الەمگە ايگىلى The Ring جۋرنالى ورتا سالماقتا كۇش سىناسىپ جۇرگەن ەڭ مىقتى كاسىپقوي بوكسشىلاردىڭ رەيتينگىن جاريالادى. ۇزدىكتەر كوشىن قازاقستاننىڭ ماقتانىشى, الەمنىڭ ەكس-چەمپيونى گەننادي گولوۆكين باستاپ تۇر.
كاسىپقوي رينگتە جۇدىرىقتاسىپ جۇرگەنىنە 17 جىلدان اسقان 41 جاستاعى GGG-ءدىڭ باعىندىرماعان بەلەسى جوق. سول ارالىقتا 45 كەزدەسۋ وتكىزگەن ول 42 مارتە جەڭىس تويىن تويلادى. 37 قارسىلاسىن نوكاۋتقا جىبەردى. كەزىندە گولوۆكين مەتتيۋ ماكلين, كەرتيس ستيۆەنس, دەنيەل گيل, مارتين ميۋررەي, ۆيللي مونرو, داۆيد لەمە, دومينيك ۋەيد, كەلل برۋك, دەنيەل دجەيكوبس, ۆانەس مارتيروسيان, سەرگەي دەرەۆيانچەنكو, كاميل شەرەمەتا, رەتا مۋراتا سىندى ساڭلاقتاردى وڭدىرماي سابادى. ونىڭ ءالى تەك مەكسيكالىق ساۋل الۆارەسكە جەتپەدى. GGG كانەلوعا ەكى رەت ەسە جىبەردى. تاعى ءبىر جەكپە-جەكتە تەڭ ەسەپ تىركەلدى. گەنا ءار جىلدارى ەڭ بەلدى ءتورت نۇسقانىڭ دا التىن بەلبەۋىن يەلەندى.
ەكىنشى ورىنعا جانىبەك ءالىمحان ۇلى كوتەرىلدى. 30 جاستاعى قازاقتىڭ قايسار ۇلى 2016 جىلدىڭ قوڭىر كۇزىندە تۇساۋكەسەر كەزدەسۋىن وتكىزگەن. سودان بەرى 14 رەت شارشى الاڭعا شىعىپ, بارلىق باسەكەلەسىنەن باسىم ءتۇستى. توعىز ايقاستا ايقىن باسىمدىق تانىتتى. سوڭعى رەت جانىبەك 13 مامىردا ۇلىبريتانيالىق ستيۆەن باتلەردى ەكىنشى راۋندتا ۇرىپ جىعىپ, WBO نۇسقاسى بويىنشا چەمپيوندىق بەلبەۋىن ءساتتى قورعادى. سول جەڭىسىنەن كەيىن Qazaq style ساۋل الۆارەس پەن دجەرەمي چارلونى جەكپە-جەككە شاقىردى. ەگەر ولار ءالىمحان ۇلىنىڭ ۇسىنىسىن قابىل السا, وندا كورەرمەندەر كەرەمەت ءبىر جەكپە-جەكتىڭ كۋاسى بولارى داۋسىز.
ۇزدىكتەر تىزىمىندە تاعى ءبىر وتانداسىمىز بار. ول – مەيىرىم نۇرسۇلتانوۆ. 29 شىلدەدە 30 جاسقا تولعالى وتىرعان قانداسىمىز دا ءدال جانىبەك ءالىمحان ۇلى سەكىلدى ءوزىنىڭ كاسىپقوي بوكستاعى كارەراسىن 2016 جىلى باستادى. قازىرگى رەكوردى – 19 كەزدەسۋ, 19 جەڭىس, 11 نوكاۋت. بۇگىنگى تاڭدا مەيىرىم WBC پەن WBO نۇسقالارىنىڭ رەيتينگىندە – ءتورتىنشى جانە IBF-تا التىنشى ورىندى ەنشىلەپ وتىر.
سونداي-اق The Ring جۋرنالىنىڭ ورتا سالماقتاعى توپ-وندىعىنا حايمە مۋنگيا (مەكسيكا), كارلوس ادامەس (دومينيكان رەسپۋبليكاسى), ليام سميت ( ۇلىبريتانيا), سەرگەي دەرەۆيانچەنكو (ۋكراينا), ەريسلاندي لارا (كۋبا), فەليكس كەش ( ۇلىبريتانيا) جانە كريس يۋبەنك ( ۇلىبريتانيا) سىندى بىلعارى قولعاپ شەبەرلەرى ەنىپ وتىر.