا قىتاي, نەمىس جانە تۇرىك كومپانيالارىمەن كەلىسسوز جۇرگىزىلىپ جاتىر. باستاما ويداعىداي جۇزەگە اسسا, الدا وسى اۋماقتا قۇنى 100 ملرد تەڭگە بولاتىن 8 شاعىن زاۋىت جۇمىس ىستەي باستايدى. جىل سوڭىنا دەيىن قوسىمشا تاعى 80 جاڭا جۇمىس ورنى اشىلماق.
جالپى, قىتايلىق حولدينگ وسىنداي 9 زاۋىت سالعان. ونىڭ جەتەۋى سول مەملەكەتتە, بىرەۋى نيگەريادا, سوڭعىسى بىزدە. جاڭا ءوندىرىس ورنىنداعى ءبىر پەشتىڭ ءوزى وزبەكستانداعى وسىنداي 3 زاۋىتتىڭ ءونىمىن بەرىپ وتىر. بيىلعى 4 ايدا 6 ملرد تەڭگەنىڭ ءونىمىن شىعارىپ, وسىعان دەيىن اينەكتى وزبەكستان مەن قىرعىزستاننان الىپ كەلگەن ەلىمىزدى تولىق قامتاماسىز ەتكەن كاسىپورىندا ەنەرگيا ۇنەمدەگىش شىنى شىعارۋ ءۇشىن حولدينگ تاعى 15 ملن دوللار كولەمىندە ينۆەستيتسيا ءبولىپ وتىر.
ماماندار زاۋىت ىسكە قوسىلعالى بەرى ەلىمىزدە شىنى باعاسى 30-35 پايىزعا ارزانداعانىن ايتادى. بىلتىر زاۋىت ءونىمى نەگىزىنەن شىمكەنت, الماتى, استانا قالالارىنا ساتىلىپ, وزبەكستانعا ەكسپورتتالعان.
قاجەتتى شيكىزاتتىڭ دەنى ارال, قازالى جانە جاڭاقورعان اۋداندارىنان جەتكىزىلىپ وتىر. تەك كالتسيلەنگەن سودا مەن ناتري سۋلفاتى شەتتەن اكەلىنەدى.
«قازاقستاندىقتاردىڭ ءال-اۋقاتىن ارتتىرۋعا باعىتتالعان تۇراقتى ەكونوميكالىق ءوسۋ» ۇلتتىق جوباسى اياسىندا ىسكە قوسىلعان زاۋىت جۇمىسىمەن ءبىزدى وندىرىستىك ءبولىم باسشىسىنىڭ كومەكشىسى عالىمجان قۋاتوۆ تانىستىردى. مۇندا ءبارى اۆتوماتتاندىرىلعان, قوندىرعىلاردىڭ دەنى ەۋروپادان جەتكىزىلىپتى. ماماندار جۇمىس بارىسىن كومپيۋتەر ارقىلى باقىلاپ وتىر. ۇزىننان ۇزاق سوزىلعان جەلى بويىمەن جۇرە بەرسەڭىز, جىپ-جىلتىر اينەكتىڭ سىرعىپ بارا جاتقانىن كورەسىز.
بۇرىنعى تاجىريبەدە اينەكتى قالىپقا قۇيىپ شىعارعان ەكەن. وتكەن عاسىردىڭ ەلۋىنشى جىلدارى ونىڭ ساپاسىن جوعارىلاتۋ ءۇشىن اعىلشىندار ەرىتىلگەن قالايى بەتىمەن سىرعىتۋدى ويلاپ تاۋىپ, پاتەنتتەگەن. ماماندار بىزگە وسى ۇدەرىستى كورسەتتى. ودان كەيىن تاباقشا شىنىلار ساپاسىن انىقتايتىن قۇرىلعىدان وتەدى. ول اينەك بەتىندەگى بولماشى اقاۋدى دا انىقتاپ, سۇرىپتاپ بەرەدى. شىنى كەسىلگەننەن كەيىن تاعى ءبىر تازالانىپ, دايىن ونىمدەر قويماسىنا جەتەدى.
– يندۋستريالاندىرۋ باعدارلاماسى اياسىندا ىسكە قوسىلعان بۇل زاۋىت ءوڭىرىمىزدىڭ الەۋمەتتىك-ەكونوميكالىق دامۋىنا سەرپىن بەرىپ وتىر. ماسەلەن, بيىل بۇل زاۋىتقا 42 ملرد تەڭگە ينۆەستيتسيا تارتىلىپ, بىرنەشە مەملەكەتپەن ءوندىرىس اۋماعىنا شاعىن ءوندىرىس ورىندارىن قۇرۋ باعىتىندا كەلىسىم جۇرگىزىلدى, – دەدى وبلىستىق كاسىپكەرلىك جانە ونەركاسىپ باسقارماسى باسشىسىنىڭ ورىنباسارى جانار بەردەنوۆا.
قىزىلوردا