مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, اقىن عالىم جايلىبايدىڭ جەزقازعان قالاسىنداعى جىر كەشى وسىنداي تاقىرىپپەن ءوتتى.
تىرناقالدى ولەڭدەرى بۇرىنعى جەزقازعان وبلىستىق «جەزقازعان تۋى» گازەتىندە جارىق كورگەن اقىننىڭ العاشقى جىر جيناعى 1988 جىلى «جانىمنىڭ جاپىراقتارى» دەگەن اتپەن شىققان ەدى.
ۇنەمى شىعارماشىلىق ءوسۋ ۇستىندە بولعان ع.جايلىباي كەيىن جيىرما شاقتى كىتاپتىڭ اۆتورى اتاندى. 2014 جىلى تاڭدامالى شىعارمالارىنىڭ 3 تومدىعى, 2018 جىلى تۇرىك تىلىندە «يانكي» اتتى ءبىر تومدىعى جارىق كوردى. اقىننىڭ ولەڭدەرى مەن پوەمالارى الەمنىڭ 20-دان اسا مەملەكەتىندە باسىلىپ شىقتى. قاراعاندى لاگەرى تۋرالى جازىلعان «قارا ورامال» 2017 جىلى پوەماسى شۆەتسيانىڭ ستوكگولم قالاسىندا وتكەن VI «ورەn Eurasian» ادەبي بايقاۋىندا ءۇشىنشى ورىندى يەلەندى.
ع.جايلىباي حالىقارالىق «الاش» سىيلىعىنىڭ, رەسەي جازۋشىلار وداعىنىڭ س.ەسەنين اتىنداعى التىن مەدالىنىڭ يەگەرى. ول باياناۋىل جانە جاڭاارقا اۋدانىنىڭ قۇرمەتتى ازاماتى اتانعان.
جەزقازعانداعى حالىقتار دوستىعى مەن مادەنيەتى ۇيىندە وتكەن كەشتە اقىندى ۇلىتاۋ وبلىسى اكىمىنىڭ ورىنباسارى ع.قۇسمانعالي قۇتتىقتادى, جىرسۇيەر ەلدىڭ اتىنان سىي-سياپاتىن تابىستادى.
كەش بارىسىندا اقىندار س.راحمەت, ا.احمەتبەكوۆ, س.اقسۇڭقار ۇلى, ب.مىرزابەكوۆ, ع.ەشتاناەۆ, م.سەيتقازينوۆ, ا.وراز اقجارما تىلەكتەرىن ارناۋ جىرمەن جەتكىزدى. اقىننىڭ ولەڭدەرىنە جازىلعان اندەر دە شىرقالدى.
كەش يەسى جىلى قۇشاعىنا الىپ, كەڭ پەيىلىن تانىتقان تۋعان جەردىڭ حالقىنا شىنايى العىسىن ءبىلدىردى, جىردان شاشۋ شاشتى.
رەجيسسەر تەمىرجان جانبوتاەۆ ساحنالاعان «قارا ورامال» سپەكتاكلى ەكى كۇن قاتارىنان س.قوجامقۇلوۆ اتىنداعى جەزقازعان تەاترىندا قويىلدى.
جەزقازعان