ەلىمىزدەگى ۇزدىك تەننيسشىلەردىڭ ءبىرى تيموفەي سكاتوۆ فرانتسيادا جالاۋى جەلبىرەگەن «ۇلكەن دۋلىعا» ساناتىنداعى رولان گارروس ءتۋرنيرىنىڭ نەگىزگى كەزەڭىنە جولداما الدى.
تەننيستەن قازاقستاننىڭ ەرلەر اراسىنداعى ەكىنشى, الەمنىڭ 147-راكەتكاسى ت.سكاتوۆ فرانتسيا اشىق چەمپيوناتىنىڭ ىرىكتەۋ سايىستارىندا باق سىناپ, نەگىزگى كەزەڭدە وينايتىن ءۇش وتانداسىمىزدىڭ (الەكساندر بۋبليك, ەلەنا رىباكينا جانە يۋليا پۋتينتسەۆا) قاتارىن تولىقتىردى.
سكاتوۆ ىرىكتەۋ باسەكەلەرىنىڭ فينالىندا الەمنىڭ 165-راكەتكاسى, برازيليالىق فەليپە مەليگەني رودريگەس الۆەستەن ءۇش سەتتە 2:6, 7:5, 6:3 ەسەبىمەن باسىم ءتۇسىپ, كارەراسىندا العاش رەت فرانتسيا اشىق چەمپيوناتىنىڭ نەگىزگى كەزەڭىندە ويناۋ مۇمكىندىگىنە يە بولدى. ول العاشقى اينالىمىندا الەمنىڭ 33-راكەتكاسى, بولگاريالىق گريگور ديميتروۆپەن شەبەرلىك بايقاسادى.
سونىمەن قاتار ە.رىباكينا رولان گارروس ءتۋرنيرىنىڭ ءبىرىنشى كەزەڭىندە 16 جاستاعى چەحيالىق برەندا فرۋحۆيرتوۆامەن, يۋ.پۋتينتسەۆا بەلگيالىق مارينا زانەۆسكايامەن, ا.بۋبليك ىرىكتەۋ سايىستارىنىڭ جەڭىمپازى يتاليالىق دجۋليو زەپپيەريمەن شەبەرلىك بايقاسادى.