سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى مەملەكەتتىك ورگانداردىڭ وكىلدەرىمەن كەزدەسىپ, اقمولا وبلىسىنا ساپار بارىسىندا ايتىلعان ۇسىنىستاردى ىسكە اسىرۋ ماسەلەلەرىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوميتەت توراعاسى ءالي بەكتاەۆ ءوز سوزىندە سەناتورلار بيىل 12 مامىردا اقمولا وبلىسىندا كوشپەلى وتىرىس وتكىزىپ, وڭىردەگى اۋىل ەڭبەككەرلەرىمەن كەزدەسكەنىن اتاپ ءوتتى. سەناتورلار اۋىل تۇرعىندارى كوتەرگەن ماسەلەلەرگە تالداۋ جاساپ, ونى سالالىق مەملەكەتتىك ورگانداردىڭ نازارىنا ۇسىندى.
«سەنات دەپۋتاتتارى ەلىمىزدىڭ بارلىق وڭىرلەرىمەن تىعىز بايلانىس ورناتىپ, وسى وڭىرلەردىڭ وزەكتى ماسەلەلەرىن رەسپۋبليكالىق دەڭگەيدە كوتەرىپ كەلەدى. وڭىرلەرگە ساپارلار مەن سەناتورلاردىڭ جەرگىلىكتى جەرلەردە فەرمەرلەرمەن كەزدەسۋلەرى وزەكتى ماسەلەلەردى شەشۋدى كوزدەيدى. بۇگىن ءبىز اقمولا وبلىسىنا ساپاردىڭ كەيبىر قورىتىندىلارىن شىعارىپ, انىقتالعان ماسەلەلەردى شەشۋ ماقساتىندا جاۋاپتى مەملەكەتتىك ورگانداردىڭ جوسپارلارىن تىڭداۋعا نيەتتەنىپ وتىرمىز», دەدى ءالي بەكتاەۆ.
شاراعا اۋىل شارۋاشىلىعى ءمينيسترىنىڭ ورىنباسارى, اقمولا وبلىسى اكىمدىگىنىڭ جانە باسقا دا مەملەكەتتىك ورگانداردىڭ, اۋىل شارۋاشىلىعى ونىمدەرىن وندىرۋشىلەردىڭ وكىلدەرى قاتىستى.
كەزدەسۋ بارىسىندا اۋىل شارۋاشىلىعى مينيسترلىگىنىڭ وكىلدەرى سەناتورلارعا اۋىل شارۋاشىلىعى وندىرۋشىلەرىن مەملەكەتتىك قولداۋ, جەمشوپ بازاسىمەن قامتاماسىز ەتۋ, ارنايى ۆەتەريناريالىق ءىس-شارالار وتكىزۋ جانە ىشكى نارىقتى قورعاۋ جونىندەگى جۇمىس جوسپارىن ازىرلەۋگە قاتىستى اتقارىلعان جۇمىستار تۋرالى ايتىپ بەردى.
شاراعا قاتىسۋشىلار جينالىس قورىتىندىسى بويىنشا اۋىلدىق اۋماقتاردى ودان ءارى دامىتۋعا باعىتتالعان بىرقاتار ۇسىنىس ازىرلەدى.