شايبالى حوككەيدەن فينليانديانىڭ تامپەرە جانە لاتۆيانىڭ ريگا قالالارىندا ءوتىپ جاتقان الەم چەمپيوناتىنىڭ پلەي-وفف كەزەڭىنە شىققان قۇرامالار بەلگىلى بولدى. ەليتالى كەزەڭنىڭ توپتىق كەزەڭىندە باق سىناعان 16 كوماندانىڭ ىشىندە ەڭ ۇزدىك ناتيجە كورسەتكەن سەگىز قۇراما الەمدىك دودانىڭ شيرەك فينالىنا جولداما الادى.
اتاپ ايتقاندا, توپتىق كەزەڭدە مەرزىمىنەن بۇرىن پلەي-وفف جولداماسىن قورجىنىنا سالعان ەكى دۇركىن الەم چەمپيونى, 1/4 كەزەڭدەرىنىڭ تۇراقتى قاتىسۋشىسى – اقش, جاھان بىرىنشىلىگىنىڭ 11 مارتە جەڭىمپازى, 19 رەت فينالدا ونەر كورسەتكەن – شۆەتسيا جانە بىلتىرعى الەم چەمپيوناتىنىڭ جەڭىمپازى فينليانديا حوككەيشىلەرىنىڭ قاتارىن سوڭعى تۋردا پحەنچحان وليمپياداسىنىڭ كۇمىس جۇلدەگەرى گەرمانيا قۇراماسى تولىقتىرىپ, قاتارىنان ءتورتىنشى جىل شيرەك فينالدا ويناۋ مۇمكىندىگىنە يە بولدى. نەمىس حوككەيشىلەرى سوڭعى تۋردا ەليتالى توپقا بىلتىر ارنايى شاقىرتۋمەن قوسىلىپ, بيىل ەكىنشى مارتە الەم چەمپيوناتىندا ونەر كورسەتكەن فرانتسيا قۇراماسىن 5:0 ەسەبىمەن جەڭدى.
ال ۆ توبىندا الەم چەمپيوناتىنىڭ ءۇش دۇركىن ءفيناليسى – شۆەيتساريا, 1998 جىلعى وليمپيادا چەمپيونى – چەحيا جانە الەم بىرىنشىلىكتەرىنىڭ تاريحىندا ەڭ كوپ جەڭىسكە جەتكەن (27!) كانادا قۇرامالارىنىڭ قاتارىنا سوڭعى تۋردا جارىس قوجايىنى – لاتۆيا حوككەيشىلەرى قوسىلدى. لاتۆيالىقتار سوڭعى تۋردا تۋرنير كەستەسىنىڭ كوشباسشىسى شۆەيتساريا قۇراماسىن وۆەرتايمدا وپىق جەگىزىپ, توپتا ءۇشىنشى ورىنمەن پلەي-وفف كەزەڭىنە شىقتى. لاتۆيا ءوز تاريحىندا وسىمەن ءتورتىنشى مارتە شيرەك فينالعا شىعىپ وتىر.
جەرەبە قورىتىندىسى بويىنشا, شيرەك فينالدا ا توبىنىڭ كوشباسشىسى اقش ۆ توبىندا ءتورتىنشى ورىنعا تۇراقتاعان چەحيا قۇراماسىمەن, ۆ توبىنىڭ ءبىرىنشى ورىن يەگەرى شۆەيتساريا ا توبىندا ءتورتىنشى ساتىعا جايعاسقان گەرمانيامەن شەبەرلىك بايقاسادى. سونىمەن قاتار شۆەتسيا (2ا) – لاتۆيا (3ۆ) جانە بىلتىرعى چەمپيوناتتىڭ فيناليستەرى كانادا (2ۆ) مەن فينليانديا (3ا) قۇرامالارى جارتىلاي فينالدىڭ جولدامالارىن ساراپقا سالاتىن بولدى. جارىس ەرەجەسىنە سايكەس, الەم چەمپيوناتىنىڭ پلەي-وفف باسەكەلەرى بۇگىنگە, ياعني 25 مامىرعا, جارتىلاي فينال ويىندارى 27 مامىرعا جوسپارلانعان. ال فينال مەن ءۇشىنشى ورىن ءۇشىن وتەتىن كەزدەسۋلەر 28 مامىرعا بەلگىلەنگەن.
كەيىنگى 10 جىلداعى الەم چەمپيوناتتارىنىڭ تاريحىنا ۇڭىلەر بولساق, جىل سايىنعى شيرەك فينال باسەكەلەرى ءدال وسى قۇرامالاردىڭ قاتىسۋىمەن ءوتىپ جاتقانىن بايقايمىز. بىلتىر پلەي-وففتا ويناعان سلوۆاكيانىڭ ورنىن بيىل لاتۆيا باستى. ال وزگە قۇرامالار وتكەن جىلى دا ¼ فينالدا باق سىناعان.