بەرلين ەۋرازيالىق كلۋبىنىڭ 37-وتىرىسىنا قاتىسۋشىلار ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستان مەن گەرمانيا اراسىنداعى تەحنيكالىق جوعارى جانە كاسىپتىك ءبىلىم سالاسىنداعى ىنتىماقتاستىقتى دامىتۋ ماسەلەلەرىن تالقىلادى. ءىس-شاراعا ەكى ەلدىڭ مەملەكەتتىك ورگاندارى, جوعارى جانە ورتا كاسىپتىك وقۋ ورىندارى, بيزنەس-قاۋىمداستىق وكىلدەرى قاتىستى.
مازمۇندى وتىرىستى ەلىمىزدىڭ گەرمانياداعى توتەنشە جانە وكىلەتتى ەلشىسى نۇرلان ونجانوۆ جانە گەرمان ەكونوميكاسى شىعىس كوميتەتىنىڭ اتقارۋشى ديرەكتورى ميحاەل حارمس جۇرگىزدى. جيىندا العاشقى بولىپ ءسوز العان سىرتقى ىستەر ءمينيسترىنىڭ ورىنباسارى رومان ۆاسيلەنكو ەلىمىزدى ودان ءارى يندۋستريالاندىرۋ جانە ونەركاسىپتىك الەۋەتىن ارتتىرۋ ءۇشىن كاسىبي تەحنيكالىق كادرلار بازاسىن ۇلعايتۋ ماڭىزدى ەكەنىن اتاپ ءوتتى.
ء«بىزدىڭ ەل نەمىستىڭ باي تاجىريبەسىنە قىزىعۋشىلىق تانىتىپ وتىر. كاسىبي ينجەنەرلىك-تەحنيكالىق كادرلاردى دايارلاۋدىڭ الەمدەگى وزىق ۇلگىسى كىم-كىمدى بولسىن قىزىقتىرارى داۋسىز. سونداي-اق جوعارى نەمىس ستاندارتىنا سايكەس دايارلانعان بىلىكتى تەحنيكالىق مامانداردىڭ بولۋى ەكى ەل اراسىنداعى بىرلەسكەن جوبالاردى ءساتتى جۇزەگە اسىرۋدا ماڭىزدى ءرول اتقارادى», دەدى ول.
گەرمان ەكونوميكاسى شىعىس كوميتەتى پرەزيديۋمىنىڭ مۇشەسى مانفرەد گرۋندكە ءوز بايانداماسىندا ەكى مەملەكەت اراسىنداعى ساۋدا-ەكونوميكالىق ىنتىماقتاستىق سەرپىنىنىڭ بەلسەندى ءوسۋى مەن نەمىس كاسىپكەرلەرىنىڭ ءبىزدىڭ نارىققا قاتىسۋعا قىزىعۋشىلىق تانىتىپ وتىرعانىن ايتتى.
جيىندا نەگىزى باياندامانى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ جاسادى. ول ەلىمىزدەگى جوعارى تەحنيكالىق ءبىلىمدى دامىتۋ جوسپارلارىنا توقتالدى.
«قازىر ەلىمىزدە شەتەلدىك جەتەكشى تەحنيكالىق جوعارى وقۋ ورىندارىنىڭ فيليالدارىن اشۋ كوزدەلىپ وتىر. ماسەلەن, اقتاۋداعى ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتى نەگىزىندە قازاقستان-گەرمان ينجينيرينگ ينستيتۋتىن جانە د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى نەگىزىندە تاۋ-كەن ونەركاسىبىندەگى قازاق-گەرمان عىلىم جانە تەحنولوگيا ينستيتۋتىن اشۋ جوسپارىمىزدا بار. سونداي-اق وتاندىق زەرتتەۋشىلەردىڭ شەتەلدە تاعىلىمدامادان ءوتۋى بويىنشا «500 عالىم» باعدارلاماسى جۇزەگە اسىپ جاتىر», دەدى ۆيتسە-مينيستر.
سونىمەن قاتار «بولاشاق» باعدارلاماسىنىڭ اياسىندا 500-گە جۋىق وتانداسىمىز گەرمانيادا وقىپ, ولاردىڭ تەڭ جارتىسى تەحنيكالىق جانە ينجەنەرلىك باعىتتا ءبىلىم العان. ق.ەرعاليەۆ باسقالارمەن سالىستىرعاندا ءبىزدىڭ ازاماتتاردىڭ نەمىس ەلىندە ءبىلىم الۋى جاعىنان جەتىنشى ورىندا تۇرعانىن ايتتى.
نەمىس ەلى تاراپىنان بايانداما جاساعان گەرمانيا سىرتقى ىستەر مينيسترلىگىنىڭ عىلىم, ءبىلىم جانە زەرتتەۋلەر سالاسىنداعى سىرتقى ساياسات جونىندەگى ۋاكىلى ۆيتو چەچەرە ەكىجاقتى ءبىلىم جانە عىلىم سالاسىنداعى ىنتىماقتاستىقتىڭ نەگىزگى باعىتى مەن ولاردى ودان ءارى كەڭەيتۋ پەرسپەكتيۆالارى تۋرالى اڭگىمەلەدى.
نەمىس ديپلوماتىنىڭ ايتۋىنشا, گيوتە ينستيتۋتىنىڭ, گەرمانيانىڭ اكادەميالىق ستۋدەنتتەر الماسۋ قىزمەتىنىڭ (DAAD), «مەكتەپتەر: بولاشاق سەرىكتەستەرى» (PASCH-schools) باستاماسىنىڭ, قازاق-گەرمان ۋنيۆەرسيتەتىنىڭ, شەتەلدەگى ەتنوستىق نەمىستەردى قولداۋ قورىنىڭ (SVmDA) قىزمەتىن قولدايدى.